હવે ટ્રેનની ટિકિટ બુક કરવા માટે લાંબી લાઈનમાં ઊભા રહીને થાકી ગયા છો. તો તમને જણાવી દઈએ કે તમે ઘરે બેઠા સરળતાથી ટિકિટ બુક કરાવી શકો છો. ઈન્ડિયન રેલ્વે કેટરિંગ ટૂરિઝ્મ કોર્પોરેશન (IRCTC) એક નવી પોલિસી લઈને આવ્યું છે. જેનું નામ છે 'Book Now, Pay Later'. આ પોલિસી હેઠળ તમે IRCTCની સાઈટ પર ગમે ત્યારે ટિકિટ બુક કરી શકો છો અને તેનું પેમેન્ટ પછી કરી શકો છો.
તત્કાલ ટિકિટ બુક કરવામાં નહીં થાય પરેશાની
IRCTCએ કહ્યું, પહેલાં ટિકિટ બુક કરવા અને પછી પેમેન્ટ કરવાની સુવિધા તત્કાલ અને રિઝર્વેશન શ્રેણીની ટિકિટો માટે ઉપલબ્ધ થશે. આ વિકલ્પ ખાસ કરીને એવા લોકો માટે સુવિધા આપનારું હશે જેઓ પેમેન્ટ ગેટવે ફેલ થવાને કારણે તત્કાલ ટિકિટ બુક કરવામાં પરેશાની થાય છે.
ટિકિટ બુક કર્યાના 14 દિવસમાં પેમેન્ટ કરો
IRCTCની આ સુવિધા ePay Later દ્વારા થશે. જેમાં તમે ઈ-ટિકિટનું પેમેન્ટ કરી શકશો. ePay Later એક પ્રકારનું ડિજિટલ પેમેન્ટ સોલ્યુશન છે. જેને અર્થશાસ્ત્ર ફિટનેસ પ્રાઈવેટ લિમિટેડ લઈને આવ્યું છે. આ સુવિધા હેઠળ ટિકિટ બુક કર્યા બાદ તેનું પેમેન્ટ કરવા માટે 14 દિવસનો સમય મળે છે. જો કોઈ વ્યક્તિ 14 દિવસ પછી પેમેન્ટ આપે છે તો તેને 3.50 ટકા વ્યાજ ચૂકવવું પડશે. આ વ્યાજની સાથે ટેક્સ પણ ચૂકવવું પડશે.
આ રીતે ટિકિટ બુક કર્યા બાદ કરો પેમેન્ટ
તેના માટે સૌથી પહેલાં IRCTCની પ્રોફાઈલ પર લોગ-ઈન કરો
ત્યારબાદ તમારી જરૂર પ્રમાણે ટ્રેનમાં યાત્રા અંગેની જાણકારી ભરો
પછી પેમેન્ટ પેજ પર જશો તો ત્યાં Pay Laterનો એક વિકલ્પ હશે
Pay Later વિકલ્પ પર ક્લિક કરશો તો ત્યારબાદ ePay Later રિડાયરેક્ટ કરી દેવામાં આવશે
ePay Laterની વેબસાઈટ પર ગયા બાદ અહીં રજિસ્ટર્ડ મોબાઈલ નંબરની મદદથી લોગ-ઈન કરવું પડશે
ત્યારબાદ તમારા રજિસ્ટર્ડ મોબાઈલ નંબર પર એક OTP આવશે. તેને ભરીને તમે લોગ-ઈન કરી શકશો
ત્યારબાદ તમારે બુકિંગ અમાઉન્ટ કન્ફર્મ કરવું પડશે અને તમારી ટિકિટ બુક થઈ જશે