- ભારતીય ટીમે 20 ઓવરમાં 7 વિકેટ ગુમાવીને 181 રન બનાવ્યા હતા
- કિંગ કોહલી ટી20 માં સૌથી વધુ 50+ રન બનાવનાર ખેલાડી બન્યા
- રસાકસી વાળો રહ્યો ગઈકાલનો મેચ
એશિયા કપ 2022 સુપર-4 રાઉન્ડની મેચમાં ગઇકાલે ભારત અને પાકિસ્તાનની ટીમ આમને-સામને હતી. આ મેચમાં પાકિસ્તાનના કેપ્ટન બાબર આઝમે ટોસ જીતીને પહેલા ફિલ્ડિંગ કરવાનો નિર્ણય કર્યો હતો. ટોસ હાર્યા પછી પહેલા બેટિંગ કરવા આવેલી ભારતીય ટીમે 20 ઓવરમાં 7 વિકેટ ગુમાવીને 181 રન બનાવ્યા હતા. ભારત તરફથી વિરાટ કોહલીએ 44 બોલમાં 60 રન બનાવ્યા હતા. ભૂતપૂર્વ ભારતીય કેપ્ટને પોતાની ઇનિંગ દરમિયાન 4 ચોગ્ગા અને 1 છગ્ગો ફટકાર્યો હતો. આ મેચ દરમિયાન વિરાટ કોહલીએ એક મોટો રેકોર્ડ પોતાના નામે કરી લીધો છે.
કિંગ કોહલી ટી20 માં સૌથી વધુ 50+ રન બનાવનાર ખેલાડી બન્યા
ભૂતપૂર્વ ભારતીય કેપ્ટન વિરાટ કોહલી T20 ઇન્ટરનેશનલમાં સૌથી વધુ 50+ રન બનાવનાર ખેલાડી બની ગયા છે. કોહલી એ આ મામલે ભારતીય કેપ્ટન રોહિત શર્માને પણ પાછળ છોડી દીધો છે. રોહિત શર્માએ હાલ સુધી T20 ઈન્ટરનેશનલમાં 31 વખત 50 રનનો આંકડો પાર કર્યો છે. પણ ગઈ કાલના મેચ સાથે જ વિરાટ કોહલીએ 32મી વખત પચાસ રનનો આંકડો પાર કર્યો હતો. આ પહેલા કિંગ કોહલીએ એશિયા કપ 2022ની હોંગકોંગ સામેની મેચમાં પચાસ રનનો આંકડો પાર કર્યો હતો.
રસાકસી વાળો રહ્યો ગઈકાલનો મેચ
ગઈકાલના મેચની વાત કરીએ તો પહેલા બેટિંગ કરવા ઉતરેલી ભારતીય ટીમ માટે કેપ્ટન રોહિત શર્માએ 16 બોલમાં 28 રન બનાવ્યા હતા. ભારતીય કેપ્ટને પોતાની ઇનિંગ દરમિયાન 1 ફોર અને 2 સિક્સર ફટકારી હતી. કેએલ રાહુલે 20 બોલમાં 28 રનની આકર્ષક ઇનિંગ રમી હતી. આ સિવાય વિરાટ કોહલીએ 60, સૂર્યકુમાર યાદવે 13 અને દીપક હુડ્ડાએ 16 રન બનાવ્યા હતા. જો કે હાર્દિક પંડ્યા કોઈ રન બનાવ્યા વગર આઉટ થયો હતો. જ્યારે વિકેટ કીપર બેટ્સમેન ઋષભ પંતે 12 બોલમાં 14 રન બનાવ્યા હતા. ભારતીય ટીમે કુલ 181 રન બનાવીને પાકિસ્તાનને 182 રનનો ટાર્ગેટ આપ્યો હતો.
182 રનોના ટાર્ગેટનો પીછો કરતા પાકિસ્તાને બાબરની વિકેટને જલ્દી ગુમાવી દીધી હતી પરંતુ રિઝવાન પૂરા જોશમાં હતો. તેમણે ફખર જમાનની સાથે 41 રન જોડીને ઇનિંગ સંભાળી હતી. જોકે જમાન આખી ઇનિંગ દરમિયાન સંઘર્ષ કરતા જોવા મળ્યો હતો. જમાનના આઉટ થયા બાદ પાકિસ્તાને મોહમ્મદ નવાઝને બેટિંગ માટે મોકલ્યા મેચનો ટર્નિંગ પોઇન્ટ સાબિત થયું હતું. અંતે છેલ્લી ઓવર સુધી જકડી રાખેલ આ મેચ પાકિસ્તાન 5 વિકેટથી જીતી હતી.
