ફ્રેશ ફ્રુટનો જ્યુસ પીવો તો કોને ન ગમે? આમ શુદ્ધ અને પ્રાકૃતિક ગણાતો જ્યુસ આખરે તો એક પ્લાસ્ટિકના કપમાં સર્વ થાય છે જે સરવાળે પર્યાવરણને નુકશાન પહોંચાડે છે. કર્ણાટકના એક જ્યુસવાળાએ સાચા અર્થમાં જ્યુસને સાત્વિક બનાવ્યો છે. તેણે જ્યુસને પ્લાસ્ટિકના કપને બદલે ફળના પડિયામાં સર્વ કરવાની પ્રથા શરુ કરી છે.
દુનિયા પ્લાસ્ટિકથી પરેશાન છે કારણ કે આ એક કચરો એવો છે જે સંપૂર્ણ રીતે નાશ પામવામાં હજારો વર્ષોનો સમય લે છે. પ્લાસ્ટિકે દરેક જગ્યાએ પર્વતો, જંગલો, નદીઓ અને સમુદ્રમાં પોતાનું સ્થાન જમાવી લીધું છે. માછલીઓ પ્લાસ્ટિક ખાધા પછી મૃત્યુ પામી રહી છે. જો તમે પ્રકૃતિને સ્વચ્છ અને સુંદર રાખવા માંગતા હો તો પછી આ પ્લાસ્ટિકને ટાટા બાય-બાય કહી દો.
કર્ણાટકમાં એક જ્યુસ વાળાએ આમ જ કર્યું છે. તે તેના ગ્રાહકોને જ્યુસ પ્લાસ્ટિકના ગ્લાસમાં નહીં, પણ ફળોના પડિયામાં આપે છે. તેની દુકાન ઝીરો વેસ્ટ છે. મતલબ કે અહીંથી બિલકુલ કચરો નીકળતો નથી.
આ દુકાનનું નામ છે Eat Raja
ANIના અહેવાલ અનુસાર બેંગ્લોરમાં મલ્લેશ્વરમ સ્થિત Eat Raja જ્યુસ સેન્ટરમાં ગ્રાહકોને પ્લાસ્ટિકના ગ્લાસમાં નહીં પણ ફળોના પડિયામાં જ્યુસ સર્વ કરવામાં આવે છે. ગ્રાહકોએ કહ્યું કે આ જાણકારી તેમને સોશિયલ મીડિયા વડે મળી. તેમણે કહ્યું કે પ્લાસ્ટિક ન વાપરવું એ સૌથી સારો રસ્તો છે. વપરાશ બાદ આ ફળોના વધેલા પડિયા પશુઓને ખવડાઈ દેવામાં આવે છે.