રાજ્યના વિવિધ જિલ્લાઓમાં વરસાદી માહોલ જોવા મળી રહ્યો છે પરંતુ હજી પણ આગામી 5 દિવસ ગુજરાત માટે ભારે છે કારણ કે રાજ્યમાં સાર્વત્રિક 5 દિવસ વરસાદની આગાહી કરવામાં આવી છે. તેમાં પણ સૌરાષ્ટ્રના દરિયાકાંઠા વિસ્તારોમાં ભારેથી અતિભારે વરસાદની શક્યતા વ્યક્ત કરવામાં આવી છે જેને લઇને તંત્ર એલર્ટ મોડમાં જોવા મળી રહ્યું છે. સંભવિત વરસાદની સ્થિતિને પહોંચી વળવા માટે સૌરાષ્ટ્રમાં ટીમ એલર્ટ મોડમાં આવી ગઇ છે.,
સૌરાષ્ટ્રમાં વહીવટી તંત્ર એલર્ટ
દરિયા કિનારો ધરાવતા ગીર સોમનાથ જિલ્લામાં આગાહીના પગલે વહીવટી તંત્ર દ્વારા NDRFની અત્યાધુનિક સાધનો સાથે 25 જવાનોની ટીમ તૈનાત કરાઈ છે. જિલ્લામાં 29 સેલટર હોમ તૈયાર કરાયા છે. જિલ્લા કન્ટ્રોલરૂમ ઉપરાંત તમામ તાલુકા મથકે 24 કલાક કન્ટ્રોલ રૂમ કાર્યરત કરી દેવાયા છે. તેમજ અધિકારીઓ ને હેડક્વાર્ટર ના છોડવાના આદેશ પણ કરી દેવામાં આવ્યા છે. તાલુકા અને ગ્રામ્ય કક્ષાએ રેસ્કયુ ટીમ તૈયાર કરાઈ છે. તેવું જિલ્લા કલેક્ટરે જણાવ્યું હતું.
ભાવનગરમાં NDRF ની એક ટીમ તૈનાત
મધ્ય ગુજરાત,દક્ષિણ ગુજરાત તેમજ સૌરાષ્ટ્રમાં આપવામાં આવેલ 5 દિવસ ની ભારે થી અતિભારે વરસાદની આગાહી ને પગલે સમગ્ર ગુજરાતમાં 8 જેટલી NDRF ની ટીમ ફાળવવામાં આવી છે જેના પગલે ભાવનગર શહેર માં પણ એક NDRF ની ટીમ આજ વહેલી સવારે આવી પહોંચી હતી.ભાવનગર શહેર માં 25 સભ્યો ની NDRF ની એક ટીમ આવી પહોંચી હતી. આધુનિક સાધનોથી સજ્જ NDRF ની ટીમ હાલ પૂરતી ભાવનગર શહેરમાં સ્ટેન્ડબાય રાખવામાં આવી છે.
હવામાન વિભાગે 5 દિવસ વરસાદની કરી આગાહી
વરસાદને લઇ હવામાન વિભાગે મોટી આગાહી કરી છે. આગામી 5 દિવસ રાજ્યમાં મેઘમહેરના વરતારા છે. 8 જુલાઈએ અતિભારે વરસાદની આગાહી આપવામાં આવી છે તેમજ અમદાવાદમાં સામાન્ય વરસાદની આગાહી છે. દક્ષિણ ગુજરાતના માછીમારો આજથી દરિયો ન ખેડવાની સુચના આપવમાં આવી છે. દક્ષિણ ગુજરાત અને સૌરાષ્ટ્રમાં સારો વરસાદ વરસ્યો છે. પણ હજુ પણ ગુજરાતમાં વરસાદની સરેરાશ 34 ટકા ઘટ જોવા મળી રહી છે.
6 જુલાઈના રોજ નવસારી, સુરત અને આણંદમાં વરસાદની આગાહી
બીજી બાજુ તારીખ 6 જુલાઈના રોજ નવસારી, સુરત, આણંદ વડોદરા, ભરૂચ, સુરત, પોરબંદર, ભાવનગર, અમરેલી, દ્વારકા, બોટાદ અને ગીર સોમનાથમાં વરસાદની આગાહી કરવામાં આવી છે.
રાજ્યમા કુલ 70 તાલુકામા વરસ્યો વરસાદ
દક્ષિણ ગુજરાત અને સૌરાષ્ટ્રમાં મેઘો ઘડબડાતી બોલાવી રહ્યો છે. સોમવારે રાજ્યના કુલ 70 તાલુકામા વરસાદી મહેર જોવા મળી છે.અમરેલી સાવરકુંડલા અને ખાંભામાં 3 ઇંચ વરસાદ, પારડીમા 3 ઇંચ ઉમરગામમાં 2.5 ઇંચ વરસાદ, વાપી 2 ઇંચ વિસાવદરમા 2 ઇંચ વરસાદ, સુરતના પલસાનામા 2 ઇંચ વરસાદ નોંધાયો છે.