ઘાતક કોરોના વાઈરસ દુનિયાના ૧૭૬ દેશને પોતાના ભરડામાં લઈ ચૂક્યો છે અને આ મહામારીના ખપ્પરમાં અત્યાર સુધીમાં લગભગ ૯,૦૦૦ જેટલી જિંદગી હોમાઈ ગઈ છે ત્યારે આ ખતરનાક વાઈરસ ફેલાવવાના મુદ્દે ચીન અને અમેરિકા આમનેસામને આવી ગયાં છે. આમ તો શરૂઆતથી જ કોરોના વાઈરસ ચીનનું જ પાપ હોવાના આક્ષેપ થઈ રહ્યા હતા અને તેમાં અમેરિકી પ્રેસિડેન્ટ ડોનાલ્ડ ટ્રમ્પે ‘કોવિડ-૧૯’ને ‘ચાઈનીઝ વાઈરસ’ કહેતાં ફરી એક વખત ચીન તરફ આંગળી ચિંધાઈ રહી છે.
ચીન સરકારનો જે ગુપ્ત દસ્તાવેજ લીક થયો છે તે દર્શાવે છે કે હકીકતમાં ૧૭ નવેમ્બર, ૨૦૧૯ના રોજ કોરોના વાઈરસના પ્રથમ દર્દીને શોધી કાઢવામાં આવ્યો હતો
ચીન શરૂઆતથી જ કોરોના વાઈરસના મુદ્દે ભેદી મૌન સેવતું આવ્યું છે અને તેના આ પ્રયત્નના કારણે જ કોરોના અત્યંત ઘાતક બની દુનિયાભરમાં ફેલાયો હોવાનું પણ કહેવાય છે. હકીકતમાં એવા કેટલાક સ્ફોટક દસ્તાવેજો લીક થયા છે, જે ચીનના જૂઠાણાનો પર્દાફાશ કરવા માટે પૂરતા છે. ચીન કહેતું આવ્યું છે કે હુબેઈ પ્રાંતના વુહાન શહેરથી કોરોના વાઈરસની શરૂઆત થઈ છે, પરંતુ ચીનના અધિકારીઓએ ૭ જાન્યુઆરીએ માહિતી આપી હતી કે તેમને દર્દીઓમાં એક નવા ભયાનક વાઈરસનો ચેપ મળી આવ્યો છે. સરકારે કહ્યું હતું કે કોરોનાના ચેપનો પહેલો દર્દી એક મહિના અગાઉ એટલે કે ૭ ડિસેમ્બરે બીમાર પડ્યો હતો, પરંતુ શું તે સત્ય છે? કે પછી ચીન પોતાની નિષ્ફળતાને દુનિયાની સામે છુપાવી રહ્યું છે? ‘સાઉથ ચાઈના મોર્નિંગ પોસ્ટ’ને એક ક્લાસિફાઈડ ડોક્યુમેન્ટ હાથ લાગ્યો છે. મીડિયામાં લીક થયેલો આ સરકારી દસ્તાવેજ ચીનના દાવા કરતાં સાવ જુદી જ કહાણી રજૂ કરે છે.
ચીન સરકારનો જે ગુપ્ત દસ્તાવેજ લીક થયો છે તે દર્શાવે છે કે હકીકતમાં ૧૭ નવેમ્બર, ૨૦૧૯ ના રોજ કોરોના વાઈરસના પ્રથમ દર્દીને શોધી કાઢવામાં આવ્યો હતો. આ દર્દી ચીનના હુબેઈ પ્રાંતમાં મળી આવ્યો હતો. વુહાન હુબેઈની રાજધાની છે.
‘ડેઇલી મેઈલ’ના એક ચોંકાવનારા અહેવાલ મુજબ લીક થયેલા દસ્તાવેજો સ્પષ્ટપણે દર્શાવે છે કે ૧૭ નવેમ્બરે કોરોના વાઈરસના દર્દીને ટ્રેસ કર્યાના લગભગ બે મહિના બાદ જ ચીને વુહાન સહિતનાં શહેરમાં મોટી કાર્યવાહી કરી હતી અને અનેક પ્રતિબંધ લાદ્યા હતા.
રિપોર્ટ અનુસાર ચીન સરકારને ૧૭ નવેમ્બરે જ હુબેઈમાં રહેતી ૫૫ વર્ષીય વ્યક્તિને કોરોના વાઈરસનો ચેપ હોવાની જાણ થઈ ગઈ હતી. ત્યારબાદ દરરોજ પાંચ જેટલા નવા કેસ સામે આવવા લાગ્યા હતા.
સત્તાવાર રીતે તો ચીન ભલે એવો દાવો કરે છે કે કોરોના વાઈરસનો પ્રથમ દર્દી ૭ ડિસેમ્બરે મળી આવ્યો હતો, જોકે તેના ઘણાં અઠવાડિયાં પછી મોટા પાયે કાર્યવાહી કરવામાં આવી હતી. બીજી તરફ લીક થયેલા દસ્તાવેજમાં એવી પણ માહિતી મળી છે કે ૩૧ ડિસેમ્બર સુધીમાં તો સરકારી અધિકારીઓએ કોરોના વાઇરસનો ચેપ ધરાવતા ૨૬૬ લોકોની ઓળખ કરી લીધી હતી અને તેમને અલગ પણ તારવ્યા હતા.
ચીનના વુહાન શહેરથી ફેલાયેલો કોરોના વાઈરસ આજે સમગ્ર દુનિયા માટે ખતરો બની ગયો છે, પરંતુ ચીન આ વાત સ્વીકારવા જ તૈયાર નથી. અમેરિકી પ્રેસિડેન્ટ ડોનાલ્ડ ટ્રમ્પે કોરોના વાઈરસને ‘ચાઈનીઝ વાઈરસ’ કહ્યો એ વાત ચીનને એ હદે આકરી લાગી કે તેણે ચીનમાં તહેનાત અમેરિકન અખબારોના ત્રણ પત્રકારોને હાંકી કાઢ્યા. ચીને આકરી કાર્યવાહી કરતાં ‘ધ ન્યૂયોર્ક ટાઈમ્સ’, ‘ધ વોશિંગ્ટન પોસ્ટ’ અને ‘વોલ સ્ટ્રીટ જર્નલ’ સાથે સંકળાયેલા પત્રકારોને હાંકી કાઢ્યા છે. કોઈ પણ દેશમાં વિદેશી પત્રકારો સામે આ અત્યાર સુધીના ઈતિહાસની સૌથી કડક અને અયોગ્ય કાર્યવાહી ગણાય છે. ચીન જો કોઈ વાતે વાંકમાં નથી અને કોરોના વાઈરસ પાછળ તેનો કોઈ હાથ જ નથી તો પછી આ ઉકળાટ અને રોષ આખરે કઈ વાતનો કાઢી રહ્યું છે?
આટલું ઓછું હોય એમ આ અગાઉ ચીનના વિદેશ મંત્રાલયના પ્રવક્તા ઝાઓ લિજિયાને વિવાદાસ્પદ ટ્વિટ કર્યું હતું કે કોરોના વાઈરસ હકીકતમાં તો અમેરિકન સેનાનું ષડ્યંત્ર છે. તેમણે દાવો કર્યો કે કોરોના વાઈરસ ખરેખર યુએસ આર્મી દ્વારા ચીનમાં ફેલાવાયો હતો. હકીકત એવી છે કે ગયા વર્ષે ચીનમાં ‘વર્લ્ડ મિલિટરી ગેમ્સ’નું આયોજન થયું હતું, જેમાં અમેરિકાએ પણ પોતાની આર્મીના એથ્લેટ્સની એક વિશાળ ટીમ મોકલી હતી.
આ ઈવેન્ટ ગત ઓક્ટોબરમાં વુહાનમાં યોજાઈ હતી. જ્યાં આ ટીમ રોકાઈ હતી તે જગ્યા વુહાનના પ્રખ્યાત સી-ફૂડ માર્કેટની સાવ નજીક છે. ‘મિલિટરી ગેમ્સ’ સમાપ્ત થયા બાદ જ નવેમ્બરમાં અહીં એક રહસ્યમય બીમારી ફેલાઈ હોવાના સમાચાર આવ્યા હતા. ચીનના સોશિયલ મીડિયામાં છેલ્લા ઘણા સમયથી એવું કહેવામાં આવી રહ્યું છે કે અમેરિકન આર્મીની ટીમે જ આ વાઈરસને ચીનમાં પ્લાન્ટ કર્યો છે.