રાજકીય ઉથલપાથલ / જાણો કોણ બની શકે છે પાકિસ્તાનના નવા વડાપ્રધાન, ઇમરાનની પાર્ટીએ આપ્યું ચોંકાવનારું નામ

• ઈમરાન ખાનની પાર્ટીએ જસ્ટિસના નામનો પ્રસ્તાવ મૂક્યો
• ઇમરાન ખાન 15 દિવસ સુધી PM તરીકે ચાલુ રહી શકે છે
• પાકિસ્તાનમાં આગામી 90 દિવસમાં ચૂંટણી યોજાઈ શકે છે

ઈમરાન ખાનની પાર્ટીએ પાકિસ્તાનના કાર્યવાહક વડાપ્રધાન માટે જસ્ટિસ આર અઝમત સઈદનું નામ નક્કી કર્યું છે. જસ્ટિસ અઝમત સઈદ એ બેંચના ભાગીદાર હતા કે જેઓએ નવાઝ શરીફને પનામા પેપર લીક મામલે દોષી જાહેર કર્યા હતાં. સઈદે વર્ષ 1997માં નવાઝ શરીફ દ્વારા સ્થાપિત એહત્સાબ બ્યુરોના વિશેષ વકીલ તરીકે પણ સેવા આપી હતી.

15 દિવસ સુધી ઇમરાન ખાન PM તરીકે રહી શકે છે પરંતુ....

વાસ્તવમાં, પાકિસ્તાનના રાષ્ટ્રપતિ આરિફ અલ્વીએ રવિવારે અવિશ્વાસ પ્રસ્તાવ નામંજૂર થયા બાદ નેશનલ એસેમ્બલીને ભંગ કરી દીધી હતી. ત્યાર બાદ ઈમરાન ખાનને પાકિસ્તાનના વડાપ્રધાન પદ પરથી હટાવી દેવામાં આવ્યા હતાં. જો કે, પાકિસ્તાનના બંધારણની કલમ 224 અંતર્ગત તેઓ કાર્યવાહક વડાપ્રધાનની નિમણૂંક ન થાય ત્યાં સુધી 15 દિવસ સુધી વડાપ્રધાન તરીકે ચાલુ રહી શકે છે, પરંતુ તેમની પાસે નિર્ણય લેવાની સત્તા નથી.

ઈમરાન ખાને રવિવારનાં રોજ તુરંત રાષ્ટ્રને સંબોધિત કરતા નવી ચૂંટણીઓનું આહ્વાન કર્યું હતું અને પાકિસ્તાનીઓને ચૂંટણી માટે તૈયાર રહેવા કહ્યું હતું. બીજી તરફ, વિપક્ષે ઠરાવને નામંજૂર કરવાના સરકારના કાર્યને 'ગેરબંધારણીય' ગણાવ્યો હતો. પાકિસ્તાનમાં હવે આગામી 90 દિવસમાં ચૂંટણી યોજાઈ શકે છે. રાષ્ટ્રપતિ દ્વારા સંસદ ભંગ કર્યા બાદ પાકિસ્તાનનું રાજકીય સંકટ સુપ્રીમ કોર્ટ સુધી પહોંચ્યું હતું. પરંતુ પાકિસ્તાનના ચીફ જસ્ટિસ (CJP) ઉમર અતા બંદિયાલની આગેવાની હેઠળની ત્રણ સભ્યોની પાકિસ્તાન સુપ્રીમ કોર્ટની બેંચે ઈમરાન ખાન વિરુદ્ધ અવિશ્વાસ પ્રસ્તાવને ફગાવી દેવાના નેશનલ એસેમ્બલીના સ્પીકરના નિર્ણયને સ્થગિત કરવાનો ઇનકાર કર્યો હતો. એટલે કે ઈમરાન ખાનને હાલ રાહત મળી છે.

ઉલ્લેખનીય છે કે, ગઈ કાલે ઈમરાન ખાન સામે સંસદમાં રજૂ થયેલા અવિશ્વાસ પ્રસ્તાવ પર વોટિંગ થાય તે પહેલાં મોટી રાજકીય રમત રમાઈ હતી. પાકિસ્તાન સંસદના ડે. સ્પિકરે વડાપ્રધાન ઈમરાન ખાન સામે રજૂ કરાયેલ અવિશ્વાસ પ્રસ્તાવને જ રદ્દ કરી ઈમરાન ખાનને નવું જીવતદાન આપી દીધું હતું. ત્યાર બાદ રાષ્ટ્રપતિએ સંસદને ભંગ કરીને ઈમરાન ખાનને પ્રધાનમંત્રી પદ પરથી પણ હટાવી દીધા હતાં.