આવકવેરા વિભાગે ગઈ કાલે દિલ્હી સ્થિત એક વ્યવસાયિક જૂથ પર દરોડા પાડ્યા હતા. આ દરોડા દરમિયાન આશરે રૂપિયા 1000 કરોડની કરચોરી સામે આવી છે. સેન્ટ્રલ બોર્ડ ઓફ ડાયરેક્ટ ટેક્સ (CBDT)એ કહ્યું છે કે કરોડો રૂપિયાના વીવીઆઈપી ચોપર (હેલિકોપ્ટર) સોદામાં હવાલા વ્યવહાર થયાની આશંકાના પગલે આવકવેરા વિભાગે આ બિઝનેસ ગ્રૂપ પર વોચ રાખી હતી. તાજેતરની કરચોરી હેલિકોપ્ટર કૌભાંડ સાથે સંબંધિત હોઈ શકે.
આવકવેરા વિભાગની કાર્યવાહી
વ્યવસાયિક જૂથ પર પાડ્યા દરોડા
1000 કરોડની કરચોરી ઝડપી
સીબીડીટીના અધિકારીઓએ જણાવ્યું હતું કે જે બિઝનેસ ગ્રુપ પર દરોડા પાડવામાં આવ્યા તે અનેક ઈ-ગવર્નન્સ પ્રોજેક્ટ્સ સાથે સંકળાયેલું છે અને નાણાકીય સેવાઓ પણ પૂરી પાડે છે. વિભાગે વધુમાં કહ્યું કે આ ગ્રુપ પર દરોડા અને જપ્તીની કાર્યવાહી દરમિયાન મોટા પાયે કરચોરી, હવાલા કારોબાર અને મની લોન્ડરિંગ પુરાવાઓ મળ્યા છે. સીબીડીટીએ હજુ સુધી જોકે આ બિઝનેસ ગ્રૂપનું નામ જાહેર કર્યું નથી.
બિનહિસાબી નાણાંના વ્યવહાર ઝડપાયો
તપાસ એજન્સીના જણાવ્યા અનુસાર આ બિઝનેસ ગ્રુપે બિનહિસાબી નાણાંના વ્યવહાર માટે દિલ્હી અને કોલકાતાની શેલ કંપનીઓનો ઉપયોગ કર્યો હોવાની વાત સામે આવી છે. વિભાગે કહ્યું કે આ કેસમાં પહેલાં ખાતર (ફર્ટિલાઈઝર)ની ખરીદી કરનારી ઘણી સંસ્થાઓની પણ ઊંડી તપાસ કરવામાં આવી હતી. દુબઈના ઓપરેટર રાજીવ સક્સેના શેલ કંપનીઓ દ્વારા કમિશન તરીકે બહુ મોટી રકમ એકઠી કરી રહ્યો હતો. સક્સેના વીવીઆઈપી ચોપર કૌભાંડમાં પણ આરોપી છે.
1000 કરોડની કરચોરી ઝડપાઇ
3600 કરોડ રૂપિયાના વીવીઆઈપી ચોપર કૌભાંડમાં મની લોન્ડરિંગ અને ભ્રષ્ટાચારના કેસમાં રાજીવ સક્સેનાને દુબઇથી ભારત લાવવામાં આવ્યો હતો. આવકવેરા વિભાગને સક્સેના દ્વારા મોટી રકમની કરચોરી કરાઇ હોવાની આશંકા છે. પ્રાથમિક તપાસમાં બહાર આવેલી વિગતો મુજબ હવાલા કારોબાર અને ગેરકાયદે પદ્ધતિઓથી નાણાં લાવવામાં કરવામાં આવેલી કરચોરીની રકમ 1000 કરોડ રૂપિયાથી પણ વધુની છે.