આગાહી / આગામી 24 કલાક ગુજરાત માટે અતિભારે, અમદાવાદમાં મોડી રાતથી વરસાદની ધમાકેદાર બેટિંગ, જુઓ બીજે ક્યાં ખાબક્યો

• આગામી 24 કલાક માટે અતિભારે વરસાદની આગાહી
• અમદાવાદમાં મોડી રાતથી જ વરસાદે રમઝટ બોલાવી
• અન્ય જિલ્લાઓમાં પણ મેઘરાજાએ કરી ધમાકેદાર બેટિંગ

હવામાન વિભાગે આજે ફરી રાજ્યમાં ભારે વરસાદની આગાહી કરી છે. એવામાં અમદાવાદમાં ગઇકાલ રાતથી જ આજ સવાર સુધી તડામાર વરસાદ વરસી રહ્યો છે. ત્યારે અમદાવાદમાં પૂર્વથી લઇને પશ્ચિમ સુધીના અનેક વિસ્તારો વરસાદે રમઝટ બોલાવતા પાણી-પાણી થઇ ગયા છે.

પૂર્વ વિસ્તારમાં મેઘરાજાએ ધબધબાટી બોલાવી

શહેરના પૂર્વ વિસ્તારની જો વાત કરીએ તો અમદાવાદમાં નિકોલ, નરોડા, ઓઢવ, બાપુનગર, કૃષ્ણનગર સહિતના વિસ્તારોમાં આખી રાતથી વરસાદ વરસતા ચારે બાજુ પાણી ભરાઇ ગયા છે. તો બીજી બાજુ પશ્ચિમ વિસ્તારમાં પણ આંબાવાડી, વસ્ત્રાપુર, બોપલ, ઘુમા, સોલા, થલતેજ, પકવાન અને પ્રહલાદનગર સહિતના વિસ્તારમાં વરસાદ મન મૂકીને વરસ્યો છે. જેના કારણે લોકોને સવાર-સવારમાં ઓફિસે જવામાં ભારે તકલીફનો સામનો કરવો પડ્યો હતો.

ફરીવાર વરસાદે અમદાવાદને ઘમરોળતા શહેરનો પૂર્વ વિસ્તાર ભારે વરસાદથી જળબંબાકાર થઇ ગયો. શહેરના મણિનગર, હાટકેશ્વર, અજીતમિલ અને રખિયાલમાં પાણી ભરાતા લોકોએ ભારે હાલાકીનો સામનો કરવો પડ્યો.

24 કલાક માટે અતિભારે વરસાદની આગાહી

તમને જણાવી દઇએ કે, હવામાન વિભાગે ઉત્તર ગુજરાત અને દક્ષિણ ગુજરાતમાં સારા એવા વરસાદની આગાહી કરી છે. સાથે સૌરાષ્ટ્ર અને કચ્છમાં પણ સારો એવો વરસાદ વરસશે. હવામાન વિભાગે આગાહી કરતા જણાવ્યું કે, ગુજરાત માટે 24 કલાક અતિભારે છે.

ગુજરાતમાં આજે કચ્છ, બનાસકાંઠા, સાબરકાંઠા, મોરબી, જામનગર, દ્વારકા, ભરૂચ, સુરત, આણંદ, વલસાડ અને દમણ સહિતના વિસ્તારોમાં હવામાન વિભાગે ભારે વરસાદની આગાહી કરી છે.

જુઓ આજે રાજ્યમાં કઇ-કઇ જગ્યાએ વરસાદે રમઝટ બોલાવી?

મહેસાણામાં પણ વરસાદ સારો એવો વરસતા શહેરના અનેક વિસ્તારોમાં પાણી ભરાઇ ગયા. શહેરના નાગલપુર અને મોઢેરા ચોકડી બસ પોર્ટમાં પાણી ભરાઇ જતા મહેસાણા-અમદાવાદ હાઈ-વે ઉપર પાણી ભરાઇ ગયા. જેના લીધે વાહનવ્યવહારને પણ અસર થઇ છે.

વલસાડ જિલ્લામાં સાર્વત્રિક વરસાદી માહોલ

વલસાડ જિલ્લામાં પણ ફરીવાર વરસાદી માહોલ જામ્યો છે. જિલ્લામાં ફરીવાર ધોધમાર વરસાદની શરૂઆત થઇ જતા વલસાડ જિલ્લામાં સૌથી વધારે 7.3 ઈંચ વરસાદ વાપીમાં ખાબક્યો છે. એ સિવાય ઉમરગામમાં 2.68 ઈંચ, કપરાડામાં 6.64 ઈંચ, ધરમપુરમાં 5.24 ઈંચ, પારડીમાં 3.6 ઈંચ અને વલસાડમાં 5.8 ઈંચ વરસાદ નોંધાયો છે. શહેરમાં ભારે વરસાદથી મોગરાવડી ગરનાળામાં પાણી ભરાઇ ગયા છે. પાણી ભરાતા એક કાર ચાલક ગરનાળામાં ફસાઇ ગયો હતો.

બનાસકાંઠા જિલ્લામાં પણ સાર્વત્રિક વરસાદ વરસ્યો

બનાસકાંઠા જિલ્લામાં પણ સાર્વત્રિક વરસાદ વરસ્યો છે. બનાસકાંઠાના ભાભર અને સુઇ ગામમાં 4 ઇંચ જેટલો વરસાદ ખાબક્યો છે. ડીસામાં પણ વરસાદના કારણે ઠેર-ઠેર પાણી ભરાઇ ગયા છે. મોડી રાતથી જ અહીંયા અનેક વિસ્તારોમાં ધોધમાર વરસાદ વરસ્યો છે. જેના કારણે નીચાણવાળા વિસ્તારોમાં અહીં પાણી ભરાઇ ગયા છે. જાહેર રોડ-રસ્તા પર પણ પાણી ફરી વળતા વાહન ચાલકો પરેશાન થઇ ગયા છે.