જામનગર / ટિકિટની જાહેરાત પહેલા હકુભાને સૌથી મોટો ફટકો, હાઇકોર્ટે ક્રિમિનલ કેસમાં રાહત આપવાનો કર્યો ઇન્કાર

• પૂર્વ મંત્રી હકુભા જાડેજાને મોટો ફટકો
• હાઇકોર્ટે ક્રિમિનલ કેસમાં રાહત આપવાનો કર્યો ઇન્કાર
• પૂર્વ મંત્રી હકુભા જાડેજાનું નિવેદન

ગુજરાત વિધાનસભાની ચુંટણીની જાહેરાત પહેલા જામનગર ભાજપના ધારાસભ્ય હકુભાને સૌથી મોટો ફટકો પડ્યો છે, હાઇકોર્ટે ક્રિમિનલ કેસમાં હકુભાને  રાહત આપવાનો ઇન્કાર કર્યો છે.એક બાજુ જામનગર ઉત્તર બેઠક પર ક્રિકેટર રવીન્દ્ર જાડેજાના પત્ની રિવાબા દાવેદાર છે. જેને ટિકિટ મળે તેવા ઉજવા સંજોગો વર્તાઇ રહ્યા છે.  તેવામાં હાઇકોર્ટેના આદેશને લઇને હકુભાની મુશ્કેલીમાં વધારો થયો છે.  એક તરફ ભાજપ ગમે ત્યારે ઉમેવારોનું લિસ્ટ જાહેર કરે તેવી સ્થિતિ છે. ત્યારે હાઇકોર્ટે હકુભાને રાહતનો ઇનકાર કર્યો છે. 

રાજ્ય સરકારે કરેલી અરજીને હાઇકોર્ટે ફગાવી છેઃ હકુભા
બીજી તરફ હકુભાનું નિવેદન સામે  આવ્યું છે. જેમાં કહ્યું કે 2007માં 200થી વધુ લોકો આંદોલનમાં હતા. 48 લોકો પર જે-તે સમયે કેસ થયો હતો. ખેડૂત હિત રક્ષક સમિતની અધ્યક્ષતામાં અમારું આંદોલન હતું. હાઇકોર્ટમાં રાજ્ય સરકારે કેસ પાછો ખેંચવા માટે અરજી કરી હતી. રાજ્ય સરકારે કરેલી આ અરજીને હાઇકોર્ટે ફગાવી હોવાનું  હકુભાએ જણાવ્યું હતું.

ગુજરાત વિધાનસભાની ચૂંટણીની જાહેરાતો બાદ હવે ટિકિટ માટે લોબિંગ શરૂ થયું છે. જોકે સૌરાષ્ટ્રમાં જામનગરની ઉત્તર બેઠક સૌથી વધુ ચર્ચાનું કારણ બની શકે છે. ક્ષત્રિય પ્રભુત્વ ધરાવતી આ બેઠક પર ભારતીય ક્રિકેટર રવિન્દ્ર જાડેજાની પત્ની અને બહેન વચ્ચે જંગ જામી શકે છે. રવિન્દ્ર જાડેજાના પત્ની રિવાબા જાડેજા ભાજપમાં છે. તે 2019ની લોકસભા ચૂંટણી દરમિયાન માર્ચ મહિનામાં ભાજપમાં જોડાયા હતા. તો વળી રવિન્દ્ર જાડેજાની બહેન નયના જાડેજા એક મહિના પછી એપ્રિલ, 2019માં કોંગ્રેસમાં જોડાયા હતા. ત્યારથી નૈના રાજકીય રીતે ખૂબ જ સક્રિય છે અને જામનગર કોંગ્રેસ મહિલા મોરચાના પ્રમુખ પણ છે. રાજકીય વર્તુળોમાં ચર્ચા છે કે, પાર્ટી આ વખતે તેમને મેદાનમાં ઉતારી શકે છે. નયના જાડેજા કોંગ્રેસમાં જોડાયા ત્યારથી સતત સક્રિય છે.

રવિન્દ્ર જાડેજાના પત્ની રિવાબા જાડેજાને મળશે ટિકિટ ? 
રવિન્દ્ર જાડેજાના પત્ની રિવાબા જાડેજા ઘણા સમયથી ભાજપમાંથી ટિકિટ માટે દાવેદારી કરી રહ્યા છે, પરંતુ જ્યાં સુધી ધર્મેન્દ્રસિંહ જાડેજા (હકુભા) ધારાસભ્ય છે ત્યાં સુધી તેમનો ટિકિટ ના મળે તેવી સ્થિતિ બની છે. જો ભાજપ ધર્મેન્દ્ર સિંહની ટિકિટ કાપે છે તો રિવાબાનો નંબર લઈ શકાય છે. ક્રિકેટરની પત્ની અને પહેલેથી જ ભાજપમાં સક્રિય હોવાના કારણે તેમને ટિકિટ મળી શકે છે. રીવાબા રાજકોટના છે, તેના પિતા મોટા ઉદ્યોગપતિ છે. જેના કારણે રિવાબા વર્ષોથી સામાજિક કાર્યમાં સક્રિય છે.

તો પછી કોંગ્રેસ નયના જાડેજાને ટિકિટ આપશે ? 
જામનગર ઉત્તરમાં બદલાયેલા સમીકરણોમાં કોંગ્રેસ વેઈટ એન્ડ વોચના મૂડમાં છે. જો ભાજપ રિવાબાને ટિકિટ આપે તો કોંગ્રેસ રવિન્દ્ર જાડેજાની બહેન નયના જાડેજાને મેદાનમાં ઉતારી શકે છે. મહત્વનું છે કે, નયના જાડેજા કોંગ્રેસના મહિલા મોરચાના પ્રમુખ છે અને પાર્ટીમાં ખૂબ જ સક્રિય છે. નયના જાડેજા રાજકોટમાં આવેલી હોટલની માલિક છે. જો આમ થાય છે તો ટીમ ઈન્ડિયા ક્રિકેટર રવિન્દ્ર જાડેજા મુશ્કેલીમાં મુકાઈ જશે, તેમણે ચૂંટણી જંગમાં કોનો પ્રચાર કરવો જોઈએ.