મધ્યપ્રદેશના ગ્વાલિયરમાં મંત્રી પ્રદ્યુમનસિંહ તોમર પોતે સફાઈ કરતા નજરે પડ્યા. ગ્વાલિયરના બિરલા નગરમાં નિગમના કર્મચારીઓએ સફાઈ ન કરતાં નાળામાં પાણી ભરાઈ ગયું હતું. જેથી મંત્રી પ્રદ્યુમનસિંહ તોમર પોતે નાળામાં ઉતર્યા હતા. તેઓએ પાવડાથી સફાઈ કરીને નાળું સાફ કર્યું. જે મામલે બાદમાં નિગમ કમિશનરે 3 અધિકારીને સસ્પેન્ડ કરી દીધા હતા.
મંત્રી પ્રદ્યુમનસિંહ તોમરનો સફાઈ કરતો વીડિયો થયો વાઈરલ
સોશિયલ મીડિયા પર વાઈરલ થયેલા વીડિયોમાં જોઈ શકાય છે કે મંત્રીના હાથ પગમાં કીચડ ન લાગે તે માટે ગ્લવ્ઝ પણ નથી. મંત્રી તોમરે કહ્યું કે બિરલા નગર ન્યૂ કોલોનીની મહિલાઓની ફરિયાદ હતી કે તેમના ઘરમાં નાળાનું ગંદુ પાણી આવી જાય છે. નગર નિગમ કર્ચારીઓ ન પહોંચ્યા તો હું પોતે આવ્યો. ગંદગીના કારણે લોકો બીમાર થઈ રહ્યા છે અને હું તેમની તકલીફ જોઈ શકતો નથી.
ગ્વાલિયરને દિલ્હી જેવું નહીં થવા દઈએઃ તોમર
કર્મચારીઓને બોલાવીને સફાઈ કેમ ન કરાવી તેના બદલામાં મંત્રી તોમરે કહ્યું કે નિગમ કર્મચારીઓ કામ નહીં કરે તો તેમને સુધારવામાં આવશે. આ કોઈ સ્ટંટ નથી, હું રોડ પર સફાઈ નથી કરતો. હું એ વિસ્તારોમાં સફાઈ કરું છું જ્યાં ખરેખર ગંદકી છે. શનિવારે મંત્રીએ ગ્વાલિયર રેલવે સ્ટેશનના શૌચાલયની સફાઈ કરી હતી અને રેલવે અધિકારીઓને ઠપકો પણ આપ્યો હતો.