લશ્કરી કવાયત કે ચેતવણી! / ચીનને જડબાતોડ જવાબ આપવા ભારતની તૈયારી!, ઉત્તરાખંડના ઓલીમાં 15 નવેમ્બરથી શરૂ થશે ઇન્ડિયા-અમેરિકાનો યુદ્ધાભ્યાસ

• તણાવ વચ્ચે ભારત-યુએસ આર્મીનો સંયુક્ત યુદ્ધાભ્યાસ
• આ સંયુક્ત સૈન્ય અભ્યાસ 2 ડિસેમ્બર સુધી ચાલશે
• રાજસ્થાનમાં ઓસ્ટ્રા-હિન્દ અભ્યાસ

લદ્દાખમાં ઘૂસણખોરી અને વિસ્તરણવાદી યોજનાઓ અંગે ચીનને ચેતવણી આપવા માટે ભારતીય અને અમેરિકન સેના ઉત્તરાખંડના ઔલી અને બંગાળની ખાડીમાં સંયુક્ત યુદ્ધાભ્યાસ (Joint Exercise) કરવા જઈ રહી છે. ભારત અને અમેરિકા આ સંયુક્ત સૈન્ય અભ્યાસ 15 નવેમ્બરથી 2 ડિસેમ્બર સુધી કરશે.

ઘણા દેશોની સાથે મોટા પાયે કરાશે સૈન્ય અભ્યાસ
વાસ્તવિક નિયંત્રણ રેખા (LAC) પર ચીન સાથે ચાલી રહેલા તણાવની વચ્ચે ભારતે અમેરિકા સહિત ઘણા દેશોની સાથે મોટા પાયે સૈન્ય અભ્યાસ કરવાનું નક્કી કર્યું છે. ઉત્તરાખંડના ઔલીમાં ભારત અને અમેરિકા વચ્ચે જમીની સૈન્ય અભ્યાસ થશે. તે LACથી લગભગ 100 કિમીના અંતરે આવેલું છે. આ દરમિયાન બંગાળની ખાડીમાં યુદ્ધ જહાજ, સબમરીન, ફાઈટર એરક્રાફ્ટ અને હેલિકોપ્ટર તૈનાત કરવામાં આવશે. બુધવારે જ ભારતે બંગાળની ખાડીમાં સિંગાપોરની સાથે સૈન્ય અભ્યાસ શરૂ કર્યો.

8થી 18 નવેમ્બર સુધી માલાબાર અભ્યાસ
આ દરમિયાન 8થી 18 નવેમ્બર સુધી માલાબાર યુદ્ધાભ્યાસ પણ થશે. તેમાં ક્વોડ દેશો ભારત, અમેરિકા, જાપાન અને ઓસ્ટ્રેલિયાની સેનાઓ સામેલ થશે. ખરેખર ભારતે ક્વોડ દેશોની સાથે અનેક સૈન્ય અભ્યાસની યોજના બનાવી છે. તેમાં માલાબાર અભ્યાસ ઉપરાંત ચીનની પાસે વાસ્તવિક નિયંત્રણ રેખા (LAC) નજીક અમેરિકાની સાથે ઉંચાઈ પર સંયુક્ત યુદ્ધાભ્યાસ પણ સામેલ છે. 

રાજસ્થાનમાં ઓસ્ટ્રા-હિન્દ અભ્યાસ
બીજી તરફ, ઓસ્ટ્રેલિયા અને ભારતની સેનાઓ પણ પ્રથમ વખત 28 નવેમ્બરથી 11 ડિસેમ્બર સુધી રાજસ્થાનમાં મહાજન ફીલ્ડ ફાયરિંગ રેન્જ ખાતે 'ઓસ્ટ્રા-હિન્દ' અભ્યાસ કરશે. આપને જણાવી દઈએ કે, ચીન સમગ્ર ઈન્ડો-પેસિફિક ક્ષેત્રમાં વિસ્તરણવાદી ગતિવિધિઓમાં સામેલ છે. તાઈવાનને લઈને પણ તેના ઈરાદા તાજેતરમાં સામે આવ્યા હતા. જે બાદ અમેરિકાએ તેને ઘેરી લીધું હતું. ભારતના લદ્દાખ તો ભૂટાનના ડોકલામમાં તેણે(ચીને) ઘૂસણખોરી કરવાનો પ્રયાસ કર્યો હતો. દાયકાઓ પછી લદ્દાખમાં બંને દેશોની સેનાઓ વચ્ચે સૈન્ય મુકાબલો થયો હતો, ત્યારબાદ સૈન્ય વાટાઘાટો શરૂ થઈ અને ધીમે ધીમે સેનાની વાપસી શરૂ થઈ.