ગુજરાતમાં મેઘો ધોધમાર વરસી રહ્યો છે અને હજી પણ 12 જુલાઇ સુધી ભારેથી અતિભારે વરસાદની આગાહી કરવામાં આવી છે. જેને લઇને વહીવટી તંત્ર સતર્ક થયુ છે. રાજ્યમાં દરિયાકાંઠાના વિસ્તારોમાં એનડીઆરએફની ટીમ તૈનાત કરવામાં આવી છે.આ ઉપરાંત નીચાણવાળા વિસ્તારોને પણ એલર્ટ કરાયા છે. આજની વાત કરીએ તો સૌરાષ્ટ્રમાં મેઘરાજા ધડબડાટી બોલાવી રહ્યાછે. ગીરસોમનાથ, દ્વારકા, વેરાવળ સહિતના મેઘરાજા મનમૂકીને વરસી રહ્યા છે . ત્યારે દ્વારકામાં તો વરસાદને લઇને કલેક્ટરે ઘરની બહાર કામ વિના ન નીકળવાની અપીલ કરી છે.
દ્વારકામાં અતિભારે વરસાદની આગાહી
દેવભૂમિ દ્વારકા જિલ્લામાં છેલ્લા બે દિવસથી ભારે વરસાદ વરસી રહ્યો છે. જેને લઇ જન જીવન અસ્ત-વ્યસ્ત થયું છે. સાથે જ જિલ્લાના અનેક ગામમાં પૂરની સ્થિતિ સર્જાઇ છે. ત્યારે હવામાન વિભાગ દ્વારા હજુ પણ દ્વારકામાં અતિભારે વરસાદની આગાહી કરવામાં આવી છે. હાલમાં જિલ્લાના નીચાણવાળા વિસ્તારો પર તંત્ર નજર રાખી રહ્યુ છે. જો જરૂર પડે તો અન્ય સ્થળે ખસેડવાની પણ તૈયારીઓ કરી દેવામાં આવી છે.
'કામ સિવાય બહાર ન નીકળો'
આ અંગે દ્વારકાના કલેક્ટર મુકેશ પંડ્યાએ જણાવ્યું કે જિલ્લામાં ભારે વરસાદની આગાહી છે. ખાસ કરીને લોકો નદીના પટમાં કે કોઝવે પરથી પાણી પસાર થતુ હોય ત્યારે અવરજવર ન કરે. આગામી હજુ બે દિવસ ભારે વરસાદ પડી શકે છે તેવા સંજોગોમાં નીચાણવાળા વિસ્તારોમાં અવરજવર ન કરો. નીચાણવાળા વિસ્તારો છે તેઓએ આશ્રય સ્થાનમાં સલામત સ્થળે જતા રહેવું જોઇએ. બને ત્યાં સુધી કામ સિવાય ઘરની બહાર ન નીકળે તેવી અપીલ પણ કરવામાં આવી હતી
કેસરિયા તળાવ ઓવરફ્લો
તો આ તરફ દ્વારકાના ભાટીયામાં ભારે વરસાદ થતા મુખ્ય બજારમાં પાણી ફરી વળ્યા છે. પરિણામે ભાટિયાનું કેસરિયા તળાવ ઓવરફલો થયું છે. ભોગાત, કેનડી ગામમાં પણ ભારે વરસાદ થયો. ખેતરો પણ પાણી પાણી થયા હતા.
ભોપલકા તળાવ ઓવરફ્લો
તો આ તરફ કલ્યાણપુર તાલુકાનું ભોપલકા ગામનું તળાવ ઓવરફલો થયું.આ ઉપરાંત ભારે વરસાદને કારણે પીરદાદા તળાવ પણ છલકાયું હતું. મહત્વનું છે કે
કલ્યાણપુરમાં બે દિવસથી ધોધમાર વરસાદ વરસી રહ્યો છે. સારા વરસાદને કારણે નદી-તળાવોમાં પાણીની આવક થતા ખેડૂતો ખુશખુશાલ થયા હતા.
તમને જણાવી દઇએ કે, હવામાન વિભાગે આજે આગાહી કરતા જણાવ્યું છે કે, 'રાજ્યમાં તારીખ 7 જુલાઈના રોજ ભાવનગર, સુરત, ભરૂચ, જૂનાગઢ, અમરેલી, સોમનાથ, તાપી, નવસારી, ડાંગ અને વલસાડમાં વરસાદની આગાહી વ્યક્ત કરવામાં આવી છે. તો 8 જુલાઈના રોજ નવસારી, દ્વારકા, ડાંગ,પોરંબદર, સુરત, તાપી, ડાંગ, સોમનાથ, રાજકોટ, જામનગર, જૂનાગઢ, કચ્છ, મોરબી, અમરેલી, ભાવનગર, ભરૂચ અને નર્મદામાં વરસાદની આગાહી વ્યક્ત કરવામાં આવી છે.'
9 જુલાઈના રોજ કચ્છ, જામનગર, દ્વારકા, પોરબંદર, રાજકોટમાં વરસાદની આગાહી
જ્યારે તારીખ 9 જુલાઈના રોજ રાજ્યમાં કચ્છ, જામનગર, દ્વારકા, પોરબંદર, રાજકોટ, મોરબી, નવસારી, વલસાડ, ડાંગ, જૂનાગઢ, સુરત અને તાપીમાં વરસાદની આગાહી કરાઇ છે. તો 10 જુલાઈએ દ્વારકા, પોરબંદર, વલસાડ, જૂનાગઢ, મોરબી,રાજકોટ, તાપી, સુરત અને ડાંગમાં વરસાદની આગાહી કરવામાં આવી છે.
12 જુલાઇએ સૌરાષ્ટ્ર અને કચ્છમાં ચક્રવાત સાથે વરસાદ પડશે
રાજ્ય (Gujarat) માં સાબરકાંઠામાં અરવલ્લીમાં ભારે વરસાદની સંભાવના સેવવામાં આવી રહી છે. તારીખ 10 જુલાઇએ મધ્ય ગુજરાતમાં બારેમેઘ ખાંગા થવાની પૂરી સંભાવના છે. તો બીજી બાજુ મધ્ય ગુજરાતના પણ અનેક ભાગમાં ભારે વરસાદ પડશે. 11 જુલાઇએ આખા ગુજરાતમાં ભારેથી અતિ ભારે વરસાદની સંભાવના છે. જ્યારે 12 જુલાઇએ સૌરાષ્ટ્ર અને કચ્છમાં ચક્રવાત સાથે વરસાદ પડશે. તો 11 અને 12 જુલાઇએ ગુજરાતમાં ભારેથી અતિભારે વરસાદ વરસશે.