દુનિયામાં કોરોના દર્દીઓનો આંકડો ૭.૪૫ કરોડથી વધુ થઇ ચુક્યો છે. ૫,૨૩,૦૦,૦૦૦થી વધુ લોકો ઠીક થઇ ચુક્યા છે. અત્યાર સુધી ૧૬,૫૪,૦૦૦થી વધુ લોકો જીવ ગુમાવી ચુક્યા છે.
અમેરિકામાં વેક્સિનેશન શરૂ થઇ ચુક્યું છે. કેટલાક લોકો વેક્સિન લેવાથી ડરી રહ્યા છે. આ ડરને દૂર કરવા માટે પ્રેસિડન્ટ ઇલેક્ટ જો બાયડન આગામી અઠવાડિયે વેક્સિનેશન કરાવશે. જર્મનીમાં સંક્રમણથી મૃત્યુનો સિલસિલો અચાનક તેજ થઇ ચુક્યો છે.
રાષ્ટ્રપતિની શપથવિધિમાં બે લાખને બદલે માત્ર એક હજાર ટિકિટ વેચાશે
અમેરિકામાં ૨૦ જાન્યુઆરીના રોજ યોજાનાર શપથ સમારંભમાં મહેમાનોની સંખ્યા ખૂબ ઓછી રહેશે. આ સમારંભની લગભગ બે લાખ ટિકિટ વેચવામાં આવે છે, પરંતુ આ વખતે કોરોનાના કારણે માત્ર એક હજાર ટિકિટ જ વેચવામાં આવશે. આ ઉપરાંત સેનેટ અને હાઉસ ઓફ રિપ્રેઝન્ટેટિવના ૫૩૫ સભ્ય હશે.
એક્સપર્ટ ડોક્ટર એન્થની ફાઉચીએ જલદી વેક્સિન લગાવવાની સલાહ આપી
પ્રેસિડન્ટ ઇલેક્ટ જો બાયડન આગામી અઠવાડિયે જાહેરમાં વેક્સિન લેશે. હાલમાં ઉપરાષ્ટ્રપતિ માઇક પેન્સ પત્ની કરેનની સાથે આવતી કાલે વેક્સિનેશન કરાવશે. બાયડને ખુદ માન્યું કે દેશના ઇન્ફેક્શિયસ ડિસીઝ એક્સપર્ટ અને કોરોના ટાસ્ક ફોર્સના એક્સપર્ટ ડોક્ટર એન્થની ફાઉચીએ તેમને જલદી વેક્સિન લગાવવાનું કહ્યું છે.
સૌથી પહેલા વેક્સિન કેર હોમ્સમાં રહેતા વૃદ્ધને આપવામાં આવશે
જર્મન સરકાર અને અહીંની હેલ્થ રેગ્યુલેટર ૨૭ ડિસેમ્બરે વેક્સિનને મંજૂરી આપી શકે છે. સૌથી પહેલા વેક્સિન કેર હોમ્સમાં રહેતા વૃદ્ધને આપવામાં આવશે. ત્યારબાદ બાકી લોકોનો નંબર આવશે. જર્મની બાયોએન્ટેક અને ફાઇઝરની વેક્સિનને મંજૂરી આપવામાં આવશે. વેક્સિનેશન પહેલાં જર્મનીની હાલત બગડી રહી છે. અહીં ગઇ કાલે એક દિવસમાં ૯૫૨ લોકો મૃત્યુ પામ્યા છે. દુકાનો, સ્કૂલો અને તમામ બિનજરૂરી સંસ્થાઓ બંધ કરી દેવામાં આવી છે. જર્મનીમાં ૧૧ દિવસથી લગભગ રોજ ૪૦૦ લોકોનાં મોત થઇ રહ્યાં છે.