ક્રાઇમ કેપિટલ / સુરતમાં બેફામ બન્યા ગુંડા તત્વો, 13 દિવસમાં 7 હત્યાની ઘટના, સુરત પોલીસની કામગીરી સામે સવાલ

• સુરતમાં આરોપીઓને નથી પોલીસનો ડર
• સુરતમાં 13 દિવસમાં 7 હત્યાના બનાવો
• ક્રાઇમ રોકવામાં સુરત પોલીસ સદંતર નિષ્ફળ

એક તરફ જ્યાં ગૃહરાજ્ય મંત્રી પોલીસની છબી સુધારવાનો પ્રયત્ન કરે છે. ગુજરાત પોલીસ ક્રાઇમને રોકવા માટે પોલીસ સજ્જ હોવાનો દાવો કરે છે ત્યારે ગૃહમંત્રીનું શહેર જ ક્રાઇમ કેપિટલ બની રહ્યું છે.  શહેરમાં શાંતિ અને સુરક્ષા જળવાય તેનું ધ્યાન રાખતી પોલીસ સુરતમાં ક્રાઇમ રોકવામાં નિષ્ફળ નીવડી છે. સુરતમાં છેલ્લા 13 દિવસમાં 7 હત્યાઓ બની. જે જોતા કહી શકાય કે સુરત ક્રાઇમ કેપિટલ બની ગયુ છે.

ક્રાઇમ કેપિટલ સુરત 

સુરતમાં હત્યાનો સિલસિલો અટકવાનું નામ લઇ રહ્યો નથી. સુરતમાં આરોપીઓને પોલીસનો ડર ન હોય તેવું લાગી રહ્યું છે. સુરતમાં છેલ્લા 13 દિવસોમાં હત્યાની 7 ઘટનાઓ બની. સુરત પોલીસ ક્રાઇમને રોકવામાં સદંતર નિષ્ફળ ગઇ છે.  સુરતમાં  સતત બની રહેલી ક્રાઇમની ઘટનાએ ખરેખર ચિંતા જનક છે.  ત્યારે અત્યાર સુધી બનેલા હત્યાના બનાવો અંગે નજર કરીએ તો, 

ટપોરીએ વૃદ્ધની કરી હત્યા

3 ફેબ્રુઆરીનો આ બનાવ છે. પરવટગામ પાસે શંકર નગરમાં 2 ટપોરી પાણીપુરી ખાવા ઊભેલી યુવતીની છેડતી કરી રહ્યા હતા આ જોઇને એક વૃદ્ધે તેઓને ઠપકો આપ્યો. તો ટપોરીઓએ વૃદ્ધને ચપ્પુના 20 ઘા મારી હત્યા કરી નાંખી.  લિંબાયત પોલીસે બે હત્યારા અનીશસીંગ અને રિકુંને પકડી પાડયા હતા.

ગૃહમંત્રીના કૌટુબિંક કાકાની પણ હત્યા કરાઈ 

5 ફેબ્રુઆરી, 2022નો આ બનાવ છે. અડાજણમાં ગૃહમંત્રીના કૌટુબિંક કાકા મહેશભાઈ સંઘવીની હત્યા કરવામાં આવી હતી. લિફટમાં જવાની માથાકૂટમાં પાડોશી શેરબ્રોકર બોની મહેતાએ મુક્કો મારી હત્યા કરી હતી. જેમાં રાંદેર પોલીસે હત્યારાની ધરપકડ કરી હતી.

ગળેટૂંપો દઇને પત્નીએ કરી હત્યા

6 ફેબ્રુઆરી, 2022નો આ બનાવ છે. લાલગેટના કાજીપુરા કામદાર આવાસ પાસે ભાવેશ સોંલકીની ગળેટૂંપો આપી પત્નીએ જ હત્યા કરી હતી. પતિ કામધંધો કરતો ન હોય અને દારૂ પીવાની ટેવથી કંટાળીને પત્નીએ પતિને મોતને ઘાટ ઉતારી દીધો હતો. આ મામલે લાલગેટ પોલીસે પત્નીની ધરપકડ કરી હતી.

લઘુશંકા કરનાર ઠપકો આપતા સિક્યુરિટી ગાર્ડની હત્યા

6 ફેબ્રુઆરી, 2022ના દિવસે સુરતમાં હત્યાનો બીજો કેસ નોંધાયો.  રાંદેર ગાયત્રી સર્કલ પાસે જાહેરમાં લઘુશંકા કરનાર યુવકને ઠપકો આપતા સિક્યુરીટી ગાર્ડ રવિ ઉર્ફે બંટીની હત્યા કરી નાંખી.  જેમાં સંજય જગતાપ, અર્જુન ચૌધરી, કવન ખલાસી,અય ભરવાડની ધરપકડ કરી હતી.

પાડોશીએ ઠપકો આપતા હત્યા

10 ફેબ્રુઆરી, 2022નો બનાવ છે. પાંડેસરા વડોદ જગન્નાથ સોસાયટીમાં રહેતી વિધવાને એક યુવક ઘૂરીને જોતો હતો જે બાબતે પાડોસી સાલુ વર્મા થપકો આપતા આરોપી સોમનાથ ગુપ્તાએ તેની હત્યા કરી હતી. પોલીસે તેની ધરપકડ કરી હતી.

પતિએ પત્નીનું ગળું દબાવી હત્યા કરી 

11 ફેબ્રુઆરી, 2022નો આ બનાવ છે. કાપોદ્રામાં વતન જવાના ઝઘડામાં પતિએ પત્ની દયાબેનનું ગળું દબાવી હત્યા કરાઈ હતી. આ મામલે 
 હત્યારા પતિ વિઠ્ઠલ પ્રેમજી ખીમાણીયાની ધરપકડ કરવામાં આવી છે.

જૂની અદાવતમાં ચપ્પુના ઘા ઝીંકી હત્યા

13 ફેબ્રુઆરી, 2022નો આ બનાવ છે. રાંદેર જીલાની બ્રિજ પર ફેમિલી સાથે જતા જુનેદ પઠાણની જુની અદાવતમાં ચપ્પુના ઘા ઝીંકી હત્યા કરાઈ હતી. 4 હત્યારા કારમાં આવ્યા હતા જો કે હાલ ફરાર આરોપીને શોધવા પોલીસે તપાસના ચક્રોગતિમાન કર્યા છે.