માનસિક ત્રાસ / હળવદની શાળામાં શિક્ષિકાએ પરીક્ષાના નામે સ્ટુડેન્ટ્સને કર્યા ટોર્ચર, 17 વિદ્યાર્થિનીઓ ડિપ્રેશનમાં આવી જતાં હોસ્પિટલમાં ખસેડાઈ

• હળવદની કસ્તુરબા ગાંધી વિદ્યાલય વિવાદમાં
• પરીક્ષા માટે શિક્ષિકાઓ દ્વારા ધમકી અપાતી હોવાનો આરોપ
• 17 વિદ્યાર્થિનીઓ ડિપ્રેશનમાં આવી જતા હોસ્પિટલમાં ખસેડાઈ

હળવદ તાલુકાના મેરુપર ગામે કસ્તુરબા ગાંધી વિદ્યાલય અને હોસ્ટેલ આવેલી છે, આ શાળામાં હળવદના આજુબાજુના ગામની 50 જેટલી વિદ્યાર્થિનીઓ હોસ્ટેલમાં રહીને ભણે છે. ત્યારે શાળાની શિક્ષિકાઓ સામે આક્ષેપો થતાં ચકચાર મચી જવા પામી છે. આ ઉપરાંત એક સાથે 17 જેટલી વિદ્યાર્થિનીઓ ડિપ્રેશનમાં આવી જતા તેઓને સારવાર માટે હળવદની સરકારી હોસ્પિટલમાં ખસેડવામાં આવી હતી.

ઘટનાને લઇ શાળામાં વાલીઓએ હોબાળો મચાવ્યો
 
આ ઘટનાને લઈને વાલીઓ કસ્તુરબા ગાંધી વિદ્યાલય ખાતે દોડી આવ્યા હતા અને તેઓએ હોબાળો મચાવ્યો હતો. આ મામલે વિદ્યાર્થિનીઓએ આક્ષેપ કરતા જણાવ્યું હતું કે, 'ભણાવ્યા વગર પરીક્ષા આપવાનું કહીને શિક્ષિકા ત્રાસ આપી રહી છે. જો પરીક્ષામાં માર્ક્સ ઓછા આવે તો શિક્ષિકાઓ ફૂટપટ્ટી વડે માર મારે છે. આ ઉપરાંત તેઓ વિદ્યાર્થિનીઓ પાસે ઘરના કામ કરાવે છે.'

વિદ્યાર્થિનીઓને માનસિક ત્રાસ આપતા હોવાનો આક્ષેપ

કસ્તુરબા ગાંધી વિદ્યાલયના વોર્ડન અમૃતાબેન સોલંકીએ પણ આક્ષેપ કરતા જણાવ્યું કે, '2 ટીચરો દ્વારા આ વિદ્યાર્થિનીઓને ત્રાસ આપવામાં આવતો હોવાથી આ વિદ્યાર્થિનીઓ ડિપ્રેશનમાં આવી ગઈ હતી. વોર્ડન તરીકે હું પણ કરાર આધારિત નોકરી કરી રહી છું, મને પણ પરેશાન કરવામાં આવી રહી છે.' 

સળગતા સવાલો

વિદ્યાર્થિનીઓને કેમ માનસિક ત્રાસ આપવામાં આવે છે?
ભણાવ્યા વિના શિક્ષિકા પરીક્ષા કેવી રીતે લઇ શકે?
તમારે પરીક્ષા લેવી જ છે, તો ભણાવતા કેમ નથી?
17 વિદ્યાર્થિઓની હાલત માટે જવાબદાર કોણ?
શિક્ષિકા વિદ્યાર્થિનીની તબિયતની જવાબદારી લેશે?