સ્પોર્ટ્સ / ICC વર્લ્ડ ટેસ્ટ ચેમ્પિયનશિપમાં ત્રીજા સ્થાને પહોંચ્યુ ઇંગલેન્ડ

• ઇંગલેન્ડની થઇ શાનદાર જીત
• વિન્ડીઝ સામે વરસાદગ્રસ્ત અંતિમ ટેસ્ટ

વિન્ડીઝ સામે વરસાદગ્રસ્ત અંતિમ ટેસ્ટ 269 રનના મોટા અંતરથી જીતીને ઈંગ્લેન્ડે આઇસીસી વર્લ્ડ ટેસ્ટ ચેમ્પિયનશિપના પોઇન્ટ ટેબલમાં ત્રીજું સ્થાન હાંસલ કરી લીધું છે. જોકે આ પહેલાં પણ ઈંગ્લેન્ડની ટીમ બીજી ટેસ્ટ મેચ જીતીને ત્રીજા નંબર પર પહોંચી જ ગઈ હતી, પરંતુ હવે ઈંગ્લેન્ડે 226 પોઇન્ટ સાથે ત્રીજું સ્થાન પાક્કું કરી લીધું છે.

આઇસીસી વર્લ્ડ ટેસ્ટ ચેમ્પિયનશિપના વર્તમાન પોઇન્ટ ટેબલની વાત કરવામાં આવે તો તેમાં ભારતીય ટીમ 360 પોઇન્ટ સાથે ટોચના સ્થાને છે. ઓસ્ટ્રેલિયા 296 પોઇન્ટ સાથે બીજા અને હવે ઈંગ્લેન્ડ 226 પોઇન્ટ સાથે ત્રીજા સ્થાન પહોંચી ગયું છે. ન્યૂઝીલેન્ડ 180 પોઇન્ટ સાથે ચોથા સ્થાને બિરાજી રહ્યું છે. 140 પોઇન્ટ સાથે પાકિસ્તાન પાંચમા સ્થાને અને 80 પોઇન્ટ સાથે શ્રીલંકા છઠ્ઠા સ્થાન પર છે, જ્યારે વિન્ડીઝના ફક્ત 40 પોઇન્ટ છે અને તે સાતમા સ્થાને છે. આઠમા સ્થાને રહેલા દક્ષિણ આફ્રિકાના ૨૪ પોઇન્ટ છે અને છેલ્લા સ્થાને રહેલા બાંગ્લાદેશે હજુ સુધી વર્લ્ડ ટેસ્ટ ચેમ્પિયનશિપના પોઇન્ટ ટેબલમાં ખાતું ખોલ્યું નથી.

શ્રેણીની શરૂઆત પહેલાં ઈંગ્લેન્ડની ટીમ 146 પોઇન્ટ સાથે ચોથા સ્થાને હતી,  જે ન્યૂઝીલેન્ડથી 34 પોઇન્ટ ઓછા હતા. આઇસીસી વર્લ્ડ ટેસ્ટ ચેમ્પિયનશિપમાં ઈંગ્લેન્ડે ઓસ્ટ્રેલિયા સામે પાંચ મેચની શ્રેણી 2-2થી ડ્રો રમી હતી, જ્યારે દક્ષિણ આપ્રિકા સામે ચાર મેચની શ્રેણી 3-1થી જીતી લીધી હતી. આમ ઈંગ્લેન્ડની ટીમે અત્યાર સુધીમાં ત્રણ શ્રેણી રમી છે, પરંતુ ઈંગ્લેન્ડની ટીમ સૌથી વધુ 12 ટેસ્ટ મેચ રમી છે.

વિન્ડીઝની ગત શ્રેણી ભારતની ધરતી પર હતી, જેમાં તેને 0-2થી હારનો સામનો કરવો પડ્યો હતો. ઈંગ્લેન્ડની ટીમ હવે પાકિસ્તાન સામે શ્રેણી રમવાની છે, જેની પ્રથમ મેચ 5 ઓગસ્ટથી શરૂ થશે. વર્લ્ડ ટેસ્ટ ચેમ્પિયનશિપ અંતર્ગત પ્રત્યેક શ્રેણીમાં 120 પોઇન્ટ દાવ પર લાગે છે, જેને શ્રેણીની મેચની સંખ્યા અનુસાર વહેંચવામાં આવે છે.

વર્લ્ડ ટેસ્ટ ચેમ્પિયનશિપમાં સ્ટુઅર્ટ બ્રોડની સર્વશ્રેષ્ઠ બોલિંગસ્ટુઅર્ટ બ્રોડ વર્લ્ડ ટેસ્ટ ચેમ્પિયનશિપમાં અત્યાર સુધી એક ટેસ્ટ મેચમાં સૌથી શાનદાર બોલિંગ કરનારો બોલર બની ગયો છે. બ્રોડે વિન્ડીઝ સામેની અંતિમ ટેસ્ટમાં માત્ર 67 રન આપીને  કુલ 10 વિકેટ ઝડપી. આમ  તેણે નાથન લિયોનને પાછળ છોડી દીધો છે. નાથનના નામે અત્યાર સુધી વર્લ્ડ ટેસ્ટ ચેમ્પિયનશિપમાં બેસ્ટ બોલિંગ કરવાનો રેકોર્ડ નોંધાયો હતો. લિયોને ન્યૂઝીલેન્ડ સામે રમાયેલી ટેસ્ટમાં 118 રન આપીને 10 વિકેટ ઝડપી હતી, પરંતુ હવે બ્રોડ તેનાથી આગળ નીકળી ગયો છે. વિન્ડીઝ સામે પ્રથમ ઇનિંગ્સમાં બ્રોડે 31 રનમાં છ વિકેટ અને બીજી ઇનિંગ્સમાં 36 રન આપીને ચાર વિકેટ ઝડપી હતી. આ યાદીમાં 78 રનમાં નવ વિકેટ ઝડપીને ત્રીજા સ્થાન પર ભારતનો ઈશાંત શર્મા છે.