કેન્દ્ર સરકાર દેશના લઘુ અને મધ્યમ ઉદ્યોગને પ્રોત્સાહિત કરવા આગામી બજેટમાં ૩૦૦ જેટલી ચીજવસ્તુ પર કસ્ટમ ડ્યૂટી વધારશે. આ ચીજવસ્તુમાં રમકડાં, ફર્નિચર, ફૂટવેર, કોટેડ પેપર, રબરની વસ્તુઓનો સમાવેશ થશે. કેન્દ્ર સરકારનું આ પગલું ઘરેલુ ઉદ્યોગને રાહત અને રોજગાર વધારવા ઉપરાંત આયાતમાં ઘટાડો અને મહેસૂલ વધારવામાં સહાયક સાબિત થશે. આમાં કેટલાય એવા ઉદ્યોગ છે જે લઘુ અને મધ્યમ સેક્ટર સાથે સંકળાયેલ છે અને મોટી સંખ્યામાં રોજગાર આપે છે.
બજેટમાં ૩૦૦ જેટલી ચીજવસ્તુ પર વધારો
કસ્ટમ ડ્યૂટી વધશે
રોજગાર વધારવા ઉપરાંત આયાતમાં ઘટાડો
3૦૦થી વધુ ચીજવસ્તુ પર બેઝિક કસ્ટમ ડ્યૂટીને રેશનેલાઇઝ કરવાનો પ્રસ્તાવ
પોતાની બજેટ ભલામણમાં કેન્દ્રીય વાણિજ્ય અને ઉદ્યોગ મંત્રાલયે ફર્નિચર, કેમિકલ્સ, રબર, કોટેડ પેપર અને પેપર બોર્ડ સહિત કેટલાય સેક્ટર્સમાં ૩૦૦થી વધુ ચીજવસ્તુ પર બેઝિક કસ્ટમ ડ્યૂટીને રેશનેલાઇઝ કરવાનો પ્રસ્તાવ રજૂ કર્યો છે. મંત્રાલયે ફૂટવેર અને તેની સાથે સંકળાયેલ પ્રોડક્ટ્સ પર કસ્ટમ ડ્યૂટી હાલ જે ૨૫ ટકા છે તે વધારીને ૩૫ ટકા કરવા માટે પ્રસ્તાવ રજૂ કરેલ છે. સૂત્રોનું કહેવું છે કે સસ્તાં ફૂટવેરની મોટા પ્રમાણમાં આયાત કરાય છે અને તેના પર ઇમ્પોર્ટ ડ્યૂટી વધવાથી ઘરેલુ બજારમાં ભાવ સ્પર્ધાત્મક રહેશે.
લાકડાં, મેટલ અને પ્લાસ્ટિકનાં રમકડાં પર કસ્ટમ ડ્યૂટી
રબર માટે નવા ન્યૂમેટિક ટાયર પર કસ્ટમ ડ્યૂટી હાલ ૧૦થી ૧૫ ટકા છે તે વધારીને ૪૦ ટકા કરવાનો પ્રસ્તાવ રજૂ કર્યો છે. આ ઉપરાંત મંત્રાલયે લાકડાના ફર્નિચર પર વર્તમાન કસ્ટમ ડ્યૂટી ૨૦ ટકા છે તે વધારીને ૩૦ ટકા કરવા ભલામણ કરી છે, જ્યારે કોટેડ પેપર, પેપર બોર્ડ અને હસ્ત નિર્મિત પેપર્સ પર ડ્યૂટી બમણી કરીને ૨૦ ટકા કરવાનો પ્રસ્તાવ કર્યો છે. લાકડાં, મેટલ અને પ્લાસ્ટિકનાં રમકડાં પર કસ્ટમ ડ્યૂટી હાલ ૨૦ ટકા છે તે વધારીને ૧૦૦ ટકા કરવાનો પ્રસ્તાવ રજૂ કર્યો છે.
રમકડાંની આયાત
૨૦૧૮-૧૯માં રમકડાંની આયાત ૩૦.૨ કરોડ ડોલરની થઇ હતી, જેમાં ૨૮.૧૮ કરોડ ડોલરની આયાત ચીન અને હોંગકોંગથી કરવામાં આવી હતી.