ફેરબદલ / ચૂંટણી પહેલા મોટાપાયે અધિકારીઓની ફેરબદલ, GAS કેડર-વનવિભાગમાં 31 મોટા અધિકારીઓની એક ઝાટકે બદલી

• ગુજરાતમાં બદલીઓનો દૌર શરુ
• GAS કેડર-વન વિભાગમાં બદલીઓ 
• ગંજીફો ચીપે છે રાજ્ય સરકાર 

ગુજરાત સરકારે વિધાનસભા ચુંટણી પહેલા ગંજીફો ચીપતા હોય તેમ બદલીરૂપી પતા ફેંક્યા છે .સરકારે બે અલગ-અલગ વિભાગ મળીને કુલ 31 અધિકારીઓની બદલી કરી નાખી છે. જેમાં GAS કેડરના ત્રણ અધિકારીઓ છે.અને વનવિભાગમાં સામૂહિક રીતે 28 અધિકારીઓની બદલીના હૂકમ કરી દીધા છે.

GAS કેડરમાં કોણ ? ક્યાં ?
ગુજરાત સરકારે વિધાનસભા 2022ની ચૂટણીઓને ધ્યાનમાં રાખી હળવે હાથે બદલીનો દૌર શરુ કર્યો હોય તેમ લાગી રહ્યું છે. GAS કેડરના ત્રણ અધિકારીઓથી બદલીની શરૂઆત કરાઈ છે. જેમાં કચ્છ ભૂજના અધિક નિવાસી કલેકટર કે.એસ.ઝાલાની બદલી વડોદરાના અધિક નિવાસી કલેકટર તરીકે કરવામાં આવી છે.તો DRDAના ડિરેક્ટર એચ એમ જાડેજાની બદલી ભૂજના નવા અધિક કલેકટર તરીકે કરવામાં આવી છે. જ્યારે,ગાંધીનગરના ફાયર વિભાગના ડેપ્યુટી ડાયરેકટર એમ પી પંડ્યાની બદલી જામનગરના અધિક નિવાસી કલેકટર તરીકે કરવામાં આવી છે.

વનવિભાગમાં કોણ ? ક્યાં ?

બીજી તરફ,વનવિભાગમાં પણ સરકારે સપાટો બોલાવતી હોય તેમ 28 જેટલા રેંજ અધિકારીઓની સાગમટે બદલી કરી નાખી છે.જેમાં મુખ્યત્વે જીગર પટેલને બળ સરોવર પશ્ચિમ રેન્જમાં,ડી જી ગઢવી ભાવનગરના વેળાવદાર રેન્જમાં સુનીલ દેસાઈને વાંસદ નેશનલ પાર્કમાં અધિક્ષક RFO તરીકે અને જીગર ડાંગરને મરીન નેશનલ પાર્ક ખંભાળીયા રેન્જમાં નિમણૂક આપવામાં આવી છે.

રાજ્ય સરકારે અત્યારે ભલે હળવે હાથે બદલીનો દૌર સંભાળ્યો હોય,પરંતુ આગામી સમયમાં સરકારી વિભાગ અને ખાસ કરીને પ્રસાશનિક વહીવટમાં મોટાપાયે ફેર બદલના ભણકારા આ બદલીઓ સાથે જ સંભળાઈ રહ્યા છે.