અસ્તિત્વ જોખમમાં / ગુજરાતના આ 2 ગામની માઇન્સમાં પ્રચંડ ધડાકાથી લોકો હચમચી ઉઠ્યા, તંત્ર બન્યું બહેરુ

• અરવલ્લી જિલ્લાના શામપુર અને નવા ગામના લોકોની વ્યથા
• ડુંગરની તળેટીમાં આવેલી બે માઇન્સમાં વારંવાર કરાય છે ધડાકા

અરવલ્લી જિલ્લાના શામપુર અને નવા એમ બે ગામના લોકો ડુંગરની તળેટીમાં આવેલી બે માઇન્સમાં થતા બ્લાસ્ટથી હચમચી ઉઠ્યા છે વારંવાર કરાતા ધડાકાઓથી આ બન્ને ગામના લોકોના કાચા પાકા મકાનો ને વ્યાપક પ્રમાણમાં નુકસાન થઈ રહ્યુ હોવાની સાથે ખેતી પાકોને પણ માઇન્સમાંથી ઊડતી ડસ્ટ ના કારણે નુકસાન થઈ રહ્યું છે.વહીવટીતંત્ર દ્વારા તાકીદે આ બન્ને માઇન્સને બંધ કરાવવામાં આવે તેવી માંગ બન્ને ગામના ગ્રામજનો કરી રહ્યા છે

ધડાકાઓથી મકાનોની દીવાલોમાં મોટી મોટી તિરાડો પડી 
શામપુર ગામ સુવિખ્યાત અને પ્રાચીન એવા ડુંગર પર વિરાજમાન મેરાયા ના કારણે સમગ્ર રાજ્યમાં આગવી ઓળખ ધરાવે છે પરંતુ આ મેરાયું અને શામપુર તેમજ નજીકનું નવા નામનું ગામ ડુંગરની તળેટીમાં આવેલી ક્વોરીઓમાં કરાતા પ્રચંડ ધડાકાઓથી છેલ્લા કેટલાક સમયથી પોતાના અસ્તિત્વ સામે ઊભા થયેલા ખતરાથી ફફડી રહ્યા છે.અવારનવાર બન્ને ક્વોરીઓમાં કરાતા ધડાકાઓના કારણે નજીકના વિસ્તારમાં આવેલા અનેક મકાનોની દીવાલોમાં મોટી મોટી તિરાડો પડી ગઈ છે તો કાચા મકાનો તો એટલા હલબલી ચુક્યા છે કે ક્યારે જમીનદોસ્ત થઈ જાય એ નક્કી જ નથી.

યુક્રેન યુદ્ધ જેવી અનુભૂતિ કરી રહ્યા છે લોકો
શામપુર ડુંગરની તળેટીમા આવેલા મકાનો,મંદિર અને ડુંગર પરનું મેરાયું સ્થાનિકો માટે અનેક પ્રકારનું મહત્વ ધરાવે છે પરંતુ ડુંગરની તળેટીમાં ક્વોરીઓ ચાલુ થતા એકસાથે 30 થી 35 ધડાકાઓ ક્વોરી માલિકો દ્વારા કરવામાં આવતા ગ્રામજનોને યુક્રેન યુદ્ધ ની અનુભૂતિ કરી રહયા હોવાનું લાગી રહ્યું છે.બ્લાસ્ટ થતા ઘરનું રાચ રચિલું અને અભરાઈ પર મુકેલા વાસણો પણ ધણધણી ઉઠી નીચે પડી જાય છે.આ સંજોગોમાં માનવીય અને પશુઓના જાનમાલ ની સુરક્ષા સામે પણ મોટો સવાલ ઉભો થઇ રહ્યો છે.

બન્ને ક્વોરીઓ દૂર કરવામાં આવે તેવી ગ્રામજનોની માંગ
શામપુર અને નવા એમ બે ગામના સ્થાનિકો દ્વારા સમગ્ર મામલે સ્થાનિક ગ્રામપંચાયત્ન, તાલુકા વહીવટીતંત્ર,જિલ્લા વહીવટીતંત્ર તેમજ રાજ્ય સરકાર સમક્ષ બન્ને ક્વોરીઓ ને દૂર કરવા તેમજ સ્થાનિકોને શારીરિક અને માનસિક તેમજ આર્થિક ત્રાસથી ઉઘારવા અનેક રજુવાતો કરવામાં આવી છે ત્યારે તંત્ર અને કહેવાતી સંવેદનશીલ સરકાર સ્થાનિકો ની વહારે ચડે તેવી આજીજી ગ્રામજનો દ્વારા કરવામાં આવી રહી છે