નિવેદન / દિગ્ગજ બેટ્સમેને કહ્યુ કે, ''કાશ લોકેશ રાહુલ જેવી ટેક્નિક મારી પાસે હોત તો.. ''

આ સાથે લારાએ તેમ પણ જણાવ્યું કે, મને વિરાટ કોહલી માટે બહુ માન છે. T-20 વર્લ્ડ કપમાં ઓસ્ટ્રેલિયાને ઘરઆંગણે ફાયદો થશે, પરંતુ ટીમ ઇન્ડિયા અને વેસ્ટ ઇન્ડિઝ તેને ટક્કર આપશે અને સારો પડકાર ફેંકશે.

એક જાણીતી વેબસાઈટને આપેલા એક ઇન્ટરવ્યૂમાં લારાએ ભારતના ન્યૂઝીલેન્ડ પ્રવાસ અંગે વાત કરી હતી. તેના અનુસાર ભારતીય ટીમ પરિસ્થિતિ અનુસાર રમી શકી નહોતી. જોકે તેનાથી વધુ હેરાન થવાની જરૂર નથી. રાહુલ અંગે વાત કરતા તેણે જણાવ્યું છે, અત્યારે રાહુલ આખા વર્લ્ડમાં મારો ફેવરિટ પ્લેયર છે. તેની બેટિંગ જોઈને મને બહુ આનંદ થાય છે. તેની ટેક્નિક ગજબની છે. કાશ મારી પાસે પણ આવી ટેક્નિક હોત. તેનું બેટ સીધું આવે છે અને માથું બોલ ઉપર રહે છે.

લારાએ કહ્યું કે, "રાહુલની ટેક્નિકમાં કોઈ ખામી નથી. તે સીધા બેટે રમે છે અને હેડ પોઝિશન પણ બરોબર છે. હું નથી જાણતો કે તે ટીમ ઇન્ડિયાની ટેસ્ટ ટીમમાં કેમ નથી. કદાચ કારણકે તેણે પહેલા સારું પ્રદર્શન નહોતું કર્યું. મારુ માનવું છે કે રાહુલ દરેક ફોર્મેટનો પ્લેયર છે. તેને ટેસ્ટ ટીમમાં જરૂર હોવું જોઈએ.

લારાને પૂછવામાં આવ્યું કે રાહુલ સિવાય તેને અન્ય ક્યાં પ્લેયર્સ ગમે છે? તેણે કહ્યું કે, "વિરાટ કોહલી, તેના માટે મને બહુ માન છે. રોહિત શર્માને બેટિંગ કરતા જોવાની અલગ જ મજા છે. વિચારો રોહિતે એક જ વર્લ્ડ કપમાં પાંચ સેન્ચુરી મારી છે. વિન્ડીઝની વાત કરું તો નિકોલસ પૂરન સારું રમી રહ્યો છે. તે હવે જવાબદારી સાથે રમતા જાણે છે.