આગાહી / ગુજરાતમાં સાયક્લોનિક સિસ્ટમ સક્રિય, આગામી 5 દિવસ ભારે વરસાદની શક્યતા: જયંત સરકાર

• ગુજરાત રાજ્યમાં એક સાયક્લોનિક સિસ્ટમ સક્રિય થઈ છે
• સાયક્લોનિક સિસ્ટમ સક્રિય થતા 5 દિવસ વરસાદની શક્યતા
• રાજ્યના મોટા ભાગના વિસ્તારમાં આગામી 5 દિવસ વરસાદની શક્યતા

રાજ્યમાં પવન સાથે ભારે વરસાદની શક્યતા સેવાઈ રહી છે. આજે મધ્યગુજરાતમાં વરસાદની પધરામણી થઈ જશે. આજે બપોર બાદ અમદાવાદમાં વરસાદની શક્યતા. દરરોજ એક-બે જિલ્લાઓમાં ભારે વરસાદની શક્યતા સેવાઈ રહી છે.  

ગુજરાતમાં સૌરાષ્ટ્ર, કચ્છમાં પવન સાથે ભારે વરસાદની શક્યતા છે. અમદાવાદ, ગાંધીનગર, ખેડામાં સામાન્યથી મધ્યમ વરસાદ થઈ શકે છે. જ્યારે મધ્ય ગુજરાતમાં સામાન્યથી મધ્યમ વરસાદની શક્યતા છે. દક્ષિણ ગુજરાત અને સૌરાષ્ટ્રમાં શુક્રવારે ભારે વરસાદ થઈ શકે છે.

મધ્યપ્રદેશથી ગુજરાત  સુધી રચાયેલા થંડરસ્ટોર્મના કારણે રાજ્યભરમાં વરસાદી માહોલ જોવા મળી રહ્યો છે. જામનગરના જામજોધપુરમાં પણ મેઘરાજાએ જોરદાર એન્ટ્રી કરી હતી. ધોધમાર વરસાદના કારણે જામજોધપુરમાં રસ્તા પર પાણી ભરાઇ ગયા ગચા છે જેના કારણે વાહનચાલકો મુ્શ્કેલીનો સામનો કરી રહ્યાં છે.

રાજ્યમાં અનેક જગ્યાએ મેઘરાજાની એન્ટ્રી થઇ ગઇ છે. ત્યારે અમરેલીના ખાંભા અને ગીર પંથકમાં ધોધમાર વરસાદ પડ્યો છે. ખાંભાના નાનુડી, ઉમરીયા, ભાડ ગામે વરસાદ આવ્યો છે. ભારે વરસાદના કારણે ખાંભામાં આવેલી નદીમાં પૂર આવ્યું છે. તો મિતીયાળા જંગલ વિસ્તારમાં પણ ભારે વરસાદ વરસ્યો છે

જૂનાગઢમાં વરસાદી માહોલ જામ્યો છે. જૂનાગઢના માણાવદરમાં ધોધમાર વરસાદ પડ્યો છે. ભારે વરસાદના કારણે રોડ રસ્તા પર પાણી ભરાયા છે. તો સારા વરસાદથી ખેડૂતોમાં ખુશીની લાગણી જોવા મળી રહી છે.

ભારે વરસાદથી છોટાઉદેપુરની ઓરસંગ નદીમાં નવા નીર આવ્યા છે. જિલ્લામાં અને ઉપરવાસમાં વરસાદથી નવા નીર આવ્યા છે. છોટાઉદેપુર અને બોડેલી પંથકમાં ગતરાતે ભારે વરસાદ પડ્યો હતો. જેના કારણે જીવાદોરી સમાન ગણાતી ઓરસંગ નદી બે કાંઠે વહી રહી છે.

ગીર સોમનાથના તાલાલા ગીરમાં પણ ધોધમાર વરસાદ પડ્યો છે. ભારે વરસાદથી તાલાલા ગીરની હિરણ નદીમાં નવા નીર આવ્યા છે. તાલાલા શહેરના મુખ્ય માર્ગો પર વરસાદી પાણી ફરી વળ્યાં છે...ભારે વરસાદથી ખેડૂતોમાં ખુશીનો માહોલ જોવા મળી રહ્યો છે.

રાજકોટ સહિત સૌરાષ્ટ્રમાં વહેલી સવારથી જ વાદળછાયું વાતાવરણ જોવા મળી રહ્યું હતું. વાદળછાયા વાતાવરણ વચ્ચે પોરબંદરમાં બરડા પંથકમાં મુશળધાર વરસાદ વરસ્યો હતો. ફટાણા ગામે ધોધમાર 1 ઈંચ વરસાદ પડ્યો હતો. મુશળધાર વરસાદના કારણે ખેતરોમાં પાણી ભરાઇ ગયા છે.

અમરેલીના વડીયા અને ઉપરવાસમાં ધોધમાર વરસાદના કારણે ઉનાળાની શરૂઆતમાં જ ખાલી થયેલ સુરવો ડેમમાં નવા નીર આવ્યાં છે. સુરવો ડેમમાં સાડાચાર ફૂટ નવા નીર આવ્યાં છે.  સુરવો ડેમમાં નીર આવતા ખાસ કરીને વડિયા અને નીચાણવાળા વિસ્તારોના ખેડૂતોને  ફાયદો થશે.

રાજ્યમાં વરસાદી માહોલ છવાયો છે. ત્યારે પંચમહાલ જિલ્લાના મોટાભાગના તાલુકામાં વરસાદ પડ્યો છે. ગોધરા, કાલોલ, હાલોલ,જાંબુઘોડા, ઘોઘંબા, શહેરા અને મોરવા હડફમાં ધોધમાર વરસાદ વરસ્યો છે. ભારે વરસાદના કારણે કરડ નદીમાં આવેલા ચેકડેમોમાં નવા નીર આવ્યા છે. જેને લઇને લોકોમાં આનંદની લાગણી જોવા મળી રહી છે. એક જ રાતમાં 155 ક્યુસેક પાણીની આવક થતા 15 સેમી જેટલો વધારો થયો છે. જેથી ખેડૂતો પણ ખુશખુશાલ થઇ ગયા છે. 

જેતપુરમાં સતત ચોથા દિવસે વરસાદ વરસતાં ખેડૂતોમાં ખુશી જોવા મળી રહી છે. જેતપુરમાં ભારે પવન સાથે ધોધમાર વરસાદ પડતાં રસ્તા પર  ઠેર ઠેર પાણી ભરાઇ ગયા હતા. જો કે વાવણી લાયક વરસાદ સમયસર થઇ જતાં ખેડૂત વર્ગમાં ખુશી જોવા મળી રહી છે. વલસાડના વાપીમાં પણ છૂટછવાયો વરસાદ જોવા મળ્યો હતો. ધોધમાર વરસાદ પડતાં રસ્તા પર પાણી ભરાઇ ગયા છે. જેથી વાહનચાલકોને મુસ્કેલીનો સામનો કરી રહ્યાં છે,.

બોટાદ જિલ્લામાં બુધવારે કેટલાક વિસ્તારમાં વરસાદ વરસ્યો.. ગઢડા તાલુકામાં રાતથી સવાર સુધીમાં પોણા ચાર ઈંચ વરસાદ નોંધાયો. કેરાળા ગામમાં ભારે વરસાદ થતા ચેકડેમ છલકાયા છે.. વરસાદ થતા નદીઓમાં નવા નીર આવ્યા છે