ગુજરાતમાં આગામી 4 દિવસ સાર્વત્રિક વરસાદની આગાહી કરવામાં આવી છે. એમાંય તારીખ 8 અને 9 જુલાઈના રોજ રાજ્યમાં ભારેથી અતિભારે વરસાદ પડવાની આગાહી કરાઇ છે.
રાજ્યમાં છેલ્લા 24 કલાકમાં 187 તાલુકામાં વરસાદ વરસ્યો
ગુજરાતમાં આગામી 4 દિવસ સાર્વત્રિક વરસાદની આગાહી
અમદાવાદમાં 5થી 8 ઇંચ વરસાદ પડવાની શક્યતા
ઉત્તર ઓડિશા પર લો-પ્રેશર સક્રિય થયું છે જેથી રાજસ્થાન અને મધ્યપ્રદેશમાં મોન્સૂન ટ્રફ રચાયો છે. આથી, આ લો-પ્રેશર અને મોન્સૂન ટ્રફના કારણે સમગ્ર ગુજરાતમાં હળવાથી અતિભારે વરસાદ વરસી શકે છે. જ્યારે અમદાવાદમાં 5થી 10 જુલાઇ દરમિયાન 5થી 8 ઇંચ વરસાદ પડવાની શક્યતા સેવવામાં આવી રહી છે. મહત્વનું છે કે, રાજ્યમાં છેલ્લા 24 કલાકમાં 187 તાલુકામાં વરસાદ વરસ્યો છે. જેમાં સૌથી વધુ દ્વારકાના કલ્યાણપુરમાં સવા 6 ઈંચ વરસાદ ખાબક્યો.
5થી 9 જુલાઈના રોજ ભારેથી અતિભારે વરસાદ વરસવાની શક્યતા
હવામાન વિભાગની આગાહી અનુસાર, રાજ્યમાં તારીખ 5થી 7 જુલાઈના રોજ ભારેથી અતિભારે વરસાદ વરસવાની શક્યતા છે. એમાંય તારીખ 8 અને 9 જુલાઇના રોજ અતિભારે વરસાદની હવામાન વિભાગે આગાહી કરી છે. જેમાં દ્વારકા, પોરબંદર, જૂનાગઢ, અમરેલી, ગીર સોમનાથ, ભાવનગરમાં ભારેથી અતિ ભારે વરસાદ થઈ શકે છે. વલસાડ, દમણ દાદરા નગર હવેલીમાં અતિ ભારે વરસાદની આગાહી કરાઇ છે. એ સિવાય ઉત્તર ગુજરાતમાં બનાસકાંઠા સાબરકાંઠામાં મહીસાગર દાહોદમાં ભારેથી અતિભારે વરસાદ વરસવાની આગાહી કરાઇ છે. જ્યારે અમદાવાદમાં છૂટા છવાયા વરસાદની આગાહી કરવામાં આવી છે.
રાજ્યમાં સૌથી વધુ દ્વારકાના કલ્યાણપુરમાં સવા 6 ઈંચ વરસાદ વરસ્યો
તમને જણાવી દઇએ કે, રાજ્યમાં છેલ્લા 24 કલાકમાં 187 તાલુકામાં વરસાદ ખાબક્યો છે. જેમાં સૌથી વધુ દ્વારકાના કલ્યાણપુરમાં સવા 6 ઈંચ વરસાદ પડ્યો છે. એ સિવાય કડાણામાં 4.5 ઈંચ, દ્વારકામાં સવા 4 ઈંચ વરસાદ, રાણાવાવમાં સવા 4 ઈંચ, ફતેપુરામાં 4 ઈંચ વરસાદ, જૂનાગઢમાં 4 ઈંચ, કુતિયાણામાં 4 ઈંચ વરસાદ, રાજકોટમાં પોણા 4 ઈંચ, મેંદરડામાં 3 ઈંચ વરસાદ, ખંભાળિયામાં 3 ઈંચ, ગઢડામાં 3 ઈંચ વરસાદ, માંડવીમાં પોણા 3 ઈંચ, ધ્રોલમાં પોણા 3 ઈંચ વરસાદ, વંથલીમાં 2.5 ઈંચ, ઉમરગામમાં 2.5 ઈંચ વરસાદ, પોરબંદરમાં 2.5 ઈંચ અને મોરબીમાં 2.5 ઈંચ વરસાદ વરસ્યો છે.