મુલાકાત / ભારતના સેના પ્રમુખ એવા દેશોની મુલાકાતે જઈ રહ્યાં છે કે પાકિસ્તાન હચમચી જશે

જો કે હજી સુધી આ અહેવાલોની સત્તાવાર પુષ્ટિ થઈ નથી. પાકિસ્તાનના લશ્કરી અધિકારીઓ સાઉદી અરેબિયાની મુલાકાત લેતા રહેતા હોય છે, પરંતુ આ પહેલીવાર છે જ્યારે કોઈ ભારતીય સૈન્ય પ્રમુખ સાઉદી અરેબિયાની મુલાકાત લેશે. જનરલ નારવણેની મુલાકાતને ભારત સાથે સાઉદી અને UAE વચ્ચેના ગાઢ સંરક્ષણ સંબંધ તરીકે જોવામાં આવે છે.

નારવણે સાઉદી અરેબિયા અને UAEમાં બે દિવસ રોકાશે

સુત્રોના જણાવ્યા અનુસાર નારવણે સાઉદી અરેબિયા અને UAEમાં બે દિવસ રોકાશે અને બંને દેશોના ઉચ્ચ લશ્કરી અધિકારીઓને મળશે. આર્મી ચીફ નારવણે સાઉદીની 'નેશનલ ડિફેન્સ યુનિવર્સિટી'માં પણ એક કાર્યક્રમનું સંબોધન કરશે. આ અગાઉ ભારતના વિદેશમંત્રી એસ જયશંકર 24 નવેમ્બરના રોજ બહેરિન અને UAEના ત્રણ દિવસીય પ્રવાસ પર ગયા હતા. 

કાશ્મીર મુદ્દે સાઉદી અને પાકિસ્તાન વચ્ચે તિરાડ

ઇસ્લામિક દુનિયામાં સમીકરણ હવે પહેલા કરતા ઘણા બદલાઈ ગયા છે. એક જમાનામાં પાકિસ્તાન સાઉદીનું ખૂબ નિકટનું મિત્ર ગણાતું હતું પણ હવે કાશ્મીર મુદ્દે બંને દેશો વચ્ચે તિરાડ પડી ગઈ છે. અત્યારે પાકિસ્તાનના વિદેશમંત્રી શાહ મેહમુદ કુરેશીએ સાઉદીને ધમકી આપી છે કે જો તેઓ કાશ્મીરમાં પાકિસ્તાનનું સમર્થન નહીં કરે તો તેઓ પોતાના મિત્ર મુસ્લિમ દેશો સાથે અલગથી બેઠક બોલાવશે.

સાઉદીને મનાવવાની કોશિશ કરે છે પાકિસ્તાન

આ નિવેદનથી નારાજ સાઉદી કહ્યું કે પહેલા પાકિસ્તાન સાઉદીને તેમનું 3 અબજ ડોલરનું લેણું ચૂકવી દે પછી વાત કરે. સાઉદીને મનાવવા માટે પાકિસ્તાને તેમના સેના પ્રમુખ જનરલ કમર જાવેદ બાજવાને મોકલીને ડેમેજ કંટ્રોલની પણ કોશિશ કરી પણ તમામ પ્રયત્નો નિષ્ફ્ળ રહ્યા.

પાકિસ્તાન પોતાનું અલગ ઇસ્લામિક સંગઠન બનાવી રહ્યું છે

પાકિસ્તાન ટર્કી અને મલેશિયા સાથે મળીને હાલના ઇસ્લામિક સંગઠન (OIC)ની સમાંતર એક બીજું ઇસ્લામિક સંગઠન બનાવવાની તજવીજમાં છે. બીજી તરફ મોદી સરકારના આવ્યા પછી ખાડી દેશો સાથે ભારતની રણનૈતિક અને આર્થિક પાર્ટનરશીપ મજબૂત બની છે.

ભારતીય સેના પ્રમુખનો આ ત્રીજો વિદેશ પ્રવાસ 

નોંધનીય છે કે ભારતીય સેના પ્રમુખનો આ ત્રીજો વિદેશ પ્રવાસ છે. ઓક્ટોબર મહિનામાં તેઓ મ્યાનમાર ગયા હતા જ્યારે ગયા મહિને તેઓ નેપાળની મુલાકાતે ગયા હતા. 

હથિયારો ખરીદવાની વૈશ્વિક યાદીમાં ભારતનો સાઉદી પછી બીજો ક્રમ આવે છે. એવામાં બંને દેશો વચ્ચેના વ્યાપારી સંબંધો બંને દેશોને ફાયદાકારક નીવડી શકે છે.