કોરોનાની અસર ક્રિકેટની રમત પર પણ પડી રહી છે. અગાઉ ઓસ્ટ્રેલિયાના ખેલાડીઓની સેલરીમાં કાપ મુકાયો અને હવે ઈંગ્લેન્ડના ખેલાડીઓ પોતાની સેલરીમાં ૧૫ ટકા કાપ માટે સંમત થઈ ચૂક્યા છે.
આની અસર હવે ભારતીય ક્રિકેટર્સ પર પણ પડી શકે છે. બોર્ડનાં સૂત્રોના જણાવ્યા અનુસાર બીસીસીઆઇમાં આ અંગે ચર્ચાઓ પણ શરૂ થઈ ચૂકી છે કે સેલેરી કટ માટે કયું મોડલ હોવું જોઈએ.
ભારતની વાત કરવામાં આવે તો ડોમેસ્ટિક ક્રિકેટનું પણ કેલેન્ડર હજુ સુધી આવ્યું નથી. તા.૧ જાન્યુઆરીથી ઘરેલુ ક્રિકેટ શરૂ કરવાની વાત કહેવામાં આવી છે. દર્શકો વિના આઇપીએલ યુએઈમાં રમાઈ રહી છે. ટિકિટમાંથી મળતી આવક ખતમ થઈ ગઈ છે. દરેક ટીમને સ્ટેડિયમમાં દર્શકોની ગેરહાજરીથી ૧૫થી ૨૦ કરોડ રૂપિયાનું નુકસાન થઈ રહ્યું છે. અન્ય આવક પણ અટકી ગઈ છે.
કોરોનાના કારણે ઈંગ્લેન્ડ ક્રિકેટ બોર્ડને ૯૫૦ કરોડ રૂપિયાના નુકસાનની આશંકા છે. બાયો સિક્યોર ગ્રાઉન્ડની વ્યવસ્થા, ખેલાડીઓની ચાર્ટર્ડ ફ્લાઇટ, ટીમના ક્વોરન્ટાઇનની વ્યવસ્થા વગેરેમાં બોર્ડનો ખર્ચ ઘણો વધી ગયો છે. ટિકિટમાંથી થતી કમાણી અટકી હોવાની સાથે-સાથે રાષ્ટ્રીય ટીમના સ્પોન્સર પણ ઓછા થઈ ગયા છે.
કોરોનાના કારણે ઘરેલુ ક્રિકેટ ઠપ છે, જોકે બીસીસીઆઇ જાન્યુઆરીમાં કેટલાક ફેરફાર સાથે રણજી ટ્રોફી યોજવાની તૈયારીમાં છે, પરંતુ ૩૮ ટીમની ચાર દિવસીય મેચ યોજવી પડકારજનક બની રહેશે. બીજી ઘરેલુ મેચ અથવા ટૂર્નામેન્ટ ના રમાવાથી નવા અને બિનઅનુભવી ખેલાડીઓના પ્રદર્શન પર નકારાત્મક અસર પડશે.
બીજા વિશ્વયુદ્ધ બાદના કારણે મોટી સંખ્યામાં ખેલાડીઓની કરિયર તબાહ થઈ ચૂકી હતી. આ વર્ષનો ટી-૨૦ વર્લ્ડકપ પણ સ્થગિત કરી દેવાયો. વર્તમાન ચેમ્પિયન વિન્ડીઝનો ક્રિસ ગેલ ૪૧ વર્ષથી વધુ ઉંમરનો થઈ ચૂક્યો છે. આવા ઘણા ખેલાડી છે, જેઓ વધતી ઉંમરના કારણે આગામી વર્લ્ડકપમાં રમી નહીં શકે.