હવામાન વિભાગે ગુજરાત માટે આનંદના સમાચાર આપ્યાં છે. ગયા દિવસોમાં આવેલાં સાયક્લોન ‘વાયુ’ વાવાઝોડાથી ચોમાસું મોડું પડશે તેવી ધારણા વ્યક્ત કરવામાં આવી હતી. પરંતુ હવે હવામાન વિભાગે ગુજરાતમા વિધિવત ચોમાસાનો શરુઆત થઇ ગઇ છે તેવી જાહેરાત કરી છે.
અમદાવાદમાં પણ વરસાદ થશે તેમજ દક્ષિણ ગુજરાત અને પૂર્વ મધ્ય ગુજરાતમાં ભારે વરસાદની આગાહી કરી છે. ત્યારે હવામાન વિભાગે 48 કલાકે ભારે વરસાદની આગાહી કરી છે. દક્ષિણ, પૂર્વ અને મધ્ય ગુજરાતમાં ભારે વરસાદ પડી શકે છે. સાથે જ દરિયામાં ભારે પવન ફૂંકાવાને લઇ માછીમારોને દરિયો ન ખેડવાની સૂચના આપી છે.
રાજ્યના અનેક જિલ્લાઓમાં વહેલી સવારથી જ વરસાદી માહોલ જોવા મળી રહ્યો હતો. ત્યાર બપોર બાદ પણ રાજ્યમાં ક્યાંક અનરાધાર તો ક્યાંક ધોધમાર વરસાદ પડ્યો હતો. જેના કારણે રસ્તાઓ પર તો પાણી ફરી વળ્યા હતા. સાથે નદી-નાળાઓ પણ બે કાંઠે વહી રહ્યા છે. ત્યારે ક્યાં વરસાદ પડ્યો?
સાબરકાંઠાના પોશી પંથકમાં ધોધમાર વરસાદ
સાબરકાંઠાના પોશી પંથકમાં ધોધમાર વરસાદ વરસ્યો. ગાજવીજ સાથે ભારે વરસાદ થતા વાતાવરણમા ઠંડક પ્રસરી છે. આ વરસાદથી ખેડુતોમાં ખુશીનો માહોલ જોવા મળ્યો છે.
સાવરકુંડલાના વાશીયાળીની નદીમાં ઘોડાપુરઃ બળદગાડુ અને મહિલા તણાયા
અમરેલીના સાવરકુંડલાના વાશીયાળીમાં ભારે વરસાદ થયો છે. વાશીયાળીની સ્થાનિક નદીમાં ઘોડાપુર આવ્યું છે. નદીમાં પુર આવતાં બળદગાડુ અને મહિલા તણાઇ ગયા છે. તણાયેલી મહિલા અને બળદગાડુંને શોધવાની કાર્યવાહી હાથ ધરવામાં આવી છે. મામલતદાર, TDO, પોલીસ સહિતનું તંત્ર ઘટનાસ્થળે પહોચ્યું છે.
હડમતાલા ગામે એક ઇંચ જેટલો વરસાદ નોંધાયો
રાજકોટના ગ્રામ્ય વિસ્તારોમાં સતત બીજા દિવસે પણ વરસાદ જોવા મળ્યો હતો. સતત બીજા દિવસે ગોંડલના ગામોમાં છૂટો છવાયો વરસાદ પડ્યો હતો. ગોંડલના હડમતાલા ગામે એક ઈંચ જેટલો વરસાદ નોંધાયો હતો. મહત્વનું છે કે, વરસાદ પડવાથી હડમતાલાનો ચેકડેમ ઓવરફ્લો થયો હતો.
જામખંભાળિયા: અડધા કલાકમા બે ઇંચ વરસાદ ખાબક્યો
જામખંભાળિયા પંથકમાં વરસાદની ધમાકેદાર એન્ટ્રી થઈ છે. જામખંભાળિયાના કેશોદ ગામ આસપાસ વરસાદ વરસ્યો. અહીં અડધા કલાકમા બે ઇંચ વરસાદ પડતા ખેડૂતો ઝૂમી ઉઠ્યા છે. કારણ કે, સારા વરસાદને કારણે મગફળીના પાકને ફાયદો થઈ શકે છે.
જૂનાગઢઃ ખેડૂતોના ખેતરમાં કાચુ સોનું વરસ્યુ
જૂનાગઢ જિલ્લાના કેશોદ પંથકમાં 10 દિવસ બાદ ફરી મેઘાનું આગમન થયું. વરસાદના આગમન સાથે જ ખેડૂતોમાં ખુશીનો માહોલ છવાઈ ગયો છે. કારણ કે, વાવાણી બાદ ફરી વરસાદનું આગમન ખેડૂતો માટે કાચા સોના સમાન છે. મળતી માહિતી પ્રમાણે, અસહ્ય ઉકળાટ બાદ કેશોદ અને તેની આસપાસના ગ્રામ્ય વિસ્તારોમાં વરાસાદ શરૂ થયો હતો. દ્રષ્યોમાં જોઈ શકાય કે, કેશોદ પંથક પર કુદરત કેવી રીતે મહેરબાન બની વરસી રહ્યો છે.
જામનગરની ફલકુ નદી બે કાંઠે
જામનગર જિલ્લામાં વહેલી સવારથી જ ધોધમાર વરસાદ પડ્યો. જિલ્લાના ધ્રોલ અને લાલપુર પંથકમાં ગાજવીજ સાથે વરસાદ પડ્યો. જેના કારણે, નદીઓ બે કાંઠે વહી રહી છે. મળતી માહિતી પ્રમાણે, ધ્રોલ અને લાલપુરમાં 2 ઈંચ અને ગ્રામ્ય પંથકમાં 3 ઈંચ જેટલો વરસાદ પડ્યો. મેઘાની ધમાકેદાર એન્ટ્રી થતા સમગ્ર વિસ્તારના ખેડૂતોમાં ખુશીનો માહોલ છવાઈ ગયો છે.
ઉના, ગીર ગઢડા, તાલાળા સહિતના ગ્રામ્યપંથકમા વરસાદ
ગીર-સોમનાથમાં અચાનક વાતાવરણમાં પલ્ટો આવ્યો છે. 2 દિવસના ભારે બફારા બાદ આજે અચાનક વાતાવરણમાં પલ્ટો આવતા વરસાદ ખાબક્યો છે. અચાનક વાતાવરણમાં પલ્ટો આવતા સમગ્ર ગીર સોમનાથના વાતાવરણમાં ઠંડક પ્રસરી છે. તો બીજી બાજુ વરસાદનુ આગમન થતા ખેડૂતોમાં ખુશીની લહેર છવાઈ છે.