રેઢીયાળ તંત્ર / ભાવનગરમાં રખડતા ઢોરે લીધો નિર્દોષ માણસનો ભોગ, 22 દિવસની સારવાર બાદ મોત, જવાબદાર કોણ?

• ભાવનગર મહાપાલિકાનો 'સુસ્ત'અને રેઢીયાળ વહીવટ 
• ભાજપ પ્રમુખની 'ચાબુક'નો  તંત્ર પર કોઈ અસર નહિ 
• રખડતા ઢોરની અડફેટે આવેલા વ્યાપારીનું આખરે મોત 

ભારતીય જનતા પાર્ટીના પ્રદેશાધ્યક્ષ સી.આર. પાટીલે દીપાવલી સ્નેહ મિલન દરમિયાન જ્યાં-જ્યાં ગયા ત્યાં તમામ જગ્યાના મહાપાલિકાના મેયર સહિતના સતાધીશોને જન સુવિધાઓ માટે ટકોર કરી હતી. અને વડોદરાના મેયરને તો જાહેરમાં 'લીધા 'હતા. રખડતા ઢોર મુદ્દે,વારંવાર ટકોર કરતા રહેતા પાટીલ, 'સુસ્ત'ભાવનગર પાલિકાની આળસ ઉડાડી શક્યા નહિ. પરિણામે,ઢોરની અડફેટે આવેલા વ્યાપારીનું 24 દિવસ બાદ મોત નીપજ્યું છે. 4 ડીસેમ્બરના રોજ વ્યાપારીને રખડતા ઢોરે અડફેટે લીધા હતા. ત્યાર બાદ વ્યાપારી સારવાર માટે હોસ્પીટલમાં રહ્યા એટલી લાંબી સારવાર બાદ પણ વ્યાપારી બચી શક્યા નહોતા.પરિણામે,ભાવનગર મહાપાલિકા સામે આક્રોશ જાગ્યો છે.  

સફાળું  જાગ્યું મહાપાલિકા તંત્ર 

ભાવનગર શહેરમાં રખડતા ઢોરનો ત્રાસ યથાવત જોવા મળી રહ્યો છે. ભાવનગર જિલ્લામાં આખલાના આંતકનો વધુ એક વ્યક્તિ ભોગ બની છે.. 4 ડિસેમ્બરના રોજ બનેલી ઘટનામાં ઘાયલ થયેલા વેપારીનું સારવાર દરમિયાન મૃત્યુ થયું છે. જેને લઈને વિવાદ સર્જાયો છે. વેપારીનું મૃત્યુ થતા જ સ્થાનિકોમાં પાલિકા સામે રોષ જોવા મળી રહ્યો છે. તો વિપક્ષે પણ દોષનો ટોપલો શાસક પક્ષ પર ઢોળ્યો છે. ત્યારે ભાવનગર મહાનગરપાલિકા તંત્ર અચાનક જ ઊંઘમાંથી જાગ્યું છે. ભાવનગર મહાનગરપાલિકાએ શહેરના 3 વિસ્તારોમાં ઢોરવાડા બનાવવા માટે કલેક્ટર પાસે 15 એકર જમીનની માગ કરી છે. તેમજ જમીન મળતા જ ઢોરનો ત્રાસ ઓછો થશે તેવી ભાવનગર મહાનગરપાલિકાના શાસક પક્ષ દ્વારા બાંહેધરી આપવામાં આવી છે. આપને જણાવી દઈએ કે, ભાવનગર શહેરમાં અત્યાર સુધીમાં 4 અને જિલ્લામાં 2 મળી કુલ 6 લોકોના ઢોરની હડફેટે આવી જતા મૃત્યુ થયા છે.