ભારત ઈરાનને ક્રૂડ ઓઈલનું પેમેન્ટ રૂપિયામાં કરી શકશે

ક્રૂડ ઓઇલની આયાતને લઇને ઇરાન સાથે એક મહત્ત્વની સમજૂતી થઇ છે. ભારતે ઇરાનને ક્રૂડ ઓઇલનું પેમેન્ટ રૂપિયાની કરન્સીમાં કરવા કરાર કર્યો છે. અત્રે ઉલ્લેખનીય છે કે અમેરિકાએ ભારત અને સાત અન્ય દેશોને પ્રતિબંધ છતાં ઇરાન પાસેથી ક્રૂડ ઓઇલ ખરીદવાની છૂટ આપી છે. ઇરાન પર આ પ્રતિબંધ ૫ નવેમ્બરથી લાગુ થયો છે. ત્યાર બાદ રૂપિયામાં પેમેન્ટ કરવા માટે એમઓયુ કરાયો હતો.

સૂત્રોના જણાવ્યા અનુસાર ભારતીય રિફાઇનરી કંપનીઓ નેશનલ ઇરાનિયન ઓઇલ કંપનીના યુકો બેન્ક ખાતામાં રૂપિયામાં પેમેન્ટ કરશે. તેમાંથી અડધી રકમ ઇરાનને ભારત દ્વારા કરવામાં આવેલી વસ્તુઓની નિકાસના પેમેન્ટ માટે રાખવામાં આવશે.

અમેરિકાએ પ્રતિબંધમાં આપેલ છુટ હેઠળ ભારત દ્વારા ઇરાનને અનાજ દવા અને તબીબી ઉપકરણોની નિકાસ કરવામાં આવે છે. ભારતને અમેરિકા તરફથી આ છૂટ આયાત ઘટાડવા તથા એસ્ક્રો પેમેન્ટ બાદ મળી છે.

આ ૧૮૦ દિવસની છૂટ દરમિયાન ભારત દરરોજ ઇરાન પાસેથી મહત્તમ ત્રણ લાખ બેરલ ક્રૂડની આયાત કરી શકશે. આ વર્ષે ભારત ઇરાન પાસેથી ક્રૂડ તેલની સરેરાશ આયાત પ્રતિદિન પાંચ લાખ ૬૦ હજાર બેરલ રહી છે.

ક્રૂડના ઉત્પાદનમાં કાપ મૂકવા ઓપેક દેશો સંમત ઓપેકના પ્રતિનિધિઓએ જણાવ્યું છે કે ઓપેક દેશો ક્રૂડ ઓઈલના ઉત્પાદનમાં કાપ મૂકવા સંમત થયા છે જોકે હજુ સુધી તેના આખરી ડેટા જારી કરવામાં આવ્યા નથી.

સાઉદી ઊર્જા પ્રધાન ખાલિદ અલ ફલીહે અગાઉ જણાવ્યું હતું કે પેટ્રોલિયમ દેશોની નિકાસ કરનાર દેશના સંગઠને ક્રૂડના ઉત્પાદનમાં કાપ મૂકવાની જરૂર છે. આ અંગે આજે સાંજે સુધીમાં આખરી નિર્ણય લેવાશે.