કૃષિ કાયદા સામે આશરે ચાર મહિનાથી આંદોલન કરી રહેલા ખેડૂતોએ હવે પાકા મકાનો બનાવી દેવાની શરૂઆત કરી દીધી છે.
દિલ્હી અને આસપાસની બોર્ડર ખેડૂતોનું આંદોલન
ટિકરી બોર્ડર મકાન બનાવવાની શરૂઆત
હજુ એક બે હજાર મકાન બનાવવાનો લક્ષ્ય
કૃષિ કાયદાને લઈને સરકાર સામે ખેડૂતોનો સંઘર્ષ હજુ પણ લાંબો ચાલે તેવી આશંકા દેખાઈ રહી છે. ઉનાળાની શરૂઆત થતાં પહેલા દિલ્હીની સરહદો પર હવે ખેડૂતોએ પાકા મકાન બનાવવાની શરૂઆત કરી દીધી છે.
આંદોલન લાંબુ ચાલે તેવા એંધાણ
વારંવાર ખેડૂત નેતાઑ દ્વારા કહેવામાં આવ્યું છે કે સરકાર ગમે તેટલા પ્રયાસ કરી લે, જ્યાં સુધી કાયદા પરત ન લેવાય ત્યાં સુધી ધરણાં સમાપ્ત કરવામાં આવશે નહીં. દિલ્હીની બોર્ડર હવે કાયમી મકાન જેવા ઈંટ-સિમેન્ટના ઘર તૈયાર કરવામાં આવી રહ્યા છે.
મકાનની અંદર જ સુવિધા
આટલું જ નહીં આ ઘરની અંદર એસી, પંખાથી લઈને અન્ય સુવિધાઑ પણ ઉપલબ્ધ કરવાની તૈયારી દર્શાવવામાં આવી છે. ખેડૂતો દ્વારા કહેવામાં આવી રહ્યું છે કે સરકાર સામે દ્રઢતાથી ટકી રહેવા માટે આ શેલટર બનાવવામાં આવ્યા છે.
એક બે હજાર મકાન બનાવવાની ચીમકી
સમાચાર એજન્સી ANIના અહેવાલ અનુસાર કિસાન સોશ્યલ આર્મી ટિકરી બોર્ડર પર ઈંટ-સિમેન્ટના પાકા મકાન બનાવી રહી છે. આ મકાનોમાંથી એકના માલિક દ્વારા કહેવામાં આવ્યું છે કે ખેડૂતોની ઈચ્છાશક્તિની જેમ જ આ મકાન પણ મજબૂત છે. અત્યાર સુધી 25 ઘર બનાવવામાં આવ્યા છે અને હજુ આવા બીજા એકથી બે હજાર જેટલા ઘરોનું નિર્માણ કરવામાં આવશે.
ચાર મહિનાથી ચાલી રહ્યું છે આંદોલન
ટિકરી બોર્ડર પર જે ઘર બનાવવામાં આવ્યા છે તેમાં એક ઘરની જેમ જ કૂલર અને પંખાની વ્યવસ્થા ઊભી કરવામાં આવી છે અને ઘરોની છતને ઘાસની ઢાંકવામાં આવી છે.
નોંધનીય છે કે ખેડૂતોના આંદોલનને ચાર મહિના પૂર્ણ થવાના આરે છે અને તાજા અહેવાલો અનુસાર દિલ્હી અને આસપાસની બોર્ડર પર ખેડૂતોની સંખ્યામાં ઘટાડો જોવા મળી રહ્યો છે. જોકે પાકા મકાન બન્યા બાદ સરકાર માટે નવી મુસીબત ઊભી થઈ શકે છે.