સ્વાસ્થ્ય / આ કારણોથી થાય છે આંજણી, ઘરેલૂ ઉપચારથી મેળવો રાહત

ક્યારેક આંખની પાંપણ પર ઓઈલ ગ્લેન્ડ્સ (તેલ ગ્રંથિ) વધુ પડતી એક્ટિવ થઈ જાય તો આંજણી થઈ શકે છે. આ માટે સ્ટેફિલોકોરસ બેક્ટેરિયા જવાબદાર છે. આ સિવાય પાંપણમાં કચરો, ઓઈલ કે ડેડ સ્કીન જમા થવાથી પણ આ સમસ્યા થાય છે. આંજણી આમ તો આંખને નુકસાન નથી કરતી પરંતુ ખંજવાળ અને સતત દુઃખાવો થયા કરે છે. આંજણીની સમસ્યામાંથી આ ઘરેલુ ઉપચાર કરીને પણ છૂટકારો મેળવી શકો છો.

- હૂંફાળી ટી બેગ્સ આંજણીની સારવાર માટે સૌથી અસરકારક છે. હૂંફાળી ટી બેગને આંજણી થઇ હોય ત્યાં મૂકો અને ઠંડી થાય ત્યાં સુધી રહેવા દો. આ ઉપચારથી દુખાવામાં રાહત મળશે અને સાથે જ સોજો ઓછો કરશે. 

- ગરમ કરેલું દૂધ હૂંફાળુ થાય ત્યારે તેમાંથી તાજી મલાઈ લઈ લો અને આંજણી પર લગાવો. સૂકાઈ જાય ત્યારે દૂધ લઈને એ ભાગ સાફ કરો બાદમાં ચોખ્ખા કપડાંથી લૂછી લો.

- ધાણાને પાણીમાં નાખીને ઉકાળો. સહેજ ઠંડું પડે એટલે ધાણા કાઢી આ પાણીનો આંજણીવાળી જગ્યાએ છંટકાવ કરો. દિવસમાં 5-6 વખત આ પ્રયોગ કરો.

- ફ્રેશ એલોવેરા જેલ આંજણી પર લગાવો અને થોડો સમય માટે રહેવા દો, આ પછી હૂંફાળા પાણીથી આંખ ધોઇ લો. આ પ્રયોગથી આંખ હાઇડ્રેટ થશે અને સાથે જ આંજણી મટી જશે.

- દિવેલમાં હાઈડ્રેટિંગ તત્વો રહેલા છે જે આંજણી મટાડવામાં મદદ કરે છે.દિવેલના બે-ત્રણ ટીંપા લઈ આંજણી થઈ હોય તે ભાગમાં હળવા હાથે મસાજ કરો. થોડી મિનિટ રહેવા દઈ હૂંફાળા પાણીથી ધોઈ લો. સારા પરિણામ માટે આ ઉપાય અજમાવતા રહો.

- જામફળના પાન ધોઈ લો. હૂંફાળા પાણીમાં રૂમાલ પલાળો. હવે આ રૂમાલમાં જામફળના પાન મૂકી શેક કરો. રાહત લાગશે.

- 2 કપ પાણીમાં એક ચમચી હળદર નાખીને ઉકાળો. ઠંડું થાય એટલે 3-4 વાર આ પાણીથી આંખ ધોઇ લો.

- ઈન્ફેક્શન હોય તો હાથ ધોઈને જ તે ભાગે અડવું અને બાદમાં પણ હાથ ધોઇ લેવા. આંજણીને ફોડવી કે દબાવવી નહી. આઇ મેક અપ ના કરવો. કોન્ટેક્ટ લેન્સ ન પહેરવા. થોડા દિવસોમાં કોઇ ફરક ન પડે તો ડોક્ટરને બતાવી દેવુ.

આંજણી ના થાય તે માટે આ બાબતોનું રાખો ખાસ ધ્યાન:

- આંખ અને પાંપણની સ્વચ્છતા જાળવો. 

- ઊંઘવા જતા પહેલા મેકઅપ કાઢી નાખો અને બરાબર ધોઇ લો.

- આઇ મેકઅપ સમયાંતરે બદલતા રહો.

- ગંદા હાથે લેન્સ ના પહેરો.

- આંજણી થઇ હોય તેનો વાપરેલો રૂમાલ કે અન્ય વસ્તુ ના વાપરો.

- ગંદા હાથે આંખો ના મસળો.

નોંધ: ઉપર આપેલા તમામ ઉપાય કરતા પહેલા ડોક્ટરની સલાહ ચોક્કસથી લેજો.