- આ સ્ટાર ખેલાડીને લાંબા સમયથી ટીમ ઈન્ડિયામાં તક મળી નથી
- છેલ્લે વર્ષ 2021માં ભારત માટે વનડે રમતા જોવા મળ્યો હતો
- પૃથ્વી શૉએ સિલેકટ ન થવા પર નારાજગી વ્યક્ત કરી
હાલ ટીમ ઈન્ડિયા સાઉથ આફ્રિકા સામે વનડે સીરિઝ રમી રહી છે અને તેની પહેલી મેચમાં ટીમ ઇન્ડિયાને હારનો સામનો કરવો પડ્યો હતો. એવામાં ટીમ ઇન્ડિયાના સિલેક્ટેડ ખેલાડીઓને લઈને લોકોના મનમાં સવાલ ઉઠી રહ્યા છે. હાલ એક એવા જ ખેલાડીએ આ વિશે વાત કરી હતી કે એમને લાંબા સમયથી ટીમ ઈન્ડિયામાં તક મળી નથી. યુવા બેટ્સમેન પૃથ્વી શૉ હાલ સ્થાનિક ક્રિકેટમાં ખૂબ સારું પ્રદર્શન કરી રહ્યા છે અને એમને દિલીપ ટ્રોફીમાં પણ બે સદી ફટકારી હતી એ છતાં પણ સાઉથ આફ્રિકા સામેની વનડે સીરીઝ માટે ટીમ ઈન્ડિયાની જાહેરાત કરવામાં આવી ત્યારે પૃથ્વી શૉનું નામ નહોતું.
પૃથ્વી શૉએ નારાજગી વ્યક્ત કરી
જો કે એ પછી પૃથ્વી શૉએ હવે ટીમમાં પસંદ ન થવા પર નારાજગી વ્યક્ત કરી હતી. એમને આ વિશે વાત કરતાં કહ્યું હતું કે, ' હું ખૂબ જ નિરાશ થયો છું. હું સખત મહેનત કરીને રન બનાવી રહ્યો છું પણ મને તક નથી મળી રહી. જો કે આમાં કોઈ સમસ્યા નથી. જ્યારે નેશનલ સિલેક્ટર્સને લાગશે કે હું તૈયાર છું એ સમયે તેઓ મને જરૂર બોલાવશે. મને જ્યારે પણ મોકો મળે છે ત્યારે હું કઇંક કરવાની પૂરી કોશિશ કરું છું.'
મેં ઘણું વજન પણ ઘટાડી લીધું - પૃથ્વી શૉ
એક મીડિયા સાથે વાતચીત કરતાં પૃથ્વી શૉ એ કહ્યું હતું કે, ' મેં મારી બોલિંગમા વધુ કોઈ બદલાવ નથી કર્યો પણ મારી ફિટનેસને લઈને મેં ઘણી મહેનત કરી છે અને મેં ઘણું વજન પણ ઘટાડ્યું છે. આઈપીએલ પછી મેં 8 કિલો વજન ઘટાડ્યું છે. હવે હું જીમમાં ઘણો સમય વિતાવી રહ્યો છું. આ સાથે જ કોલ્ડ ડ્રિંક્સ અને મીઠાઈઓ બંધ કરી દીધી છે અને ચાઈનીઝ ફૂડ પણ નથી ખાતો. આ બધા સિવાય હવે મોટાભાગનો સમય હું પોતાની સાથે વિતાવું છું. હું મારા રૂમમાં રહું છું અને લોકોને મળવાનું ઓછું કરી દીધું છે. હું અરીસા સામે મારી જાત સાથે વાત કરું છું. મને કોઈએ આવું કરવા માટે નથી કહ્યું પણ હું આ બધુ મારી જાતને વધુ સારી બનાવવા માટે કરી રહ્યો છું.'
જણાવી દઈએ કે પૃથ્વી શૉએ 2020માં ભારત માટે છેલ્લી ટેસ્ટ મેચ રમી હતી અને છેલ્લે વર્ષ 2021માં ભારત માટે વનડે રમતા જોવા મળ્યો હતો. આ વર્ષે પૃથ્વી શૉએ રણજી ટ્રોફી, દિલીપ ટ્રોફી અને ઇન્ડિયા-એ માટે સારું પ્રદર્શન કર્યું છે હતું એ છતાં પણ તેને ટીમ ઈન્ડિયામાં તક મળી નથી.
