ONGC Stake Sale / મોદી સરકારનો મોટો નિર્ણય: ONGCની 1.5 ટકા ભાગીદારી વેચી દેવાશે, જાણો કેટલાં હજાર કરોડ ભેગાં કરવાનો પ્લાન

• સરકાર ONGCનો 1.5 ટકા હિસ્સો વેચી દેશે
• સરકારની સેલ ઓફર 30 માર્ચે ખુલશે અને 31 માર્ચે બંધ થશે
• છૂટક રોકાણકારો 2 લાખ સુધીની બોલી લગાવી શકે છે

ઓઇલ એન્ડ નેચરલ ગેસ કોર્પોરેશન (ONGC) એ મંગળવારે શેરબજારને આપેલી માહિતીમાં જણાવ્યું હતું કે, સરકારની સેલ ઓફર 30 માર્ચે ખુલશે અને 31 માર્ચે બંધ થશે.

30-31 માર્ચે વેચવામાં આવશે શેર

કંપનીએ જણાવ્યું હતું કે, "સરકારે 30 માર્ચ, 2022નાં રોજ કંપનીના 9,43,52,094 શેર નોન-રિટેલ રોકાણકારોને અને 31મી માર્ચે રિટેલ રોકાણકારોને વેચવાનો પ્રસ્તાવ મૂક્યો છે. આ સાથે ઉંચી બોલી આવવા પર 9,43,52,094 વધારાના ઇક્વિટી શેર વેચવાનો વિકલ્પ પણ રાખવામાં આવ્યો છે.''

159 રૂપિયા છે શેરની કિંમત

તમને જણાવી દઈએ કે, કંપનીએ વેચાણ ઓફરની કિંમત 159 રૂપિયા પ્રતિ શેર રાખી છે. ONGCએ મંગળવારે શેરબજારને જણાવ્યું હતું કે, આ કિંમત BSE પર મંગળવારનાં કંપનીના શેરની બંધ કિંમત 171.05 રૂપિયા કરતા સાત ટકા ઓછી છે.

ONGC પાસે છે 60.41 ટકા હિસ્સો

સરકાર ONGCમાં 60.41 ટકાનો હિસ્સો ધરાવે છે. કંપની દેશના અડધા તેલ અને ગેસનું ઉત્પાદન કરે છે. ઓફર ફોર સેલમાં, 25 ટકા શેર મ્યુચ્યુઅલ ફંડ અને વીમા કંપનીઓ માટે જ્યારે 10 ટકા રિટેલ રોકાણકારો માટે રાખવામાં આવ્યાં છે.

2 લાખ સુધીની બોલી લગાવી શકે છે

છૂટક રોકાણકારો રૂ. 2 લાખના મૂલ્ય સુધીના શેર માટે બોલી લગાવી શકે છે. ONGCનાં કર્મચારીઓ 5-5 લાખ રૂપિયા સુધીના શેર માટે અરજી કરી શકે છે.