ગુજરાતમાં આવનારા બે દિવસ ભારેથી અતિભારે વરસાદની આગાહી છે. દરિયે કરંટ જોવા મળ્યો છે એટલું જ નહીં પરંતુ માછીમારોને દરિયો ન ખેડવા માટે વોર્નિંગ આપી દેેવાઈ છે.
હાલ રાજ્યમાં સિઝનનો 89 ટકા વરસાદ વરસ્યો
આગામી 5 દિવસ માછીમારોને દરિયો ન ખેડવા સૂચના
અમદાવાદમાં પણ મધ્યમથી ભારે વરસાદની આગાહી
ગુજરાત રાજ્યમાં આગામી બે દિવસ ભારે વરસાદ થઈ શકે છે. હવામાન વિભાગનું માનીએ તો 22 અને 23 ઓગસ્ટે અતિભારે વરસાદ થઈ શકે છે. આગામી 4 દિવસ સુધી હવામાન વિભાગે રાજ્યમાં વરસાદનું અલર્ટ આપ્યું છે. પણ 22 અને 23 ઓગસ્ટે વધુ વરસાદ થઈ શકે છે.
હાલ રાજ્યમાં સિઝનનો 89 ટકા વરસાદ થઈ ગયો છે. તો બીજી તરફ આગામી 5 દિવસ માછીમારોને દરિયો ન ખેડવા માટે સૂચના આપવામાં આવી છે.
અમદાવાદમાં પણ મધ્યમથી ભારે વરસાદ થઈ શકે છે. 22 ઓગસ્ટે અમદાવાદ, ગાંધીનગર, અરવલ્લી, સાબરકાંઠા, બનાસકાંઠા, મહેસાણા, બનાસકાંઠા, પાટણમાં વરસાદ થઈ શકે છે. તો 23 ઓગસ્ટે સુરેન્દ્રનગર, સૌરાષ્ટ્રના કેટલાક વિસ્તાર અને કચ્છમાં પણ ભારે વરસાદ થઈ શકે છે.
રાજ્યમાં વરસાદી માહોલ યથાવત છે. રાજ્યમાં અત્યાર સુધી 88.55 ટકા વરસાદ નોંધાયો છે. ઓગસ્ટ મહિનામાં સૌથી વધુ સરેરાશ 16 ઇંચ વરસાદ પડ્યો છે. અને અત્યાર સુધી સરેરાશ 30 ઇંચ જેટલો વરસાદ નોંધાયો છે. રાજ્યમાં 52 તાલુકામાં સરેરાશ 40 ઇંચ કરતા વધુ વરસાદ પડ્યો છે. જ્યારે 118 તાલુકાઓમાં સરેરાશ 20થી 40 ઇંચ વરસાદ અને 77 તાલુકાઓમાં સરેરાશ 10થી 20 ઇંચ વરસાદ પડ્યો છે. જ્યારે 4 તાલુકાઓમાં 10 ઇંચ કરતા ઓછો વરસાદ નોંધાયો છે.
સુરતમાં ખાડી પૂરના કારણે ઠેર ઠેર પાણી ભરાઇ ગયા છે. પાંડેસરા GIDCમાં વરસાદી પાણી ફરી વળ્યા છે. GIDCમાં વરસાદી પાણી ફરી વળતા વાહન વ્યવહાર બંધ થઇ ગયો છે. પાંડેસરાના નાગસેનનગર, પ્રેમનગર, સીતાનગરમાં પાણીમાં ભરાવો થયો છે. રસ્તા પર પાણી ભરાતા લોકોને મુશ્કેલી પડી રહી છે.
સુરતનું પાંડેસરા બેટમાં ફેરવાઇ ગયું છે. પાંડેસરામાં પાણી ઘૂસા જતા લોકોનું સ્થળાંતર કરવામાં આવ્યું છે. અને હજુ પણ 500 જેટલા ઘરમાં પાણી ભરાયેલા છે. જેને લઇ ફસાયેલા લોકોનું ફાયરની ટીમ દ્વારા રેસ્ક્યૂ કરવામાં આવી રહ્યું છે. અને સ્થાનિક કોર્પોરેટર, ધારાસભ્ય દ્વારા લોકોને ફૂડ પેકેટનું વિતરણ કરવામાં આવી રહ્યું છે.
વલસાડના ઉમરગામમાં ભારે વરસાદ પડ્યો છે. ઉમરગામમાં 4 ઇંચથી વધુ વરસાદ પડતા નદી-નાળાઓ છલકાયા છે. સંજાણથી તલાસરી જતા માર્ગ પર વારોલી ખાડી બે કાંઠે વહી રહી છે. અને ખાડી પર કોઝવે પરના પાણી ફરી વળ્યા છે. જેને લઇ વાહનવ્યવહારને અસર પડી છે.
રાજ્યમાં વરસાદી માહોલ યથાવત છે. ત્યારે ઉપરવાસમાં વરસાદથી ભાદર-1 ડેમ ઓવરફ્લો થયો છે. હાલ ભાદર-1 ડેમના 2 દરવાજા 1 ફૂટ ખોલવામાં આવ્યા છે. ભાદર-1 ડેમ છલકાતા હવે સિંચાઇ અને પીવાના પાણીના પ્રશ્નનું નિરાકરણ આવ્યું છે. અને હજારો ખેડૂતોને ફાયદો થશે. રાજકોટ, ગોંડલ, જેતપુર સહિતમાં પીવાના પાણીની સમસ્યા ઉકેલાઇ જશે. જૂથ યોજનાના 90 ગામોને પીવાનું પાણી મળશે.
નર્મદા જિલ્લામાં ચોપડવાવ ડેમ ઓવરફ્લો થયો
નર્મદા જિલ્લાના સાગબારા તાલુકાના નાના ચોપડવાવ ગામ પાસે આવેલ ચોપડવાવ ડેમ ઓવરફ્લો થયો છે. 187.40 મીટરની પૂર્ણ સપાટી વટાવીને 187.45 મીટરે ભરાતા ચોપડવાવ ડેમ છલકાયો છે. હાલ ચોપડવાવ ડેમ 5 સેમી ઓવરફ્લો થયો છે. ડેમમાં 12.05 મિલિયન ક્યુબીક મીટર પાણીનો જથ્થો સંગ્રહ થયેલો છે. જેના કારણે ચોપડવાવ સિંચાઇ યોજનામાં સાગબારા તાલુકાના કોડબા, ચોપડવાવ, ચિત્રાકેવડી, સીમઆમલી, ભવરીસવર, પાનખલા, કેલ, સાગબારા, કનખાડી, મોરાવી, સહિત કુલ 19 જેટલા ગામોને ખરીફ-રવિ અને ઉનાળુ સિઝન માટે સિંચાઇના પાણીનો ફાયદો થશે.
નર્મદાના ઢેફા ગામમાં મેણ નદી બે કાંઠે વહી રહી છે. નદીમાં પાણીની આવક થતા ગામ સંપર્ક વિહોણું બન્યું છે. ગામના લોકો જીવના જોખમે નદી પાર કરવા મજબૂર થયા છે. ઢેફા ગામમાં મોટાભાગના આદિવાસી સમાજના લોકો રહે છે અને ગામની વસ્તી 462 છે. જે તમામ પશુપાલન પર નિર્ભર છે. ત્યારે લોકોએ જીવના જોખમે દૂધ ભરવા જવું પડે છે. ત્યારે મેણ નદીમાં પાણીનો પ્રવાહ વધારે હોવાથી બે ગામનો સંપર્ક કપાઇ ગયો છે. ત્યારે લોકો માગ કરી રહ્યા છે કે તંત્ર દ્વારા સમસ્યાનો ઉકેલ લાવવામાં આવે અને બ્રિજ બનાવામાં આવે જેથી લોકોની મુશ્કેલીઓ ઓછી થાય.
મહેસાણા જિલ્લા છેલ્લા 5 દિવસ થી સાર્વત્રિક વરસાદ
મહેસાણા જિલ્લા છેલ્લા 5 દિવસ થી સાર્વત્રિક વરસાદ થી ખેતી ને ભારે ફાયદો ત્યારે આજે વહેલી સવાર થી સમગ્ર જિલ્લા માં મેઘરાજા મહેરબાન થયા હતા.જોકે જિલ્લા માં મહેસાણા વિસ્તાર મેઘરાજા સવાર થી ધીમીધારે વરસવા નું શરુ કર્યા બાદ રૌદ્ર રૂપ ધારણ કર્યું હતું અને વીજળી ના કડાકા-ભડાકા સાથે મેઘરાજા તોફાની બેટિંગ કરતા મહેસાણા શહેર ના અનેક વિસ્તારો માં જળ બંબાકાર થઇ ગયા હતા.સવાર પ્રથમ બે કલાક માં પોણો ઇંચ ઇંચ વરસાદ બાદ મેઘરાજા દોઢ કલાક તોફાની બેટિંગ કરતા 3 ઇંચ વરસાદ પડયો હતો.આથી મહેસાણા થી દિલ્લી અને મહેસાણા થી અમદાવાદ તરફ જતો મુખ્ય હાઇવે પાણી માં ગરકાવ થઇ ગયો હતો.આ ઉપરાંત શહેર ના ગોપીનાળા અને ભમ્મરિયા નાળા પાણી માં ગરકાવ થઇ જતા વાહનચાલકો મુશ્કેલી માં મુકાયા હતા.આમ,મહેસાણા માં જળ બંબાકાર ના કારણે લોકો ની રોજિંદી કામગીરી પણ ખોરવાઈ ગઈ હતી.
પાટણમાં ભારે વરસાદથી અનેક વિસ્તારોમાં ભરાયા પાણી
પાટણમાં ભારે વરસાદના કારણે અનેક વિસ્તારોમાં પાણી ભરાઇ ગયા છે. ત્યારે પાટણમાં વરસાદથી થયેલા નુકસાનીનો વીડિયો સામે આવ્યો છે. પાટણમાં અનેક જગ્યાએ પાણી ભરાઇ જતા લોકોને મુશ્કેલી પડી રહી છે. અને પાટણના સોનીવાડા વિસ્તારમાં પાણીના તેજ પ્રવાહમાં વાહનો પણ તણાતા જોવા મળી રહ્યા છે.
વરસાદ પડતાં ખેડૂતોના પાકને જીવતદાન મળશે.
બોટાદના રાણપુર સહિત ગ્રામ્ય વિસ્તારમાં ધોધમાર વરસાદ થયો છે. માલધારી ચોક, પોલીસ સ્ટેશન રોડ સહીત ફરીના વિસ્તારોમાં પાણી ફરી વળ્યાં છે. રાણપુરના નાગનેશ સહિતના ગામોમાં ધોધમાર વરસાદ થયો છે. અને આ નાગનેશ ગામે આવેલી ભાદર નદીમાં પુર આવ્યા છે. વરસાદ પડતાં ખેડૂતોના પાકને જીવતદાન મળશે.
નીચાણવાળા વિસ્તારોમાં પાણી ભરાયા
સાબરકાંઠા જિલ્લામાં ધોધમાર વરસાદ થયો છે. પોશીના, લાંબડીયા, ખેડબ્રહ્મામાં વરસાદ થયો છે.ધોધમાર વરસાદથી રોડ-રસ્તા પર નદી જેવા દ્રશ્યો સર્જાયા છે. નીચાણવાળા વિસ્તારોમાં પાણી ભરાય ગયા છે.