વિરોધ ભારે પડ્યો / AAPને રાહત: ગાંધીનગર કોર્ટે 55 નેતાઓના જામીન કર્યા મંજૂર, 11 દિવસના જેલવાસ બાદ શરતી છૂટકારો

• કમલમમાં વિરોધ કેસમાં AAP નેતાઓના હતા જેલમાં
• AAPના 55 નેતાઓના જામીન મંજૂર
• તમામ નેતાઓને શરતી જામીન આપવામાં આવ્યા

20 ડિસેમ્બરે કમલમ ખાતે થયેલા ઘર્ષણ બાદ 21 ડિસેમ્બરેના રોજ તમામ નેતાઓને ગાંધીનગર કોર્ટ સમક્ષ રજૂ કરવામાં આવ્યા હતા. જ્યાં તમામ નેતા કાર્યકરોને જ્યુડિશિયલ કસ્ટડીમાં મોકલાયા હતા કારણ કે  રાયોટિંગ, છેડતી, મારામારી સહિત 19 કલમો હેઠળ ગુના નોંધાયા હતા જે બાદ આજે કોર્ટમાં હાથ ધરવામાં આવેલી સુનાવણીમાં AAP નેતાઓના જામીન મંજૂર કરવામાં આવ્યા છે.અગાઉ કોર્ટે 28 મહિલા નેતાઓને જામીન આપ્યા હતા જે બાદ આજે AAPના 55 નેતાઓને શરતી જામીન આપવામાં આવતા જેલમાંથી છુટકારો થયો છે.

20 ડિસેમ્બરથી હતા જેલમાં
ગૌણ સેવા પસંદગી મંડળના પેપર લીક મુદ્દે વિરોધ કરવા કમલમ પહોંચેલા AAP અને ભાજપ કાર્યકર્તાઓ અને પોલીસ વચ્ચે મોટું ઘર્ષણ થયું હતું, જે બાદ 21 ડિસેમ્બરના રોજ ઈશુદાન ગઢવી, ગોપાલ ઇટાલીયા, પ્રવિણ રામ, નિખિલ સવાણી,સહિત તમામ AAP કાર્યકર્તા ગાંધીનગર કોર્ટમાં રજૂ કરાયા હતા જ્યાં તમામને જ્યુડિશિયલ કસ્ટડીમાં મોકલી દેવામાં આવ્યા હતા, તે પહેલા બનાવની મોડી રાત્રે કોર્ટમાં 26 મહિલા કાર્યકરોને પેશ કરાઇ હતી. જેમાં જામીન નામંજૂર થતા મહિલાઓને રાત સાબરમતી જેલમાં રાત વિતાવવી પડી હતી.

કઈ કઈ કલમો હેઠળ ગુનો નોંધાયો છે
ગાંધીનગર પોલીસે AAP કાર્યકર ઇસુદાન ગઢવી, ગોપાલ ઇટાલીયા અને પ્રવીણ રામ સહિત ટોળા સામે ફરિયાદો દાખલ કરી હતી. આ ફરિયાદમાં અલગ અલગ IPC હેઠળ કલમો દાખલ કરાઇ છે. જેમાં કલમ 452, 353,353 A , 341, 323, 143,144,145, 147, 148,149, 151, 152, 269, 188, 429, 504, 120B, ડેમેજ ટુ પબ્લિક પ્રોપર્ટી, સેક્શન 37, એપેડેમિક એક્ટ 37, ગુજરાત પોલીસ એક્ટ સેક્શન 135  સહિતની કલમો સાથે ફરિયાદ નોંધાઇ છે. બિન જામીનપાત્ર કલમો ઉમેરવામાં આવી હતી.