જસદણ પેટા ચૂંટણીમાં ભાજપ-કોંગ્રેસના કાર્યકરો હરકતમાં બેઠકોનો દોર શરૂ

રાજકોટ: દેશની પાંચ રાજ્યોની ચૂંટણી બાદ ગુજરાતમાં જસદણ પેટા ચૂંટણીનો માહોલ ફરી એક વખત ગરમાયો છે. પાંચ રાજ્યોમાં ભાજપને મળેલી માત અને કોંગ્રેસની વાપસી થતા ગુજરાતમાં બંને પાર્ટીઓ હવે સતર્ક થઈ ગઈ છે. જેને લઈ ભાજપ અને કોંગ્રેસે બેઠકનો દોર વધારી નાખ્યો છે. 

જસદણમાં કોંગ્રેસના નેતાઓ હાલ ગેલમાં છે. તો ગુજરાત ભાજપમાં ચિંતાનું મોજુ જોવા મળી રહ્યો છે. કુંવરજી બાવળિયાને જીતાવવા માટે પક્ષ તરફથી એડી ચોટીનું જોર લગાવવામાં આવ્યું છે. ભાજપ સરકાર માટે જસદણની જીત એ શાખનો સવાલ છે. ત્યારે પાર્ટી હાઈ કમાન્ડે પણ જસદણ પેટા ચૂંટણીને લઈ સ્થાનિક નેતાઓને સ્ટેન્ડ બાય રહેવા જરૂરી સુચનો આપ્યા છે.

ઉલ્લેખનીય છે કે 5 રાજ્યોના પરિણામો બાદ ભાજપમાં ચિંતાનું મોજું ફરી વળ્યું છે. 5 રાજ્યોના પરિણામોની અસર દેખાય તેવી ભાજપના કાર્યકરોમાં ચિંતા થઇ રહી છે. ત્યારે બાવળિયા જીતે તો જ સરકારની આબરૂ સચવાય તેવી સ્થિતિ સર્જાઇ છે.

20 ડિસેમ્બરે આયોજિત જસદણ વિધાનસભા પેટાચૂંટણીને લઈને તૈયારીઓનો ધમધમાટ શરૂ થયો છે. જસદણમાં કુલ બે લાખ 32 હજાર મતદારો છે અને 262 મતદાન મથકમાંથી 126 મતદાન મથકો સંવેદનશીલ છે. ત્યારે કોઈ અનિચ્છનિય બનાવ ન બને તે માટે હાફ સેક્સન એસઆરપી ટીમ મુકવામાં આવશે. પ્રથમ વખત વિધાનસભા બેઠક પર બે મહિલા મતદાન મથક તૈયાર કરવામાં આવ્યા છે. જસદણ પેટા ચૂંટણીની 20 તારીખે ચૂંટણી બાદ 23 ડિસેમ્બરે પરિણામ જાહેર કરવામાં આવશે.