પ્રયોગ / મકાનની અગાશી પર મેંગો ગાર્ડન, એક આંબા દીઠ આ વ્યક્તિ કમાય છે રૂ.600થી 4000

ફળોનાં રાજા કેરીની વાતો પણ હંમેશા નિરાળી હોય છે. આમ તો કેરીનાં મોટા મોટા બાગ હોય છે અને તેમાં કેરીનો મબલક પાક આવતો હોય છે. પરંતુ તમે ક્યારેય કોઈ મકાનની અગાશી પર કેરીનો પાક લેવાતો હોય તેવું સાંભળ્યું છે ખરું? જો ન સાંભળ્યું હોય તો આજે અમે તમને અગાશી પર આંબાનો એ નજારો બતાવીશું. જેને જોઈને તમારું મન પણ એ કેરી ખાવા લલચાશે ક્યાં લેવાય છે અગાશી પર કેરીનો મબલક પાક. તે જોઈએ આ રિપોર્ટમાં.

શું તમે ક્યારેય સાંભળ્યું છે કે મકાનની અગાશી પર કેરીનો બાગ હોય. પરંતુ આજે અમે તમને બતાવીશું. કેરળનાં કોચીમાં રહેતાં જોસેફ નામનાં વ્યક્તિએ કમાલ કરી છે. પોતાનાં મકાનની અગાશીને રીતસરની બગીચામાં ફેરવી નાખી છે. એટલું જ નહીં ધાબા પર બનાવેલાં આ બગીચામાં જોસેફ 40 જાતની કેરીઓ ઊગાડે છે. તેનાં આ નવતર પ્રયોગથી કૃષિજગત અને દેશભરનાં લોકોનું પણ ધ્યાન ખેંચાયું છે.

જોસેફનાં ધાબા પર જ્યાં જોશો ત્યાં તમને માત્ર કેરી જ જોવાં મળશે. તો ક્યાંક વૃક્ષ પર મોર ફૂટેલાં પણ જોઈ શકાય છે. માત્ર 4 ફૂટ લાંબા છોડ પર કેરીની રીતસરની લૂમ જોવાં મળે છે. હવે એ પણ જાણી લો કે જોસેફે કેરીનાં છોડ રોપવામાં 200 લિટરનાં કન્ટેનરનો ઉપયોગ કર્યો છે અને માત્ર 10 મિનિટ જ છોડને પાણી પીવડાવે છે. તો પણ મબલક પાક મેળવે છે.

એક આંબા દીઠ કમાય છે 600થી 4000 રૂપિયાઃ
હવે એ પણ જાણી લો કે ધાબા પર બનાવેલાં કેરીનાં બગીચાથી જોસેફને સારી એવી આવક થાય છે. આંબાનાં એક વૃક્ષ દીઠ તે રૂપિયા 600થી 4 હજાર રૂપિયા કમાઇ લે છે. મજાની વાત એ છે કે જોસેફે ખેતીવાડીની વિધિવત કોઈ તાલીમ લીધી નથી. યૂ ટ્યુબમાં જોઈ જોઈને કેરીનો પાક કઈ રીતે લેવો જોઈએ તેનું શિક્ષણ મેળવ્યું છે. 22 વર્ષ પહેલાં પેટ્રીશિયા નામની કેરીની જાત ઉગાડવાની શરૂ કરી હતી. જેનું ફળ મધ જેવું મીઠું છે. કેરીની આ જાતનું નામ તેમણે પોતાની પત્ની પરથી રાખ્યું છે.