ગુજરાતમાં કોરોના વાયરસના સતત વધતાં કેસની વચ્ચે 108 સેવામાં કંટ્રોલ રૂમની કામગીરીમાં વધારો થયો છે.
108 સેવાની કામગીરી બમણી થઇ
છેલ્લા 7 દિવસમાં રેકોર્ડબ્રેક 1,82,633 ઇમર્જન્સી કોલ્સ આવ્યા
સૌથી વધુ ફોન અમદાવાદથી આવે છે
કોરોના વાયરસના કારણે આખું ગુજરાત ટેન્શનમાં છે અને દિવસેને દિવસે મહામારી ભયંકર સ્વરૂપ ધારણ કરી રહી છે. ત્યારે હાલની સ્થિતિ પ્રમાણે જોઇએ તો 108 ઇમરજન્સી સેવાની કામગીરી બમણી થઇ ગઇ છે.
સૌથી વધુ કૉલ અમદાવાદમાંથી
છેલ્લા 7 દિવસમાં 108 હેલ્પલાઇન કોલની સંખ્યામાં ધરખમ વધારો થયો છે. 108માં લગભગ 1 લાખ 82 હજાર 633 ઇમર્જન્સી કોલ્સ આવ્યા છે. આમ જોઇએ તો 108ની સેવામાં અત્યાર સુધીના રેકોર્ડબ્રેક કોલ્સ છે તથા એક સાથે 120 કોલને જવાબ આપવામાં આવી રહ્યાં છે. 108 ઇમર્જન્સી ટીમે કોલ્સ વધતા સ્ટાફ ડબલ કરી દીધો છે. જેમાં સૌથી વધુ ફોન કોવિડના દર્દિઓના આવી રહ્યાં છે. તેમજ સૌથી વધુ ફોન અમદાવાદથી આવી રહ્યાં છે.
રાઉન્ડ ધ ક્લોક 108ના કર્મચારીઓ કરી રહ્યા છે કામ
ગુજરાતમાં પરિસ્થિતિ એવી ગંભીર છે કે 1 સેકન્ડ પણ 108ના ફોન ફ્રી રહેતા નથી. રાઉન્ડ ધ ક્લોક 108ના કર્મચારીઓ કામ કરી રહ્યાં છે. આથી VTV ન્યૂઝની ટીમ 108 સેવાના સ્ટેટ કંટ્રોલ રૂમ પહોંચી હતી. જયાં રોજના સરેરાશ 26 હજારથી વધુ ફોન આવી રહ્યાં છે. આ સમયે કુલ 660 એમ્બ્યુલન્સ વાન 24 કલાક દોડી રહી છે.
ગુજરાતમાં કોરોનાની સ્થિતિ
રાજ્ય સરકાર દ્વારા જાહેર કરવામાં આવેલ આંકડા પ્રમાણે રાજ્યમાં ગત 24 કલાકમાં કોરોનાના 10,340 નવા કેસ નોંધાયા છે તો સંક્રમણના કારણએ 110 લોકોના મોત નિપજ્યા છે. અને 3,981 દર્દીઓ સાજા થયાં છે. આ સાથે જ અત્યાર સુધીમાં 3,37,545 દર્દીઓ કોરોના મુક્ત થયાં છે.
સુરત અને અમદાવાદમાં કોરોના બેકાબૂ
ગુજરાતમાં રસીકરણની કામગીરી ચાલુ હોવા છતાં બીજી તરફ પરિસ્થિતિ બેફામ છે. કોરોનાના કેસમાં સતત વધારો થતા ચિંતા વધી છે. અમદાવાદ શહેરમાં રાજ્યના સૌથી વધુ 3641 કેસ તો અમદાવાદ ગ્રામ્યમાં 53 કેસ નોંધાયા છે. જ્યારે સુરત શહેરમાં 1929 નવા કેસ, જ્યારે સુરત ગ્રામ્યમાં 496 કેસ નોંધાયા છે. વડોદરા શહેરમાં 325 કેસ, જ્યારે ગ્રામ્યમાં 184 કેસ નોંધાયા. રાજકોટ શહેરમાં 683 કેસ અને ગ્રામ્યમાં 128 કેસ નોંધાયા છે.