એન્કાઉન્ટર /  BIG NEWS: સુરેન્દ્રનગરમાં પિતા-પુત્રનાં એન્કાઉન્ટર મુદ્દે ગૃહરાજ્યમંત્રી સંઘવીનું મોટું નિવેદન, જાણો શું કહ્યું

• સુરેન્દ્રનગર એન્કાઉન્ટર મામલે ગૃહરાજ્યમંત્રીનું નિવેદન
• આરોપીનો સમગ્ર પરિવાર ગુનામાં સામેલ હતો : હર્ષ સંઘવી
• પોલીસે સ્વબચાવમાં કર્યું હશે ફાયરિંગ : હર્ષ સંઘવી

સુરેન્દ્રનગર જિલ્લાના માલવણ નજીક ગેડીયા ગામે પોલીસ એન્કાઉન્ટરમાં વોન્ટેડ આરોપી હનીફ ખાન ઉર્ફે કાળુખાન અને તેના પુત્ર મદીન ખાનનું મોત થયું છે. જેને લઈને  ગૃહરાજ્યમંત્રી સંઘવીનું મોટું નિવેદન સામે આવ્યું છે. હર્ષ સંઘવીએ જણાવ્યું કે આરોપીનો સમગ્ર પરિવાર ગુનામાં સામેલ હતો. પોલીસ બાતમીના આધારે પકડવા ગઈ હતી પરતું આરોપીઓને જાણ થતા પોલીસ પર હુમલો કર્યો તે દરમિયાન પોલીસે સ્વબચાવમાં ફાયરિંગ કર્યું જેમાં બંને વોન્ટેડ આરોપીઓના મોત નિપજ્યા છે. 

આરોપીનો સમગ્ર પરિવાર ગુનામાં સામેલ હતો : હર્ષ સંઘવી

બંને મૃતક લૂંટ માટે કુખ્યાત ગેડિયા ગેંગના સભ્યો હોવાનું જાણવા મળ્યું છે. ઉલ્લેખનીય છે કે આરોપી હનીફ ખાન સામે અત્યાર સુધીમાં કુલ 86 જેટલા ગુના નોંધાયા હતા, જેમાંથી તે 59 ગુનામાં પોલીસના હાથે પકડાયો જ નહોતો. પોલીસ સુત્રોના જણાવ્યું મુજબ ગુજસીટોકના ફરાર આરોપી હનીફખાન ગેડીયા હોવાની બાતમી મળતા માલવણ પોલીસ ટીમ આરોપીને પકડવા ગેડિયા ગામ ગઈ હતી. 

પોલીસે સ્વબચાવમાં કર્યું હશે ફાયરિંગ : હર્ષ સંઘવી

જ્યાં આરોપીઓને જાણ થતા તેમણે પોલીસ પર હુમલો કર્યો હતો જે બાદ પોલીસે સ્વ-બચાવમાં ફાયરિંગ કર્યું જેમાં હનીફ અને પુત્ર મદિનને ગોળીઓ લાગતા ઘટના સ્થળે જ મોત નીપજ્યું હતું, જે બાદ પોલીસે આગળની કાર્યવાહી કરી મૃતદેહ પીએમ અર્થે ખસેડ્યો હતો. જ્યાં પરિવારના સભ્યો પહોંચ્યા હતા અને હોબાળો મચાવ્યો હતો, પરિવારના સભ્યોએ મૃતદેહ લેવાનો ઈન્કાર કરી દીધો છે, અને જ્યાં સુધી ન્યાય ન મળે ત્યાં સુધી મૃતદેહ નહીં સ્વીકારે તેવું રટણ કરી રહ્યા છે.