સિદ્ધિ / ઈશાંત શર્માએ લગાવી 'ત્રેવડી સદી', દિગ્ગજ ખેલાડીઓની યાદીમાં સામેલ થયો

• ઈંગ્લેન્ડનાં ડેનિયલ લોરેન્સની વિકેટ ઝડપી 300 વિકેટ પૂરી કરી
• દિગ્ગજ ખેલાડીઓની યાદીમાં સમાવેશ પામ્યો
• 2007માં આંતરરાષ્ટ્રીય ક્રિકેટ કરિયરની શરુઆત કરી

300 વિકેટ લેનાર ભારતનો છઠ્ઠો પ્લેયર બન્યો
ભારતનાં અનુભવી ફાસ્ટ બોલર ઈશાંત શર્માએ વિકેટ ખેરવવામાં ત્રેવડી સદી મારી છે. ઈશાંત શર્મા ટેસ્ટ ક્રિકેટમાં 300 વિકેટ લેનાર ભારતનો છઠ્ઠો પ્લેયર બની ગયો છે. 300 વિકેટ ઝડપ્યા બાદ હવે ઈશાંત કપિલ દેવ અને અનિલ કુંબલેનાં ક્લબમાં સામેલ થઈ ગયો છે. ઈશાંત શર્માએ ઈંગ્લેન્ડ સામે ચેન્નાઈમાં રમાઈ રહેલી પહેલી ટેસ્ટનાં ચોથા દિવસે ઈંગ્લેન્ડની બીજી ઈનિંગમાં ડેનિયલ લોરેન્સને એલબીડબલ્યૂ આઉટ કરીને ક્રિકેટનાં સૌથી લાંબા ફોર્મેટમાં 300 વિટેક પૂરી કરવાની સિદ્ધી હાંસલ કરી છે. 
 

98 મેચમાં સિદ્ધી હાંસલ કરી 
ભારતીય બોલર્સની યાદીમાં ટેસ્ટમાં સૌથી વધારે વિકેટ મહાન સ્પિનર અનિલ કુંબલે (132 મેચમાં 619 વિકેટ) લીધી છે. કપિલ દેવ બીજા સ્થાન પર જ્યારે હરભજન સિંહ ત્રીજા ક્રમાંકે છે. ત્યારબાદ સ્પિનર અશ્વિન અને ઝહીર ખાનનો સમાવેશ થાય છે. દિલ્હીનાં 32 વર્ષિય ખેલાડીને આ સિદ્ધી હાંસલ કરવા માટે 98 મેચ લાગી. જે ઉપલબ્ધી માટે બીસીસીઆઈએ ઇશાંતને અભિનંદન પાઠવ્યા છે. 
 

બીસીસીઆઈ અને આઈસીસીએ અભિનંદન પાઠવ્યા
બીસીસીઆઈએ ટ્વીટ કરીને ઈશાંતને અભિનંદન પાઠવ્યા. આંતરરાષ્ટ્રીય ક્રિકેટ પરિષધ (આઈસીસી)એ પણ ઈશાંતની આ ઉપલબ્ધી માટે તેની 13 વર્ષની મહેનતની પ્રશંસા કરી અને ટ્વીટ કરીને લખ્યું કે, કપિલ દેવ અને ઝહીર ખાન બાદ ટેસ્ટમાં 300 વિકેટનાં આંકડાએ પહોંચનાર ઈશાંત શર્મા ત્રીજો ફાસ્ટ બોલર બન્યો છે. 
 

ઉપલબ્ધી માટે સૌથી વધારે મેચો લીધી
ઇશાંતને તેની ઉપબલ્ધિમાં 11 ઈનિંગમાં 5 વિકેટ લેવાની સિદ્ધી હાંસલ છે સાથે તેણે એક વખત 10 વિકેટ પણ ખેરવી છે. બાંગ્લાદેશ વિરુદ્ધ 2007માં આંતરરાષ્ટ્રીય કરિયરમાં પ્રવેશ કરનાર ઈશાંતે તેનાં શરુઆતી દિવસોમાં ઓસ્ટ્રેલિયાનાં દિગ્ગજ બેટ્સમેન રિકી પોન્ટીંગને ખૂબ પરેશાન કર્યો હતો જેની ચર્ચા આજે પણ ક્રિકેટ જગતમાં થાય છે. જોકે ઈશાંતે આ મુકામ હાંસલ કરવા માટે સૌથી વધારે મેચો લીધી આ સિદ્ધી અશ્વિને 54 મેચોમાં હાંસલ કરી હતી, ત્યારબાદ કુંબલે 66 મેચ, હરભજન 72 મેચ, કપિલ દેવ 83 મેચ અને ઝહીર 89 મેચ બાદ આ ઉપલબ્ધી હાંસલ કરી હતી.