લંપટ સાધુ / નિત્યાનંદના અમદાવાદ આશ્રમમાં પોલીસને સાથે રાખી કરણીસેનાનો હલ્લાબોલ, યુવતી ન મળે ત્યાં સુધી ધરણાની ચિમકી

અમદાવાદના હાથીજણમાં હીરાપુર ગામમાં DPS શાળાના આશ્રમમાં કરણી સેનાના 50 કાર્યકરો અને પોલીસે હલ્લાબોલ કર્યો હતો. યુવતીને આશ્રમમાં ગોંધી રખાયા મામલે હલ્લા બોલ કરાયો હતો. આશ્રમના તાળા તોડી પડાયા હતા. 

શું છે મામલો 
નિત્યાનંદના અમદાવાદના આશ્રમમાંથી એક પરિવારના ચાર બાળકો જેમાં 3 દીકરી અને 1 દીકરો છેલ્લા છ મહિનાથી ગોંધી રખાયા હતા. જેમાંથી ચાઈલ્ડ વેલફેર અને પોલીસની મદદથી પરિવારે સગીર ઉમંરનો દીકરો અને દીકરી છોડાવ્યા પણ 18 વર્ષની અને 21 વર્ષની દીકરીને છોડાવવામાં નિષ્ફળ રહ્યા હતા. તેમની સાથે ફેસબુક માધ્યમથી વાત કરાવી દેવાઈ હતી. પણ પછીથી દીકરીનો એક વીડિયો સામે આવ્યો હતો જેમાં તેની સાથે શારીરિક અડપલા થઈ રહ્યા હોવાનુ તે કહી રહી હતી. ત્યાર બાદ પરિવાર દ્વારા પોલીસ અને વેલફેરના લોકોની મદદથી આશ્રમમાં દીકરીની શોધ ખોળ કરાઈ હતી પરંતુ હવે એ દીકરી ગુમ થઈ જતા સમગ્ર તંત્ર દોડતુ થઈ ગયુ છે. 

કોણ છે નિત્યાનંદ
તામિલનાડુનો નિત્યાનંદ સ્વામી અનેક વાર વિવાદોમાં ઘેરાઈ ચુક્યો છે પોતાના અનુયાયીઓ સાથે કામલીલા માટે આ બાબા કુખ્યાત છે તેના ઉપર પોલીસ ચોપડે થોકબંધ કેસ બોલે છે. પરંતુ તેમ છતાં તેના આંધળા અનુયાયીઓને કારણે તેને હંમેશા નવા શિકાર મળતા રહે છે આ વખતે બાબા ગુજરાતમાં ભુલો પડ્યો છે અને અમદાવાદમાંથી યુવતી ગાયબ થઈ છે. અગાઉ અભિનેત્રી સાથેના સેક્સ સીડીકાંડને કારણે બાબો ઘેરઘેર જાણીતો બન્યો હતો. 

બહુ ગાજેલા સેક્સ સીડીકાંડને કારણે હાલપણ જ્યારે ફેક બાબાઓની યાદી બને છે ત્યારે સ્વામી નિત્યાનંદનું નામ પણ તેમાં સામેલ હોય છે. સેક્સ સીડીકાંડને કારણે વિવાદ સર્જાયો હતો. બેંગલુરુમાં આશ્રમમાં નિત્યાનંદ અને સાધ્વીની સીડી બની હતી. સેક્સ સીડી બાદ નિત્યાનંદને જેલની સજા થઇ હતી. નિત્યાંનદ સામે બળાત્કાર જેવો ગંભીર આરોપ પણ છે.