ટી-20 માં ન્યૂઝીલેન્ડે ટીમ ઇન્ડિયાને ૨૧ રનથી પરાજય આપ્યો
ભારતની હાર માટે જવાબદાર પાંચ કારણ
ભારતીય ટીમ નિર્ધારિત ઓવર સુધીમાં ૧૫૫ રન જ બનાવી શકી
રાંચીમાં ગઈ કાલે રમાયેલા ટી-૨૦ મુકાબલામાં ન્યૂઝીલેન્ડે ટીમ ઇન્ડિયાને ૨૧ રનથી પરાજય આપ્યો. કિવી ટીમે પ્રથમ બેટિંગ કરતા ડ્વેન કોન્વે (૫૨) અને ડેરિલ મિચેલ (૫૯)ની અર્ધસદીઓની મદદથી ૧૭૬ રન બનાવ્યા. જવાબમાં ભારતીય ટીમ નિર્ધારિત ઓવર સુધીમાં ૧૫૫ રન જ બનાવી શકી. ભારતની હાર માટે જવાબદાર પાંચ કારણ.. અર્શદીપની અંતિમ ઓવર
ન્યૂઝીલેન્ડની ટીમે પ્રથમ બેટિંગ કરતાં ૧૯ ઓવરમાં માત્ર ૧૪૯ રન જ બનાવ્યા હતા, પરંતુ અંતિમ ઓવરમાં અર્શદીપે ૨૭ રન લૂંટાવી લીધા. તેણે ઓવરની શરૂઆત જ નો-બોલથી કરી હતી, જેના પર મિચેલે છગ્ગો ફટકારી દીધો. મિચેલે ત્યાર પછીના બે બોલ પર બે છગ્ગા અને પછીના બોલ પર ચોગ્ગો ફટકાર્યો. અર્શદીપની આ કંગાળ બોલિંગને કારણે જ કિવી ટીમ ૧૭૬ રનનાં સ્કોર સુધી પહોંચી શકી હતી. હાર્દિકની કંગાળ કેપ્ટનશિપ
રાંચીની પીચને હાર્દિક સમજી જ ના શક્યો. ટોસ જીતીને પ્રથમ બોલિંગ કરવાનો નિર્ણય સાચો હતો, પરંતુ તે પાવર પ્લેમાં જ માત ખાઈ ગયો. અસલમાં રાંચીની પીચમાંથી સ્પિનર્સને નવા બોલથી પણ સારો ટર્ન મળી રહ્યો હતો, પરંતુ હાર્દિકે ફાસ્ટ બોલર્સ પાસે બોલિંગ કરાવી અને તેઓ ઝૂડાયા. બાદમાં પણ ભારતના ફાસ્ટ બોલર્સની સારી એવી ધોલાઈ થઈ. ફ્લોપ ટોપ ઓર્ડર
રાંચીની પીચ પર ૧૭૭ રનનું લક્ષ્ય હાંસલ થઈ શકે તેવું હતું, પરંતુ ભારતના ટોપ ઓર્ડરે તેને મુશ્કેલ બનાવી દીધું. શુભમન ગિલ (૭), ઈશાન કિશન (૪) અને રાહુલ ત્રિપાઠી (૦) સસ્તામાં પેવેલિયનમાં પાછા ફર્યા. ૧૫ રનના સ્કોર પર જ ભારતની વિકેટ પડી ચૂકી હતી. અહીંથી જ મિડલ ઓર્ડર પર દબાણ આવી ગયું હતું. સેન્ટર ઘાતક કેપ્ટન સાબિત થયો
ન્યૂઝીલેન્ડનો કેપ્ટન મિચેલ સેન્ટર રાંચીની પીચને સમજવામાં સફળ રહ્યો. તેણે શરૂઆતથી જ સ્પિનર્સને મોરચા પર લગાવી દીધા. પરિણામ એ આવ્યું કે નવા બોલથી જલદી જલદી ત્રણ વિકેટ મળી ગઈ. ત્યાર બાદ તેણે ભારતીય બેટ્સમેનો પર દબાણ બનાવી રાખ્યું અને ખૂલીને બેટિંગ કરવા દીધી નહીં. ડેરિલ મિચેલની તોફાની ઇનિંગ્સ
ડેરિલ મિચેલ ફરી એક વાર પોતાની ટીમને સન્માનજનક સ્કોર સુધી પહોંચાડવામાં સફળ રહ્યો. તે જ્યારે ક્રીઝ પર આવ્યો ત્યારે ન્યૂઝીલેન્ડનો સ્કોર ૧૨.૫ ઓવરમાં ત્રણ વિકેટે ૧૦૩ રન હતો. અહીંથી તે એક છેડા પર ટકી રહ્યો. છેલ્લા ૭૩ રનમાંથી મિચેલે એકલે ૫૯ રન ઝૂડી કાઢ્યા. એટલે કે મિચેલે એકલા હાથે ન્યૂઝીલેન્ડને સન્માનજનક સ્કોર સુધી પહોંચાડી દીધું. તેણે ૩૦ બોલમાં ૫૯ રનની તોફાની ઇનિંગ્સ રમી હતી. તે પ્લેયર ઓફ ધ મેચ પણ જાહેર થયો હતો.