બેઠક / ગુજરાતના રેકૉર્ડબ્રેક કેસ અમદાવાદમાં નોંધાતા આવતીકાલે આરોગ્યમંત્રી કરશે આ કામ

• અમદાવાદમાં વકર્યો કોરોના
• રાજ્ય સરકારની ચિંતામાં વધારો 
• આરોગ્યમંત્રી આવતી કાલે યોજશે સમીક્ષા બેઠક

રાજ્યમાં કોરોના વકર્યો છે તેમાં પણ ખાસ કરીને અમદાવાદમાં તો કોરોનાએ રફતાર પકડી છે. રાજ્ય સરકાર દ્વારા મહાનગરોમાં રાત્રે 11થી સવારે 5 વાગ્યા સુધી કર્ફ્યૂની  જાહેરાત કરવામાં આવી છે તે સિવાય હજી કોઇ પણ નિયંત્રણો લાગુ કરવામાં આવ્યા નથી.  જો કે અમદાવાદમાં કોરોનાના કેસ વધતા રાજ્ય સરકાર ચિંતિત જણાઇ રહી છે. આરોગ્યમંત્રી ઋષિકેશ પટેલ આવતીકાલે એક સમીક્ષા બેઠક યોજશે. રિવરફ્રન્ટ ખાતે યોજાયેલ સમીક્ષા બેઠકમાં તેઓ વધતા કેસ અંગે અમદાવાદ મનપાના અધિકારીઓ સાથે ચર્ચા કરશે.  રાજ્યમાં કોરોના સંક્રમણને નિયંત્રિત કરવા મુદ્દે ચર્ચા થશે.

કોરોનાની નવી ગાઇડલાઇનની થશે જાહેરાત

રાજ્યમાં કોર કમિટીની બેઠક બાદ નવા નિયંત્રણોની જાહેરાત થશે. વેક્સિનેશનને ધ્યાને રાખી નવા નિયંત્રણો અમલી બનાવાશે. જો કે જે લોકોએ વેક્સિનના બંને ડોઝ લીધી હશે તેઓને નિયંત્રણોમાં છૂટછાટ મળી શકે છે. વાણિજ્યિક એકમોમાં કેપેસિટીને આધિન નિયંત્રણ લાદી શકાશે. 50 ટકા કેપેસિટી આધીન છૂટછાંટ આપવા વિચારણા કરવામાં આવી શકે છે. 

અમદાવાદમાં ક્યારે કેટલા કેસ ?

• 6 જાન્યુઆરી, 2022-  1863 કેસ
• 5 જાન્યુઆરી,2022- 1660 કેસ
• 4 જાન્યુઆરી,2022- 1314 કેસ
• 3 જાન્યુઆરી, 2022- 644 કેસ
• 2 જાન્યુઆરી,2022-404 કેસ
• 1 જાન્યુઆરી,2022- 559 કેસ

કોરોનાને લઇને સોલા-સિવિલ સજ્જ

ગુજરાત સાથે જ અમદાવાદમાં કોરોનાના વધતા સંક્રમણ વચ્ચે અમદાવાદ સોલા સિવિલ સજ્જતા ધારણ કરી છે. સોલા સીવીલમાં ઓક્સિજન ક્ષમતામાં કરાયો વધારો કરવામાં આવ્યો છે. હોસ્પિટલમાં બીજી લહેર વેળા  5 ટન ઓક્સિજન ક્ષમતા હતી તેના બદલે હવે આ ક્ષમતામાં વધારો કરાતા ત્રીજી લહેર પહેલા નવા ત્રણ પ્લાન્ટ સ્થાપિત કરાયા છે. સોલા સિવિલમાં 1 હજાર, 500 અને 230 LPMના ત્રણ પ્લાન્ટ સ્થાપિત કરવામાં આવ્યા છે. તો 5 ટનની ક્ષમતા વધારી 12.7 મેટ્રીક ટન કરવામાં આવી છે. દાખલ થનારા સંભવિત દર્દીઓ માટે 100 વેન્ટિલેટર અને 350 ઓક્સિજન બેડવાળા દર્દીની જરૂરિયાત પૂર્ણ કરી શકશે. અગાઉ સોલા સિવિલમાં અગાઉ 50 વેન્ટિલેટર બેડ હતા જે વધારીને 100 વેન્ટિલેટર બેડ કરવામાં આવ્યા છે.

સાડાચાર મહિના પછી ગુજરાત HCમાં ફિઝિકલ હિયરિંગ બંધ

રાજ્યમાં કોરોના સંક્રમણને પગલે સોમવારથી ગુજરાત હાઇકોર્ટમાં ફિઝિકલ હિયરિંગ બંધ કરવામાં આવ્યું છે. હવે વર્ચ્યુઅલ સુનાવણી થશે. સોમવારથી કોર્ટ કેમ્પસમાં સ્ટાફ સિવાયના લોકોનો પ્રવેશબંધી કરવામાં આવશે. આગામી બે દિવસ સુધી હાઇકોર્ટ પરિસરનું સેનિટાઇઝેશન કરવામાં આવશે. વકીલોની ચેમ્બર્સ પણ બંધ કરાશે. કેસના ફાઇલિંગ માટે 10 કાઉન્ટર્સ શરૂ કરાશે. વિસ્તૃત માર્ગદર્શિકા આજે દિવસ દરમ્યાન જાહેર થશે.

સરકારે વાઇબ્રન્ટ સમિટ, ફલાવર શો અને પતંગોત્સવ પણ મોકૂફ 

ગુજરાતમાં છેલ્લા 10 દિવસથી કોરોનાના કેસમાં મોટો ઉછાળો આવતાં આખરે રાજ્ય સરકારે 6 જાન્યુઆરીએ આગામી 10થી 12 જાન્યુઆરી દરમિયાન યોજાનારી વાઇબ્રન્ટ ગુજરાત સમિટ મોકૂફ રાખવાનો નિર્ણય કર્યો હતો, સાથે જ અમદાવાદમાં યોજાનારા ફ્લાવર શો તથા પતંગોત્સવ પણ રદ કરવામાં આવ્યા છે. વાઇબ્રન્ટ સમિટમાં ભાગ લેવા માટે દેશ-વિદેશથી પ્રતિનિધિમંડળો આવવાના હતા. જોકે ગુજરાત સહિત દેશ તથા દુનિયાભરમાં પણ સંક્રમણ વ્યાપક બનતાં મુખ્યમંત્રી ભૂપેન્દ્ર પટેલે સમિટ મોકૂફ રાખવાનો નિર્ણય કર્યો છે.