હવામાન આગાહી / નવરાત્રીમાં વરસાદ પડે નહીં તો સારું..! બંગાળની ખાડીમાં  લો પ્રેશર સજાર્યું, ગુજરાતમાં આ વિસ્તારોમાં વરસાદની શક્યતા

• ગુજરાતમાં વરસાદને લઈ હવામાન વિભાગની આગાહી
• દક્ષિણ ગુજરાતમાં વરસાદની સંભાવના

ગુજરાતમાં ભારે વરસાદની શકયતા નહિવત જોવા મળી રહી છે. 23, 24, 25 અને 26 સપ્ટેમ્બરે દક્ષિણ ગુજરાતમાં વરસાદ રહેશે. પરંતુ બીજી તરફ કચ્છમાં ચોમાસું વિદાય લે તેવી શરૂઆત થઈ ચૂકી છે. ઉત્તર ગુજરાત અને દક્ષિણ ગુજરાતના ખેલૈયાઓ માટે ફરી એક વાર માઠા સમાચાર મળી રહ્યાં છે. પહેલાંની હવામાન વિભાગની આગાહી મુજબ નવરાત્રિમાં વરસાદનું જોખમ ઘટ્યું હતું. જેના કારણે ખેલૈયા ખુશખુશાલ હતા પરંતુ હવે હવામાન વિભાગ દ્વારા આગાહી બદલાઈ છે.

નવરાત્રિના દિવસો દરમ્યાન સામાન્ય વરસાદની આગાહી
હાલની આગાહી મુજબ નવરાત્રિમાં સામાન્ય વરસાદ તો રહેશે જ પણ જતાં જતાં વરસાદ ઉત્તર ગુજરાત અને દક્ષિણ ગુજરાતમાં વરસી જશે. નવરાત્રિના દિવસો દરમ્યાન જ સામાન્ય વરસાદની આગાહી હવામાન વિભાગ દ્વારા કરવામાં આવી છે. બંગાળની ખાડીમાં વેસ્ટ સેન્ટ્રલ દિશામાં સર્જાયેલા લો પ્રેશરની અસરના ભાગરૂપે દક્ષિણ ગુજરાતમાં વરસાદી માહોલ બનશે. જેમાં આજે અને  24 સપ્ટેમ્બરના રોજ દક્ષિણ ગુજરાતમાં વાવાઝોડા સાથે વરસાદ વરસવાની આગાહી કરવામાં આવી છે. અરવલ્લી, મહિસાગર, દાહોદ, દમણ, નર્મદા, તાપી, ડાંગ, નવસારી, વલસાડમાં વરસાદ પડી શકે છે.

હાલ નર્મદા ડેમની સપાટી 138.62 મીટર
ખેડૂતો માટે સારી વાત એ છે કે નર્મદા ડેમમાં પાણીની આવક વધી છે. મધ્યપ્રદેશના ઓમકારેશ્વર ડેમમાંથી ફરી પાણી છોડાયું છે. ઉપરવાસથી 1.50 લાખ ક્યુસેક પાણી છોડાતા નર્મદા ડેમના  23 દરવાજા ખોલીને 75 હજાર ક્યુસેક પાણી છોડાયું છે. ડેમમાંથી પાણીની કુલ જાવક 1.20 લાખ ક્યુસેક છે. હાલ નર્મદા ડેમની સપાટી 138.62 મીટરે છલોછલ ભર્યો છે. તો બીજી તરફ છેલ્લા 3 દિવસથી વરસાદ બંધ થતાં ઉકાઈ ડેમમાં પાણીની આવક ઘટી છે. ઉકાઈ ડેમના તમામ દરવાજા બંધ કરવામાં આવ્યા છે. હાલ ઉકાઈ ડેમની સપાટી 342.72 ફૂટ પર છે. જે ભયજનક સપાટીથી અઢી ફૂટ દૂર છે. 

કચ્છમાં મંગળવારથી ચોમાસાની વિદાયની શરૂઆત થઈ ગઈ
ઉલ્લેખનીય છે કે, કચ્છમાં હવામાન ખાતાની આગાહી પ્રમાણે મંગળવારથી ચોમાસાની વિદાયની શરૂઆત થઈ ગઈ છે. ભારતીય હવામાન વિભાગે 2022ના નૈઋત્ય ચોમાસાની દેશમાંથી સૌપ્રથમ વિદાય પશ્ચિમી રાજસ્થાન અને કચ્છના વાયવ્ય ખૂણેથી થઇ ગઇ હોવાની જાણકારી આપી હતી. મોન્સુન 2022ની વિદાયની ટાઇમ લાઇન કચ્છના લખપત તાલુકા સુધી બતાવાઇ છે. કચ્છમાં ચોમાસાના 86 દિવસમાં સરેરાશ 456 મિમી વરસાદની સામે અધધ 845 મિમી વરસાદ નોંધાયો છે.