ઈન્કમટેક્ષ / ITR ફાઇલિંગ નિયમોમાં થયા મોટા ફેરફારો, નાણા મંત્રાલયે જે આદેશ આપ્યા તે જાણી લેવા જરૂરી

• આવકવેરો ભરવાની છેલ્લી તારીખ 31મી જુલાઈ
• સરકારે ટેક્સ રિટર્ન ભરવાના નિયમોમાં ફેરફાર કર્યો 
• નવા નિયમ હેઠળ હવે વધુને વધુ લોકોને ટેક્સના દાયરામાં લાવી શકાશે

જો તમે હજુ સુધી તમારું ઈન્કમટેક્સ રિટર્ન ભર્યું નથી, તો તરત જ ભરી દેજો. કારણ કે, અત્યાર સુધી આવકવેરા રિટર્ન ભરવાની છેલ્લી તારીખ 31મી જુલાઈ છે. જોકે સોશિયલ મીડિયાથી લઈ ઘણી જગ્યાએ તેને વધારવાની માંગ કરવામાં આવી રહી છે. પરંતુ, સરકારે તેની છેલ્લી તારીખ વધારવાનો સ્પષ્ટ ઇનકાર કરી દીધો છે. એટલે કે,  હવે તમારે કોઈપણ સંજોગોમાં 31 જુલાઈ પહેલા આવકવેરો ભરવો પડશે.

જો તમે પણ ટેક્સ પેયર છો તો આ સમાચાર તમારા માટે ખૂબ જ મહત્વપૂર્ણ છે. સરકારે ટેક્સ રિટર્ન ભરવાના નિયમોમાં ફેરફાર કર્યો છે. નાણા મંત્રાલયે વધુ લોકોને ટેક્સ બ્રેકેટમાં લાવવા માટે આવકવેરા ફાઇલિંગનો વ્યાપ વધાર્યો છે. નોંધનીય છે કે, થોડા સમય પહેલા નાણાં મંત્રાલયે નોટિસ જારી કરીને આ અંગે જાણકારી આપી હતી. આ નોટિફિકેશન મુજબ હવે અલગ-અલગ આવક જૂથ અને આવક ધરાવતા લોકોએ પણ આવકવેરા રિટર્ન ભરવાનું રહેશે. નવા નિયમ હેઠળ હવે વધુને વધુ લોકોને ટેક્સના દાયરામાં લાવી શકાશે. આ નવા નિયમો 21 એપ્રિલથી અમલી માનવામાં આવશે.

નવા નિયમો શું છે ?

નવા નિયમ અનુસાર જો કોઈપણ વ્યવસાયમાં વેચાણ-ટર્નઓવર અથવા આવક 60 લાખથી વધુ છે, તો ઉદ્યોગપતિએ રિટર્ન ફાઇલ કરવું પડશે. જો કોઈ પગારદાર વ્યક્તિની કમાણી વાર્ષિક 10 લાખ રૂપિયાથી વધુ હોય તો પણ તેણે ITR ફાઈલ કરવી પડશે. TDS અને TCSની રકમ એક વર્ષમાં 25,000 રૂપિયાથી વધુ હોય તો પણ આવકવેરા રિટર્ન ભરવાનું રહેશે. તમને જણાવી દઈએ કે, 60 વર્ષ કે તેથી વધુ ઉંમરના કરદાતાઓ માટે TDS + TCSની મર્યાદા 50,000 રૂપિયા રાખવામાં આવી છે.

આ સાથે નવા નોટિફિકેશન અનુસાર જો બેંક સેવિંગ એકાઉન્ટમાં 1 વર્ષમાં 50 લાખ કે તેથી વધુ જમા રકમ હોય તો આવા થાપણદારોએ તેમનું ટેક્સ રિટર્ન પણ ભરવું પડશે. નવા નિયમો 21 એપ્રિલથી લાગુ ગણવામાં આવશે. સરકારનું માનવું છે કે, નવા ફેરફારો સાથે આવકવેરા ભરવાનો વ્યાપ વધશે અને વધુને વધુ લોકો ટેક્સના દાયરામાં આવી શકશે.