મેઘકહેર / ભારે પવન સાથે સુરતમાં સાંબેલાધાર વરસાદ, તંત્રએ જાહેર કરી હેલ્પલાઈન, અધિકારીઓની રજાઓ રદ્દ 

• સુરતમાં તમામ અધિકારી કારીઓની રજાઓ રદ કરાઈ
• વરસાદના કારણે સુરતમાં નીચાણવાળા વિસ્તારોમાં પાણી ભરાયા
• બારડોલીમાં મુખ્યમાર્ગ ઉપર ઝાડ ધરાશાયી થતા એક તરફનો વાહનવ્યવહાર ઠપ્પ

સુરત શહેરમાં શરૂ થયેલો વરસાદ અટકવાનું નામ જ ન લેતા આ વરસાદ હવે વેરી સબીત થઇ રહ્યો છે. સતત વરસાદના કારણે સુરતમાં વરસાદી આફત આવી છે. વરસાદના કારણે સુરતમાં નીચાણવાળા વિસ્તારોમાં પાણી ભરાઈ ગયા છે.જેને લઈને શહેરના રાંદેરના રામનગર વિસ્તારમાં, આનંદ સોસાય ટીમાં પાણી ભરતા  લોકોને પરેશાનીનો સામનો કરવાનો વારો આવ્યો છે. પાણીના યોગ્ય નિકાલની વ્યવસ્થા ન હોવાથી થોડા જ વરસાદમાં પાણી ભરાવાની સમસ્યા ઊભી થઈ છે. અહીં વારંવાર પાણી ભરાઈ જવાથી સ્થાનિકો પરેશાન છે. તંત્રને અનેક રજૂઆતો કરવામાં આવી તેમ છતાં પણ પાણી નિકાલની કોઈ જ વ્યવસ્થા કરવામાં આવી ન હોવાથી સ્થાનિકોમાં રોષ જોવા મળી રહ્યો છે. 

તમામ અધિકારી કારીઓની રજાઓ રદ કરાઈ
સુરત શહેરમાં આજે પણ મેઘમહેર યથાવત રહેવા પામી હતી. શહેરમાં વહેલી સવારથી જુદા જુદા વિસ્તારોમાં કયાક સાંબેલાધાર તો ક્યાંય ઝાપટુ વરસ્યું હતું. શહેરના અડાજણ, પાલ, રાંદે, પીપલોદ, અઠવાલાઇન્સ, નાનપુરા, ભટાર, ઉધના, મજૂરા, વેસુ અને પાંડેસરા વિસ્તારમાં ભારે વરસાદ ખબક્યો હતો. અતિ ભારે વરસાદની શક્યતાને લઈ આજે સુરત મનપામાં ફરજ બજાવતા અધિકારીઓની રજા રદ કરી દેવામાં આવી છે. બીજ બાજુ સુરત જિલ્લાના ઓલપાડ, કિમ, સાયણ વિસ્તારમાં પણ વરસાદ પડયો હતો. ટૂંકા વીરામ બાદ તેજ પવન સાથે ફરી વરસાદ  શરૂ થયો હતો.

બારડોલીમાં તોતિંગ લીમડાનું વૃક્ષ ધરાશાયી
વધુમાં જિલ્લાના બારડોલીમાં પણ વરસાદે ફરી સટાસટી બોલાવી હતી. તોફાની વરસાદને પગલે ઠેર ઠેર નુકસાની પણ થઇ હતી. ભારે વરસાદને લઇને બારડોલી નગરના મુદિત પેલેસથી શાસ્ત્રી રોડને જોડતા માર્ગ પર આવેલા સ્વામિનારાયણ મંદિર નજીક તોતિંગ લીમડાનું વૃક્ષ ધરાશાયી થયું હતું. મુખ્યમાર્ગ ઉપર ઝાડ ધરાશાયી થતા એક તરફનો વાહનવ્યવહાર ઠપ્પ થઇ ગયો હતો આ ઉપરાંત વીજતાર ઉપર ઝાડ પડતા વીજપુરવઠાને પણ અસર થવા પામી હતી. 
  
અધિકારીઓ હેડક્વાર્ટર ન છોડવા આદેશ
બીજી તરફ હવામાન વિભાગ દ્વારા આગામી સમયમાં પણ ભારે વરસાદની આગાહી કરવામાં આવી છે ત્યારે આ આગાહીને લઇને સુરત તંત્ર એલર્ટ મોડ પર આવી ગયું છે. તમામ અધિકારીઓને હેડક્વાર્ટર ન છોડવા માટે સૂચના આપી દેવામાં આવી છે. સુરત જિલ્લા કલેક્ટરે દ્વારા આ આદેશ જાહેર કરવામાં આવ્યા છે. 5 દિવસ સુધી ભારે વરસાદની આગાહીને કારણે અધિકારીઓને હેડક્વાર્ટર ન છોડવાનો આદેશ જાહેર કરાયો છે. વધુમાં સ્થાનિક કંટ્રોલ રૂમના 0260-2663200  અને 0261-1077 નંબર કરાયા જાહેર કરવામાં આવ્યા છે.