ગાંધીધામની હોટલ સેવન સ્પાઈસમાંથી ઝડપાયું હુક્કાબાર

ગાંધીધામ શહેરના ટાગોર રોડ પાસે આવેલી હોટલ સેવન સ્પાઈસમાં હુક્કાબારમાં પોલીસે દરોડા પાડયા હતા. આ હોટલમાંથી પોલીસે નિકોટીનયુક્ત જુદા-જુદા ફ્લેવરની બોટલો અને હુક્કા સહિતનો મુદ્દામાલ ઝડપી પાડયો હતો.

હોટલ સેવન સ્પાઈસમાં દરોડા પાડ્યા બાદ પોલીસે આ હોટલના માલિક રાજદીપ જાડેજાની સામે તમાકુ અધિનિયમ તળે ગુનો નોંધી કાનુની કાર્યવાહી હાથ ધરી છે.  

સમગ્ર ઘટના વિશે જણેવીયે તો ગાંધીધામ શહેરના ટાગોર રોડ પર આવેલી એક ખાનગી હોટલમાં ચાલતા ગેરકાયદેસર હુક્કાબાર પર ત્રાટકતાં પોલીસે કાર્યવાહી હાથ ધરી હતી. કચ્છના આર્થિક પાટનગર તરીકે ઓળખાતા આ સંકુલમાં છેલ્લા લાંબા સમયથી હુક્કાબારો ધમધમી રહ્યા હોવાની અનેક ફરિયાદો ઊઠી હતી.

આ બધી ફરિયાદોને ધ્યાને રાખીને પોલીસે મોડી રાત્રે કાર્યવાહી હાથ ધરી હતી. આ સંદર્ભે ગાંધીધામ એ. ડિવિઝન પોલીસે વિગતો આપતાં જણાવ્યું હતું કે ટાગોર રોડ પર આવેલી હોટલ સેવન સ્પાઇસમાં હુક્કાબાર ચાલતો હોવાની બાતમીના આધારે દરોડો પાડવામાં આવ્યા હતા. 

જે દરમ્યાન હોટલમાંથી નિકોટીનયુક્ત જુદા-જુદા ફ્લેવરની બોટલો અને હુક્કા સહિતનો મુદ્દામાલ પ્રાપ્ત થયો છે. આ અંગે હોટલના માલિક રાજદીપ જાડેજા વિરુદ્ધ તમાકુ અધિનિયમ તળે ગુનો નોંધવામાં આવ્યો છે.