બિઝનેસ / મુકેશ અંબાણી ખરીદશે આ ચોકલેટ કંપની! Reliance સાથે નામ જોડતા શેર ખરીદવા માટે રોકાણકારોની પડાપડી

• રિલાયન્સ રિટેલ આ ચોકલેટ કંપનીનો 51 ટકા ખરીદશે 
• શેરની કિંમત રૂપિયા 113 નક્કી કરવામાં આવી
• આટલા રૂપિયામાં પૂરી કરશે ડીલ 

મુકેશ અંબાણી જે પણ વસ્તુ પર હાથ મૂકે છે તેની કિંમત વધી જાય છે! આવું જ કંઈક ચોકલેટ બનાવતી કંપની સાથે થયું છે. જણાવી દઈએ કે હાલ એવા સમાચાર આવી રહ્યા છે કે રિલાયન્સ રિટેલ આ ચોકલેટ કંપનીનો 51 ટકા એટલે કે બહુમતી હિસ્સો ખરીદવા જઈ રહી છે અને આ સમાચારથી કંપનીના શેરમાં જોરદાર ઉછાળો જોવા મળી રહ્યો છે. શુક્રવારે તેના શેરોમાં અપર સર્કિટ લાગી હતી. 

લોટસ ચોકલેટનો શેર 5% વધ્યો
અઠવાડિયાના છેલ્લા ટ્રેડિંગ દિવસે એટલે કે શુક્રવારે શેરબજારમાં ટ્રેડિંગ શરૂ થતાંની સાથે જ લોટસ ચોકલેટ કંપની લિમિટેડના શેરમાં અપર સર્કિટ લાગી હતી. અને તેનો શેર 5 ટકા એટલે કે રૂ. 5.85 વધીને રૂ. 122.95ના સ્તરે પહોંચ્યો હતો. સીધા શબ્દોમાં કહીએ તો ચોકલેટ કંપનીમાં રિલાયન્સ રિટેલની મોટી ખરીદીની સમાચારે રોકાણકારોના સેન્ટિમેન્ટને અસર કરી હતી અને આ રીતે તેઓએ શેરની ખરીદી વધારી દીધી છે. 

શેરની કિંમત રૂપિયા 113 નક્કી કરવામાં આવી
જણાવી દઈએ કે મુકેશ અંબાણીની પુત્રી ઈશા અંબાણી રિલાયન્સ રિટેલ વેન્ચર્સની જવાબદારી સંભાળી રહી છે અને આ સાથે જ મુકેશ અંબાણી રિટેલ સેક્ટરમાં બિઝનેસનો સતત વિસ્તાર કરી રહ્યા છે. એક રિપોર્ટ અનુસાર રિલાયન્સ રિટેલ લોટસ ચોકલેટ કંપની લિમિટેડમાં 51 ટકા હિસ્સો ખરીદવા તૈયાર છે અને આ માટે પ્રતિ શેર 113 રૂપિયાની કિંમત પણ નક્કી કરવામાં આવી છે.

આટલા રૂપિયામાં પૂરી કરશે ડીલ 
રિપોર્ટ અનુસાર રિલાયન્સ રિટેલ અને લોટસ ચોકલેટ વચ્ચે આ ડીલ લગભગ $8.94 મિલિયનમાં થવા જઈ રહી છે. અને એ મુજબ રિલાયન્સ રિટેલે લોટસ ચોકલેટમાં 51 ટકા હિસ્સો ખરીદવાની યોજના બનાવી છે. જણાવી દઈએ કે આ સાથે ઓપન ઓફર દ્વારા વધારાનો 26 ટકા હિસ્સો ખરીદવાની તૈયારી છે. હાલમાં ચોકલેટ કંપનીમાં પ્રમોટર અને ગ્રૂપ 72 ટકા હિસ્સો ધરાવે છે.

રિલાયન્સ કરી રહી છે સતત ખરીદી 
મુકેશ અંબાણીએ તાજેતરમાં રિટેલ સેક્ટરના બિઝનેસ વધારવાનો ઈરાદો વ્યક્ત કર્યો છે અને આ દિશામાં તેમની કંપની રિલાયન્સ સતત નવી કંપનીઓ ખરીદીને પોતાના ગ્રુપમાં સામેલ કરી રહી છે. લોટસ ચોકલેટ આ દિશામાં લેવાયેલું એક પગલું છે. જણાવી દઈએ કે ચોકલેટ કંપની લોટસની સ્થાપના વર્ષ 1988માં થઈ હતી.