દર વર્ષે સોશિયલ મિડિયામાં દાઢી-મૂંછ વધારેલા પુરૂષોના ફોટા આકર્ષણનું કેન્દ્ર બને છે. ‘નો શેવ નવેમ્બર’ વાંચી કે સાંભળીને ઘણા પુરુષો નવેમ્બર મહિનામાં શેવિંગ કરાવતા નથી. લોકો આને ફેશન કે ટ્રેન્ડ તરીકે લે છે, પરંતુ આ કોઇ ફેશન કે ટ્રેન્ડ નથી. શું તમે જાણો છો કે ‘નો શેવ નવેમ્બર’ શું છે અને વિશ્વભરમાં તેની ઉજવણી શા માટે થાય છે.
દુનિયાભરના પુરૂષો લાંબી દાઢી અને મૂંછ રાખીને તેમજ અવનવી સ્ટાઇલની બિયર્ડ બનાવીને ઇન્સ્ટાગ્રામ કે ફેસબુક પર પોસ્ટ કરી રહ્યા છે. આ લોકો જે કેમ્પેઇનને સપોર્ટ કરી રહ્યા છે તે એક્ચ્યુઅલમાં મોવેમ્બર પરથી આવ્યુ છે. મોવેમ્બર(નો શેવ નવેમ્બર)ને સપોર્ટ કરતા યુવાનોએ આ વાત જાણવા જેવી છે.
આ કેમ્પેઇનની શરૂઆત આજથી છ વર્ષ પહેલા થઇ હતી
મૂંછ વધારીને જે પૈસા બચે છે તેને ડોનેટ કરો એવો તેનો મંત્ર છે
મોવેમ્બર નામની ચેરિટી સંસ્થા ઉજવે છે નો શેવ નવેમ્બર
પુરૂષોની હેલ્થને પ્રમોટ કરતા આ કેમ્પેઇનની શરૂઆત આજથી છ વર્ષ પહેલા ઓસ્ટ્રેલિયામાં થઇ હતી. ઓસ્ટ્રેલિયન ઇંગ્લિશ વર્ડ મુસ્ટેચ(મૂંછ) પરથી મોવેમ્બર નામ રાખવામાં આવ્યુ છે. પુરુષોમાં જોવા મળતા કેન્સર અને અન્ય રોગ પ્રત્યે જાગૃતતા ફેલાવવાના હેતુથી મોવેમ્બર ફાઉન્ડેશન નામની ચેરિટી સંસ્થા દ્વારા ‘નો શેવ નવેમ્બર’ અભિયાન ચલાવવામાં આવે છે.
સંસ્થા વિશ્વભરમાંથી ફંડ એકત્ર કરે છે
કેન્સરની વહેલી તપાસ, નિદાન અને અસરકારક સારવાર તેમજ નાની ઉંમરમાં પુરૂષોના મૃત્યુદરમાં થઇ રહેલા વધારાને નિવારવા માટે સંસ્થા વિશ્વભરમાંથી ફંડ એકત્ર કરે છે. પુરૂષો સ્વસ્થ જીવનશૈલી અપનાવે એ જ તેમનું લક્ષ્ય છે. આખો મહિનો બીયર્ડ અને મૂંછ વધારીને જે પૈસા બચે છે તેને ડોનેટ કરો એવો તેનો મંત્ર છે. આ મેસેજ આપવા માટે જ ‘નો શેવ નવેમ્બર’ મંથની ઉજવણી થાય છે.
ઓસ્ટ્રેલિયા, બેલ્જિયમ, ફ્રાંસ, ડેન્માર્ક, ફિનલેન્ડ, જર્મની, આયર્લેન્ડ, સિંગાપોર, નેધરલેન્ડ સહિતના દેશોના હજારો પુરુષો એમાં જોડાયા છે. જોકે ભારતે આ કેમ્પેઇનમાં સત્તાવાર એન્ટ્રી લીધી નથી, પરંતુ ભારતીય પુરૂષો ‘નો શેવ નવેમ્બર’ તો ઉજવે જ છે. ધીમે ધીમે લોકો જાગૃત થઇ રહ્યા છે. બહુ ટૂંક સમયમાં ભારત પણ આ કેમ્પેઇનમાં સત્તાવાર ભાગ લેશે. ભારતીય પુરુષો પોતાના સ્વાસ્થ્યની કાળજી રાખતા થાય તે પણ અત્યંત જરૂરી છે.