પ્રધાનમંત્રી નરેન્દ્ર મોદીના ડ્રીમ પ્રોજેક્ટ ધોલેરા SIR ને લઇને હવે કેન્દ્ર સરકાર પણ સક્રિય થઇ છે. ધોલેરાને પહેલું ગ્રીન સીટી બનાવવા માટે વિવિધ રોકાણકારોને મદદની તૈયારી દર્શાવી છે. કેન્દ્ર સરકારે ધોલેરાના વિકાસ માટે 2024 સુધીનો રોડ મેપ તૈયાર કરી દીધો છે.
જેમાં ધોલેરામાં આવતી કંપનીઓને 50 ટકા સુધી મદદ કરવામાં આવશે. જમીન સંપાદનથી લઇને ઉદ્યોગ શરૂ કરવા સુધી સરકાર તમામ મદદ કરશે. બીજી તરફ ધોલેરા સુધીના 6 લેન હાઇવેનું નિર્માણ કાર્ય પણ શરુ થઇ ચૂક્યું છે અને તેની સાથે ધોલેરામાં સૌર ઉર્જા સંચાલિત પ્લાન્ટને પણ મંજૂરી મળી ચૂકી છે.
ધોલેરા એવું પહેલું શહેર બનશે જ્યાં સૌરઉર્જાથી સંચાલિત વાહનોની સાથે લોકોની વીજળીની જરુરિયાત પણ સૌરઉર્જાથી જ પૂર્ણ કરાશે. કુલ 5000 મેગાવોટના સોલર પ્લાન્ટને મંજૂરી અપાઇ ચૂકી છે જેમાંથી 250 મેગાવોટના પ્લાન્ટ શરુ થવા જઇ રહ્યા છે.
તો સાથે જ ધોલેરાના ઇન્ટરનેશનલ એરપોર્ટને પણ કેન્દ્ર સરકારે મંજૂરી આપી છે તેને લઇને કામગીરી શરુ કરી દેવાઇ છે. ઇન્ટરનેશનલ એરપોર્ટ માટે જમીનની લેવલીંગ પ્રક્રિયા શરુ થઇ ચૂકી છે.
નીતિ આયોગના સીઇઓ અમિતાભ કાંતે આજે ઉદ્યોગગૃહોને વિડિયો કોન્ફરન્સથી સંબોધન કરીને આ રોડમેપ વિશે માહિતિ આપી હતી. તેમણે કેન્દ્ર સરકારનો વર્ષ 2024 સુધીના લક્ષ્યાંકો સાથે રોકાણકારોને મળનારી સુવિધાઓની પણ વાત કરી હતી. ધોલેરામાં ઇલેક્ટ્રીક વાહનોને લઇને પણ ભાર મૂકવામાં આવી રહ્યો છે.
સમગ્ર શહેરમાં ઇલેક્ટ્રીક વાહનોનો ઉપયોગ થશે પછી તે ખાનગી વાહન હોય કે સરકારની વાહનો હોય. એરો અને ડિફેન્સ ઉત્પાદનો માટે સરકાર કંપનીઓને સવલતો પૂરી પાડશે જેથી કરીને રોકાણ વધે અને ધોલેરાને વૈશ્વિક સ્તરે આધુનિક SIR બનાવી શકાય. ધોલેરા ફક્ત રાજ્ય જ નહિ પરંતુ દેશનું સૌથી મહત્વનું ઔદ્યોગિક હબ બનાવાશે.