સૌરાષ્ટ્ર-કચ્છ સહિતના રાજ્યના કેટલાક વિસ્તારોમાં ધોધમાર વરસાદ પડ્યો છે. 24 કલાકમાં 32 જિલ્લાના 176 તાલુકામાં વરસાદ નોંધાયો છે. રાજ્યમાં સિઝનનો અત્યાર સુધી કુલ 98.10 ટકા જેટલો વરસાદ ખાબક્યો છે અને ઓગસ્ટ માસથી અત્યારસુધી રાજ્યમાં સરેરાશ 18 ઇંચ વરસાદ નોંધાયો છે. તો હવામાન વિભાગ દ્વારા ભાદરવો ભારે રહેવાના એંધાણ અપાયા છે. ઉત્તર પૂર્વ અરબી સમુદ્રમાં સાયક્લોનિક સરક્યુલેશન સક્રિય થતા આગામી 5 દિવસ સૌરાષ્ટ્ર, દ.ગુજરાત સહિતના રાજ્યના વિસ્તારોમાં ભારેથી અતિભારે વરસાદની આગાહી કરવામાં આવી છે.
રાજ્યના કચ્છ, જૂનાગઢ, જામનગર, રાજકોટ, પોરબંદર દ્વારકા, મોરબી અને બનાસકાંઠા સહિતના વિસ્તારોમાં ધોધમાર વરસાદ વરસ્યો છે. ત્યારે વરસાદના પગલે નીચાણવાળા વિસ્તારોમાં પાણી ભરાયા તો નદી-નાળા પણ છલકાયા છે. ભારે વરસાદના કારણે અનેક રોડ ધોવાયા છે. બીજી બાજુ ફરી વરસાદનું આગમન થતા ખેડૂતોમાં ખુશીની લહેર વ્યાપી છે.
કચ્છમાં ધોધમાર વરસાદ
કચ્છના સરહદી વિસ્તારો ખાવડા, બન્ની, પચ્છમ સહિત રાપર, આડેસર, ત્રામ્બો ગામે ધોધમાર વરસાદ થયો. જેના પગલે બજારમાં પાણી વહેતા થયા છે. નિંચાણવાળા વિસ્તારોમાં પાણી ભરાયા છે. વર્ષો બાદ પુરતા વરસાદને કારણે લોકોમાં ખુશી જોવા મળી છે.
જૂનાગઢ-જામનગરમાં નદીનાળા છલકાયા
જૂનાગઢમાં 2 કલાકમાં 3 ઇંચ વરસાદ થયો છે. કાલાવડ, લાલપુર, જામજોધપુર, ધ્રોલ સહિતના વિસ્તારોમાં વરસાદ વરસ્યો. સાર્વત્રિક વરસાદ થતા ખેડૂતોમાં ખુશીની લહેર જોવા મળી રહી છે. નીચાણવાળા વિસ્તારમાં પાણી ભરાય ગયા છે. કેટલાક વિસ્તારના રસ્તા પર પાણી વહેતા થયા છે. કાળવા વિસ્તારમાં વોકળામાં પાણીનો પ્રવાહ વધ્યો છે. બીજી બાજુ જામનગરના મોટી બાણુગાર ગામે ધોધમાર વરસાદ પડ્યો હતો. અત્યાર સુધીમાં નવ ઇંચ વરસાદ ખાબકતા નદીનાળા છલકાયા હતા. ભારે વરસાદના કારણે રોડ રસ્તાઓ અને કોઝ વે ધોવાયા હતો. જેને લઈને લોકોને મુશ્કેલીનો સામનો કરવો પડ્યો હતો.
રાજકોટ શહેરમાં 7 ઈંચ વરસાદ ખાબક્યો, નીચાળવાલા વિસ્તારોમાં પાણી ભરાયા
રાજકોટ શહેર અને જિલ્લામાં મેઘરાજા મોડીરાત્રે મન મૂકીને વરસ્યા. શહેરમાં ગાજવીજ સાથે ધોધમાર વરસાદ પડ્યો. રાજકોટ શહેરમાં 7 ઇંચ જેટલો વરસાદ ખાબક્યો છે. ત્યારે ગ્રામ્ય વિસ્તારોમાં બપોરબાદ ધોધમાર વરસાદ ખાબક્યો છે. કોટડા, સાંગાણી અને ગોંડલના અનેક ગામડાઓ જેમાં મોટીમેગણી, નાની મેગણી, પાટિયારી, થોરડી ગામે વરસાદ ખાબક્યો. મોટીસર ડેમમાં નવા નીર આવતા ખેડુતોને સિંચાઈમાં ફાયદો થશે.
મોતીમેગણી ગામની નદી બે કાંઠે થતા સ્થાનિક ખેડૂતોમાં ખુશી જોવા મળી છે. ભારે વરસાદના કારણે લક્ષ્મીનગર અને પોપટપરા નાળું બંધ કરી દેવાયું છે. મહિલા કોલેજે અન્ડરબ્રિજનું નાળું બંધ કરી દેવાયું છે. સાવચેતીના ભાગરૂપે ફાયર બ્રિગેડની ટીમ અને મનપાનો વિજિલન્સ પોલીસ સ્ટાફ પણ તૈનાત કરી દેવાયો છે. શહેરમાં નીચાણવાળા વિસ્તારોમાં પાણી ભરાઇ ગયા છે. શહેરમાં હાલ ધીમીધારે વરસાદ હજુ ચાલું છે.
મહત્વનું છે કે, કોટડાસાંઘાણી અને લોધિકામાં 2 ઇંચ જેટલો વરસાદ પડ્યો છે. જ્યારે જેતપુર અને જસદણમાં પણ ભારે વરસાદ પડ્યો છે. તો ફરી મેઘમહેર થતા કપાસ, મગફળી અને કઠોળ સહિતના પાકને ફાયદો થશે. ખેડૂતોને પિયતની જરૂરિયાતના સમયે જ વરસાદ પડતા ખેડૂતો ખુશ થઇ ગયા છે.
મોરબી જિલ્લામાં વરસાદી માહોલ
આ તરફ મોરબીમાં પણ રાતથી વરસાદી માહોલ સર્જાયો છે. મોરબી જિલ્લામાં ધીમીધારે વરસાદ વરસી રહ્યો છે. જેના કારણે ચો તરફ લિલોતરી પથરાઈ છે. તો ધીમીધારે વરસાદ વરસતાં ખેડૂતોમાં ખુશીની લહેર છવાઈ ગઈ છે.
દ્વારકામાં ભારે વરસાદથી નાના ચેકડેમો ભરાયા
દ્વારકામાં ધોધમાર વરસાદ થયો છે. જિલ્લાના ખંભાળિયા તાલુકાના કેશોદના વિંઝલપર, ઉગમણા બારા ગામ, કલ્યાણપુર તાલુકાના લાંબા ગામમાં ભારે વરસાદ વરસ્યો છે. ખંભાળિયાના કેશોદ ગામે ધોધમાર વરસાદ થયો છે. વરસાદી પાણી રસ્તાઓ પર વહેતા થયા છે. મહત્વનું છે કે, દ્વારકામાં મોડીરાત્રે પણ ધોધમાર વરસાદ વરસ્યો હતો. વિરામ બાદ વરસાદનું આગમન થતા અને નાના ચેકડેમો ભરાતા ખેડૂતોમાં ખુશીનો માહોલ જોવા મળ્યો છે.
બનાસકાંઠામાં વીજળીના કડાકા સાથે ધોધમાર વરસાદ
બનાસકાંઠામાં વિરામબાદ ફરી એકવાર મેધરાજા મનમુકીને વરસ્યાં છે. ત્યારે છેલ્લા 24 કલાકમાં બનાસકાંઠાના અમીરગઢમાં દોઢ ઈંચ વરસાદ પડ્યો છે. તો વીજળીના કડાકા સાથે ધોધમાર વરસાદ પડતા ખેડૂતોમાં આનંદની લાગણી છવાઈ છે. તો પાલનપુરમાં મોડીરાત્રે ધોધમાર વરસાદ પડ્યો હતો. જેના કારણે ગણેશ પંડાલોમાં પાણી ભરાઇ ગયા હતા. ગણેશ પંડાલો ભીંજાઇ ગયા હતા.
સુરતમાં તાપી નદી ફરી બે કાંઠે વહેતી થઇ
સુરતમાં તાપી નદી ફરી બે કાંઠે વહેતી થઈ છે. ઉકાઈ ડેમની સપાટી 339.75 ફૂટે પહોંચી છે. આથી ઉકાઈ ડેમમાંથી 1 લાખ 38 હજાર ક્યુસેક પાણી છોડાઈ રહ્યું છે. જેને લઈને સુરત કોઝ-વે ફરી ભયજનક સપાટીએ પહોંચ્યો. કોઝ-વેની ભયજનક સપાટી 6 મીટર છે. જ્યારે કોઝ-વેમાં 8.36 મીટર સપાટી ઉપર પાણીનું વહેણ જોવા મળી રહ્યું છે.