ભારતીયના સૌથી મનપસંદ ક્રિકેટ ટૂર્નામેન્ટ દર વર્ષ ખેલાડીઓ ધુઆંધાર પ્રદર્શન કરીને ચાહકોમાં જોશ ભરી દેતા હોય છે, આ સીઝનમાં સૌથી પહેલી વિસ્ફોટક સદી કે એલ રાહુલે ફટકારી છે.
૧૩મી સિઝનમાં રાહુલે ૬૨ બોલમાં પૂરા કર્યા 100 રન
૨૦૦૮માં બ્રેન્ડન મેક્કુલમે ફટકારી હતી ટૂર્નામેન્ટની પ્રથમ સદી
આઇપીએલ-૨૦૨૦ની છઠ્ઠી મેચમાં આ સિઝનની પ્રથમ સદી જોવા મળી. અત્યાર સુધી ઘણા બેટ્સમેનોએ અર્ધસદી ફટકારી હતી, પરંતુ કિંગ્સ ઈલેવન પંજાબના કેપ્ટન કે. એલ. રાહુલે પ્રથમ વાર ત્રણ આંકડાનો અંગત સ્કોર આઇપીએલની ૧૩મી સિઝનમાં બનાવ્યો. રાહુલે આરસીબી સામે માત્ર ૬૨ બોલમાં ૧૨ ચોગ્ગા અને ત્રણ છગ્ગા સાથે ૧૦૦ રન પૂરા કર્યા હતા અને પછી અણનમ રહીને તેણે ૧૪ ચોગ્ગા અને સાત છગ્ગાની મદદથી ૧૩૨ રનની ઇનિંગ્સ રમી. આઇપીએલ-૨૦૨૦ની એ પ્રથમ સદી હતી, પરંતુ તમે શું એ જાણો છો કે અત્યાર સુધી રમાયેલી આઇપીએલની ૧૨ સિઝનમાં કયા ખેલાડીએ સિઝનની પ્રથમ સદી ફટકારી છે? આજે અહીં આવા સદીવીર તરફ નજર કરીએ.
આઇપીએલની શરૂઆત ૨૦૦૮માં થઈ હતી. ટૂર્નામેન્ટની ઉદ્ઘાટન મેચમાં કેકેઆરના બ્રેન્ડન મેક્કુલમે સદી ફટકારી હતી. ત્યાર બાદ ૨૦૦૯માં ડી'વિલિયર્સના બેટમાંથી સિઝનની પ્રથમ સદી નીકળી હતી. ૨૦૧૦ની આઇપીએલમાં પ્રથમ યુસુફ પઠાણે ફટકારી હતી. ૨૦૧૧ની આઇપીએલમાં પ્રથમ સદી પોલ વેલ્થાટીએ નોંધાવી હતી, જોકે ત્યાર બાદ વેલ્થાટી ક્રિકેટની દુનિયામાંથી જાણે કે અલોપ જ થઈ ગયો.
વર્ષ ૨૦૧૨ની સિઝનની વાત કરવામાં આવે તો પ્રથમ સદી અજિંક્ય રહાણેના બેટમાંથી નીકળી હતી. ૨૦૧૩ની આઇપીએલમાં પ્રથમ સદી શેન વોટ્સનના નામે નોંધાઈ હતી. ૨૦૧૪માં પ્રથમ સદી કેરેબિયન બેટ્સમેન લેન્ડલ સિમન્સે ફટકારી હતી, જ્યારે ૨૦૧૫ની આઇપીએલમાં ફરી એક વાર બ્રેન્ડન મેક્કુલમે સિઝનની પ્રથમ સદી નોંધાવી હતી. ૨૦૧૬ની આઇપીએલમાં ક્વિન્ટન ડી'કોકે સિઝનની પ્રથમ સદી નોંધાવી હતી.
વર્ષ ૨૦૧૭ની આઇપીએલમાં પ્રથમ સદી સંજુ સેમસનના બેટમાંથી આવી હતી, જ્યારે ૨૦૧૮ની સિઝનમાં પહેલી સદી વિન્ડીઝના વિસ્ફોટક બેટ્સમેન ક્રિસ ગેલે ફટકારી હતી. ૨૦૧૯માં ફરી એક વાર સંજુ સેમસને પોતાના બેટની કમાલ દેખાડતા સિઝનની પ્રથમ સદી નોંધાવી હતી. હવે ૨૦૨૦માં આ કમાલ કે. એલ. રાહુલે કરી છે.